ເຈດີບີ ຊ່ວຍສ້າງໂຮງຮຽນປະຖົມ ບ້ານສະກິພີນ ເມືອງເຊໂປນ ມູນຄ່າ 250 ລ້ານກີບ

14

ທະນາຄານຮ່ວມພັດທະນາ ຫຼື ເຈດີບີ ( JDB ) ແລະ ກອງທຶນຮ່ວມໃຈທະນາຄານຮ່ວມພັດທະນາ ໄດ້ເຫັນເຖິງຄວາມຈໍາເປັນຂອງວຽກງານການສຶກສາ ຈຶ່ງໄດ້ເອົາທຶນຈໍານວນໜຶ່ງ ມູນຄ່າ 250 ລ້ານກີບ ສ້າງໂຮງຮຽນປະຖົມບ້ານສະກິພີນ ( ຄຸ້ມສາງ ) ເມືອງເຊໂປນ ແຂວງສະຫວັນນະເຂດ.

ພິທີມອບ – ຮັບອາຄານດັ່ງກ່າວ ຈັດຂຶ້ນໃນວັນທີ 28 ກໍລະກົດ ໃຫ້ກຽດເຂົ້າຮ່ວມຂອງ ທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກີລາແຂວງສະຫວັນນະເຂດ, ທ່ານ ວົງສະຫວັນ ວຽງມະນີ ເຈົ້າເມືອງເຊໂປນ, ທ່ານ ຄຳສິງ ສອນສິງນະວົງ ຮອງຜູ້ອຳນວຍການໃຫຍ່ທະນາຄານຮ່ວມພັດທະນາ, ທ່ານ ຖາວອນ ອ້ວນມາລາ ຕາງໜ້າຜູ້ບໍລິຫານກອງທຶນຮ່ອມໃຈທະນາຄານຮ່ວມພັດທະນາ.

ໃນພິທີ ທ່ານ ຄຳເພັດ ໄຊຍະເທບ ຫົວໜ້າຫ້ອງການສຶກສາທິການ ແລະ ກີລາ ເມືອງເຊໂປນ ໄດ້ກ່າວວ່າ: ໂຮງຮຽນປະຖົມບ້ານສະກິພີນ ( ຄຸ້ມສາງ ) ເມືອງເຊໂປນ ແຂວງສະຫວັນນະເຂດ ໄດ້ລົງມືຈັດຕັ້ງປະຕິບັດໃນວັນທີ 24 ກຸມພາ 2020 ຈົນເຖິງວັນທີ 13 ເມສາ 2020 ຖືວ່າສຳເລັດ 100% ເຊິ່ງເປັນອາຄານຊັ້ນດຽວມີຂະໜາດກວ້າງ 8×14 ແມັດ, ມຸງດ້ວຍສັງກະສີ, ກໍ່ດ້ວຍດິນຈີ່ ປະກອບດ້ວຍສອງຫ້ອງຮຽນແຕ່ຊັ້ນ ປ 1 ຫາ ປ 4 ພ້ອມດ້ວຍໂຕະ – ຕັ່ງ ຈຳນວນ 30 ຊຸດ, ກະດານດຳ 2 ແຜ່ນ, ເສົາທຸງ 1 ເສົາ ແລະ ຫ້ອງນໍ້າສະອາດ 1 ຫຼັງ ລວມມູນຄ່າໃນການກໍ່ສ້າງທັງໝົດ 250 ລ້ານກີບ.

ໂອກາດນີ້, ທ່ານ ຖາວອນ ອ້ວນມາລາ ຕາງໜ້າກອງທຶນຮ່ວມໃຈທະນາຄານຮ່ວມພັດທະນາກ່າວວ່າ: ກອງທຶນຮ່ວມໃຈທະນາຄານຮ່ວມພັດທະນາໄດ້ສ້າງຕັ້ງຂຶ້ນໃນປີ 2015 ມີເປົ້າໝາຍໃນການຊຸກຍູ້ສົ່ງເສີມການສຶກສາໃນເຂດຫ່າງໄກສອກຫຼີກ, ການຊ່ວຍເຫຼືອຜູ້ປະສົບໄພຈາກເຫດການຕ່າງໆ ແລະ ປະກອບສ່ວນເຂົ້າໃນວຽກງານສໍາຄັນຂອງພັກ – ລັດຖະບານ.

ໜັງສືພິມ ເສດຖະກິດ-ການຄ້າ