ເກີດເຫດຢຽບກັນຕາຍ ໃນງານເທດສະການທາງສາສະໜາ ປະເທດອິສຣາເອລ ເສຍຊີວິດ 44 ຄົນ

14

ເກີດເຫດຢຽບກັນຕາຍໃນເທດສະການທາງສາສະໜາ ທີ່ມີຊາວຢິວນິກາຍອັລຕຣາ-ອໍໂທດັອກຫຼາຍໝື່ນຄົນໄປຮ່ວມງານ ທາງພາກເໜືອຂອງປະເທດອິສຣາເອລ ສົ່ງຜົນໃຫ້ມີຜູ້ເສຍຊີວິດ 44 ຄົນ ແລະ ບາດເຈັບ 150 ຄົນ ໃນຕອນເຊົ້າຂອງວັນສຸກ.

ສຳນັກຂ່າວເອພີ ລາຍງານຈາກນະຄອນຫຼວງເຢຣູຊາເລັມ ປະເທດອິສຣາເອລ ເມື່ອວັນສຸກ ທີ 30 ເມສາ ວ່າ ອີງຕາມການບອກເລົ່າຂອງຜູ້ເຫັນເຫດການ ເປີດເຜີຍກັບວິທະຍຸກອງທັບອິສຣາເອລ ວ່າ ອຸບັດຕິເຫດຢຽບກັນຕາຍເກີດຂຶ້ນຂະນະທີ່ປະຊາຊົນຈຳນວນຫຼວງຫຼາຍໄດ້ພະຍາຍາມທີ່ຈະຜ່ານອອກຈາກບໍລິເວນປະຕູທາງອອກຄ້າຍກັບອຸໂມງ ແລ້ວເກີດການບຽດກັນຈົນແອອັດຈົນມີຄົນລົ້ມ ແລະ ຖືກຄົນຢູ່ທາງຫຼັງຢຽບຊ້ຳພ້ອມກັນຂັ້ນໄດໂລຫະເຮັດໃຫ້ມື່ນພະລາດກາຍເປັນຄວາມຊົນລະມຸນແອອັດ ເບື້ອງຕົ້ນມີຜູ້ເສຍຊີວິດ 44 ຄົນ ແລະ ບາດເຈັບ 150 ຄົນ ເມື່ອເຊົ້າວັນສຸກ ຜ່ານມາ.

ເຫດຢຽບກັນໄດ້ເກີດຂຶ້ນລະຫວ່າງການສະເຫຼີມສະຫຼອງງານເທດສະການທາງສາສະໜາ ແລກ ບາໂອເມີ ເທິງພູເມຣອນ ທາງພາກເໜືອ ຂອງປະເທດອິສຣາເອລ. ເຊິ່ງໃນປີນີ້ ສື່ມວນຊົນໄດ້ຄາດການວ່າ ຈະມີປະຊາຊົນເດີນທາງເຂົ້າຮ່ວມເຖິງ 1 ແສນຄົນ.

ສ່ວນທ່ານນາຍົກລັດຖະມົນຕີອິສຣາເອລ ທ່ານເບັນຈາມິນ ເນທັນຢາຮູ ກ່າວວ່າ ການຢຽບກັນຕາຍເປັນເຫດການເສົ້າສະຫຼົດຮ້າຍແຮງ ແລະ ທຸກຄົນໄດ້ສວດມົນພາວະນາໃຫ້ແກ່ຜູ້ເຄາະຮ້າຍ.