ຫວຽດນາມພົບຜູ້ຕິດເຊື້ອໂຄວິດ-19 ທຸບສະຖິຕິປະຈຳວັນ

23

ຜູ້ປ່ວຍສະສົມຈາກການຕິດເຊື້ອໂຄວິດ-19 ໃນຫວຽດນາມເພິ່ມຂຶ້ນຫຼາຍກວ່າ 500 ຄົນ ຫຼັງຈາກໄດ້ຢືນຢັນຜູ້ປ່ວຍໃໝ່ 45 ຄົນ ເປັນສະຖິຕິປະຈຳວັນສູງທີ່ສຸດ.

ສຳນັກຂ່າວຕ່າງປະເທດລາຍງານຈາກນະຄອນຫຼວງຮາໂນ່ຍ ປະເທດຫວຽດນາມ ເມື່ອວັນສຸກ ທີ 31 ກໍລະກົດ ວ່າ ກະຊວງສາທາລະນະສຸກຫວຽດນາມ ຖະແຫຼງການ ເມື່ອວັນສຸກ ວ່າ ຈຳນວນຜູ້ປ່ວຍສະສົມຈາກການຕິດເຊື້ອໂຄວິດ-19 ໃນຮອບ 24 ຊົ່ວໂມງ ຜ່ານມາ ເພິ່ມຂຶ້ນ 45 ຄົນ ເປັນສະຖິຕິປະຈຳ ວັນສູງທີ່ສຸດ ນັບຕັ້ງແຕ່ຫວຽດນາມປະສົບກັບການແຜ່ລະບາດ ເມື່ອທ້າຍເດືອນມັງກອນ ຜ່ານມາ ແລະ ຍິ່ງເພິ່ມຄວາມກັງວົນໃຫ້ກັບທຸກພາກສ່ວນ ເນື່ອງຈາກກຸ່ມຜູ້ຕິດເຊື້ອໃໝ່ນັ້ນ ອາໄສຢູ່ໃນຊຸມຊົນເມືອງດານັງ ແລະ ເປັນການກວດພົບການຕິດເຊື້ອໃນຊຸມຊົນເປັນຄັ້ງທຳອິດ ໃນຮອບ 3 ເດືອນ ເມື່ອວັນເສົາຜ່ານມາ.

ສຳລັບຜູ້ຕິດເຊື້ອກຸ່ມຫຼ້າສຸດ ມີທັງຊາຍ ແລະ ຍິງ ອາຍຸ 27 ຫາ 87 ປີ ສ່ວນຫຼາຍແລ້ວຕິດເຊື້ອເປັນກຸ່ມສະມາຊິກໃນຄອບຄົວ ປັດຈຸບັນ ກຳລັງປິ່ນປົວຢູ່ໂຮງໝໍ 3 ແຫ່ງ ໃນເມືອງດານັງ ໂດຍຜູ້ຕິດເຊື້ອຄົນທຳອິດໃນກຸ່ມດັ່ງກ່າວເປັນຜູ້ຊາຍ ອາຍຸ 57 ປີ ເມື່ອອາທິດກ່ອນ ສະຖິຕິດັ່ງກ່າວ ສົ່ງຜົນໃຫ້ການກວດພົບຜູ້ຕິດເຊື້ອໃນຊຸມຊົນ ຕັ້ງແຕ່ວັນທີ 25 ກໍລະກົດ ຜ່ານມາ ຢ່າງໜ້ອຍ 93 ຄົນ ໃນນັ້ນ 79 ຄົນຢູ່ໃນເມືອງດານັງ ສ່ວນທີ່ເຫຼືອແມ່ນກະຈາຍຢູ່ໃນເມືອງໃຫຍ່ແຫ່ງອື່ນ ລວມທັງນະຄອນຫຼວງຮາໂນ່ຍ ແລະ ນະຄອນໂຮຈິມິນ.

ສະພາບການຫຼ້າສຸດ ຢູ່ເມືອງດານັງ ໄດ້ເພີ່ມສະຖິຕິຜູ້ປ່ວຍສະສົມຈາກໂວິດ-19 ໃນຫວຽດນາມ ຢ່າງ ໜ້ອຍ 509 ຄົນ ຍັງເຫຼືອຜູ້ປ່ວຍໃນລະບົບ ຢ່າງໜ້ອຍ 140 ຄົນ ແລະ ບໍ່ມີຜູ້ເສຍຊີວິດ.