ສະຫວັນນະເຂດ ເອົາໃຈໃສ່ມາດຕະຖານຊິງກາງໃນທ້ອງຕະຫຼາດ

3

ພະແນກວິທະຍາສາດ ແລະ ເຕັກໂນໂລຊີແຂວງສະຫວັນນະເຂດ ສືບຕໍ່ລົງຕິດຕັ້ງຊິງກາງທີ່ຕະຫຼາດຫຼັກ 8 ນະຄອນໄກສອນ ພົມວິຫານ ໃນວັນທີ 27 ກໍລະກົດ 2020 ໂດຍການເຂົ້າຮ່ວມຂອງ ທ່ານ ບຸນເຄືອບ ແກ້ວມະນີ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ ພ້ອມດ້ວຍພະນັກງານວິຊາການ ແລະ ເຈົ້າໜ້າທີ່ກ່ຽວຂ້ອງ.

ທ່ານ ບຸນເຄືອບ ແກ້ວມະນີ ກ່າວວ່າ: ການຕິດຕັ້ງຊິງກາງໃນຕະຫຼາດຫຼັກ 8 ໃນຄັ້ງນີ້ ແມ່ນໄດ້ຕິດຕັ້ງໃສ່ 3 ໜ່ວຍ ທີ່ໄດ້ແຈກຢາຍໄວ້ຕາມຈຸດໃຫ້ບໍລິການຕ່າງໆພາຍໃນຕະຫຼາດ. ທັງນີ້, ກໍເພື່ອນຳໃຊ້ເຂົ້າໃນການບໍລິການແກ່ຜູ້ທີ່ມາຊື້ ແລະ ຜູ້ຂາຍ.

ພ້ອມນີ້, ກໍຝາກເຕືອນສະຕິພໍ່ແມ່ປະຊາຊົນທັງຜູ້ຊື້ ແລະ ຜູ້ຂາຍ ຂໍໃຫ້ມີຄວາມຊື່ສັດຈິງໃຈເຊິ່ງກັນ ແລະ ກັນ; ດ້ານຜູ້ຂາຍກໍຂໍໃຫ້ຮັກໃນການປະກອບອາຊີບຂອງຕົນເອງບໍ່ເອົາລັດເອົາປຽບຜູ້ບໍລິໂພກ, ມີຄວາມຍຸຕິທຳ, ມີຄວາມຈິງໃຈໃນການໃຫ້ບໍລິການແກ່ລູກຄ້າ ແລະ ໃຊ້ຊິງທີ່ໄດ້ມາດຕະຖານທີ່ຜ່ານການກວດກາຂອງວິຊາການພວກເຮົາ ເຊິ່ງຊິງທີ່ຜ່ານກວດທຽບແມ່ນຈະໄດ້ຕິດສະຕິກເກີໃສ່ໜ້າຂອງຊິງ ແລະ ໜີບກົ່ວໃສ່ຂ້າງຂອງຊິງ, ໃນກໍລະນີຜູ້ຊື້ຫາກສັງເກດເຫັນວ່າ: ການຊັ່ງ, ການຜອງຜິດປົກກະຕິ ກໍໃຫ້ໄປໃຊ້ບໍລິການຊິງກາງຄືນອີກ ເພື່ອຄວາມຖືກຕ້ອງ ແລະ ຊັດເຈນ. ຈາກນີ້, ກໍຮຽກຮ້ອງມາຍັງຜູ້ຈັດສັນຕະຫຼາດຊ່ວຍໃນການຄຸ້ມຄອງຊິງກາງທີ່ໄດ້ລົງໄປຕິດຕັ້ງໃຫ້ໃນຄັ້ງນີ້ ເຊິ່ງໃນອະນາຄົດຕໍ່ໜ້າ, ພະແນກວິທະຍາສາດ – ເຕັກໂນໂລຊີ ພວກເຮົາຍັງຈະໄດ້ລົງເຄື່ອນໄຫວຕິດຕັ້ງຊິງກາງທີ່ຕະຫຼາດອື່ນໆໃນຂອບເຂດເທສະບານແຂວງຕື່ມອີກ.