ຈີນຍົກສູງການເຕືອນໄພພາກພື້ນລຸ່ມແມ່ນ້ຳຫວຍ

10

ລັດຖະບານຈີນໄດ້ຍົກສູງການເຕືອນໄພສະຖານະການຕາມລຽບລຸ່ມແມ່ນ້ຳຫວຍເປັນຂັ້ນຮອງສູງສຸດ ເນື່ອງຈາກຝົນຕົກໜັກທີ່ສຸດໃນຮອບຫຼາຍທົດສະວັດ ສົ່ງຜົນໃຫ້ລະດັບນ້ຳຍື່ງຂຶ້ນສູງຈົນ “ບໍ່ປອດໄພແລ້ວ”.

ສຳນັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນອາທິດ ທີ 19 ກໍລະກົດ ວ່າ ກະຊວງຊັບພະຍາກອນນໍ້າຂອງຈີນ ອອກຖະແຫຼງການ ເມື່ອວັນອາທິດ ຍົກສູງລະດັບການເຝົ້າລະວັງນໍ້າຂອງສະພາບການນໍ້າຫວຍຈາກຂັ້ນ 3 ຂຶ້ນມາເປັນຂັ້ນ 2 ຈາກທັງໝົດ 4 ຂັ້ນ ແລະ ເຕືອນໄພປະຊາຊົນທີ່ອາໃສຢູ່ລຽບຕາມສອງຝັ່ງຂອງລຸ່ມແມ່ນໍ້າໃຫ້ມີສະຕິພ້ອມຮັບມືກັບໄພນໍ້າຖ້ວມກະທັນຫັນຈາກລະດັບນໍ້າໃນປັດຈຸບັນຍື່ງຂຶ້ນສູງ “ເຖິງຈຸດອັນຕະລາຍ” ຄື 8,65 ແມັດ.

ແມ່ນ້ຳຫວຍມີຄວາມຍາວ ປະມານ 1.110 ກິໂລແມັດ ໄຫຼຜ່ານບັນດາມົນທົນເຊິ່ງເປັນເຂດກະສິກຳ ທາງພາກຕາເວັນອອກຂອງຈີນ ເຊັ່ນ: ມົນທົນເຫີໜານ, ມົນທົນອານຮຸຍ, ແລະ ມົນທົນຈຽງຊູ. ແມ່ນໍ້າຫວຍຖືເປັນໜຶ່ງໃນແມ່ນໍ້າສາຍສຳຄັນຂອງຈີນ ເປັນຈຸດເຊື່ອມຕໍ່ລະຫວ່າງແມ່ນໍ້າຮວງ ຫຼື “ແມ່ນໍ້າເຫຼືອງ” ກັບ ແມ່ນໍ້າແຍງຊີ ເຊິ່ງໃນເດືອນນີ້, ລັດຖະບານປັກກິ່ງໄດ້ຍົກສູງການເຕືອນອຸທົກກະໄພຕາມລຽບແຄມແມ່ນໍ້າແຍ່ງຊີເປັນຂັ້ນສູງສຸດ ເນື່ອງຈາກລະດັບນໍ້າຍື່ງຂຶ້ນສູງເປັນສະຖິຕິໃນຮອບຫຼາຍທົດສະຫວັດ ມີຜູ້ສູນຫາຍ ແລະ ເສຍຊີວິດ 140 ຄົນ ແລະ ຫຼາຍກວ່າ 2 ລ້ານຄົນຕ້ອງອົບພະຍົບອອກຈາກທີ່ຢູ່ອາໄສ.