ພິດໂຄວິດ ງົດມອບລາງວັນ ບັລລອງ ດໍ ໃນຮອບ 64 ປີ

27

ຟຣອງຊ໌ ຟຸດບອລ ວາລະສານທີ່ມີຊື່ສຽງຂອງຝຣັ່ງ ປະກາດງົດພິທີມອບລາງວັນ ບັລລອງ ດໍ ຄັ້ງທໍາອິດໃນຮອບ 64 ປີ ຕາມການປະກາດຢືນຢັນ ເມື່ອວັນຈັນ ທີ 20 ກໍລະກົດ ເນື່ອງໄດ້ຮັບຜົນກະທົບຈາກການແຜ່ລະບາດຂອງໂຄວິດ 19.

ລາງວັນບັລລອງ ຕັດສິນໂດຍການໂຫວດຂອງຜູ້ສື່ຂ່າວ ແລະ ຈັດໂດຍວາລະສານ ຟຣອງຊ໌ ຟຸຸດບອລ ເປັນການມອບລາງວັນໃຫ້ແກ່ນັກເຕະທີ່ມີຜົນງານປະຈຳລະດູການດີສຸດຂອງໂລກ ເຊິ່ງຈັດມາຕັ້ງແຕ່ປີ 1956 ແລະ ໄດ້ເລິ່ມມອບໃຫ້ກັບນັກເຕະຍິງ ເມື່ອປີ 2018 ເປັນຕົ້ນມາ.

ຫຼ້າສຸດ ທ່ານປາສຄາລ ແຟເຣ ບັນນາທິການຂອງ ຟຣອງຊ໌ ຟຸດບອລ ອອກຖະແຫຼງການກ່ອນປະກາດຍົກເລີກວ່າ: “ໃນຂອບເຂດຂອງກີລາ, ໄລຍະພຽງ 2 ຈາກ 11 ເດືອນ ເພື່ອຮອບຮວມຜົນງານ ແລະ ຊີ້ຂາດ ວ່າ: ໃຜຄືນັກເຕະທີ່ເໝາະສົມກັບລາງວັນເຊິ່ງເປັນເວລາໜ້ອຍເກີນໄປທີ່ຈະປະເມີນ ແລະ ຕັດສິນ, ແຕ່ຢ່າລືມວ່າການແຂ່ງຂັນທີ່ຜ່ານໄປແລ້ວ ຫຼື ກໍາລັງແຂ່ງຂັນ ຢູ່ພາຍໃຕ້ເງື່ອນໄຂພິເສດ ( ບໍ່ມີຜູ້ຊົມ ແລະ ປ່ຽນຕົວໄດ້ 5 ຄົນ ພາຍໃນ 3 ຄັ້ງ ) ”.

ສໍາລັບ ຕົວເຕັງປະຈໍາປີ 2020 ກ່ອນຍົກເລີກ ໄດ້ແກ່ ໂຣເບິດ ເລວານດອຟສະກີ ກອງໜ້າຂອງ ບາເຢິນ ມິວນິກ ທີ່ຍິງໄປ 50 ປະຕູ ລວມທຸກລາຍການ ແລະ ລຸ້ນຄວ້າ 3 ແຊັມໃນລະດູການນີ້ກັບທີມ, ສ່ວນ ລິໂອເນລ ເມສຊີ ກອງໜ້າຂອງ ບາເຊໂລນາ ເຈົ້າຂອງລາງວັນນີ້ 6 ສະໄໝ ກາຍເປັນນັກເຕະຄົນທໍາອິດທີ່ຍິງ 20 ປະຕູ ແລະ ສົ່ງໃຫ້ໝູ່ຍິງ 20 ປະຕູໃນລະດູການດຽວ.