ໂຄວິດ-19 ພາກຊີວິດປະຊາຊົນທົ່ວໂລກຫຼາຍກວ່າ 600.000 ຄົນແລ້ວ

8

ປະຊາຊົນທົ່ວໂລກຫຼາຍກວ່າ 600.000 ຄົນ ເສຍຊີວິດຈາກເຊື້ອໄວຣັສໂຄໂຣນາສາຍພັນໃໝ່ ຕັ້ງແຕ່ທ້າຍປີ ຜ່ານມາ ຂະນະທີ່ ຜູ້ປ່ວຍປະຈຳວັນຫຼ້າສຸດມີ 237.743 ຄົນ ເປັນສະຖິຕິສູງທີ່ສຸດຄັ້ງໃໝ່.

ສຳນັກຂ່າວຕ່າງປະເທດລາຍງານຈາກເມືອງເຈນີວາ ປະເທດສະວິດເຊີແລນ ເມື່ອວັນເສົາ ທີ 18 ກໍລະກົດ ວ່າ ອົງການອະນາໄມໂລກ (WHO) ໄດ້ລາຍງານກ່ຽວກັບສະພາບການຂອງໂຄວິດ-19 ທົ່ວໂລກໃນຮອບ 24 ຊົ່ວໂມງ ຜ່ານມາ ຢືນຢັນຜູ້ຕິດເຊື້ອ 237.743 ຄົນ ເປັນສະຖິຕິປະຈຳວັນສູງສຸດຄັ້ງໃໝ່ ເພິ່ມສະຖິຕິຜູ້ຕິດເຊື້ອສະສົມອີງຕາມລາຍງານຂອງອົງການອະນາໄມໂລກຄາດວ່າ ມີປະມານ 13,6 ລ້ານຄົນ ແລະ ເສຍຊີວິດຢ່າງໜ້ອຍ 585.727 ຄົນ ນັບຕັ້ງແຕ່ໄດ້ຮັບຢືນຢັນການພົບເຊື້ອໄວຣັສດັ່ງກ່າວຢ່າງເປັນທາງການຄັ້ງທຳອິດ ທີ່ເມືອງອູ໋ຮັນ ປະເທດຈີນ ເມື່ອທ້າຍເດືອນທັນວາ ປີຜ່ານມາ.

ທັງນີ້, ພາກພື້ນອາເມຣິກາທີ່ປະກອບດ້ວຍອາເມຣິກາເໜືອ ອາເມຣິກາກາງ ແລະ ທະເລແຄຣິບບ້ຽນ ແລະ ອາເມຣິກາໃຕ້ ຍັງເປັນພື້ນທີ່ວີກິດທີ່ສຸດ ມີຜູ້ຕິດເຊື້ອສະສົມຫຼາຍກວ່າ 7 ລ້ານຄົນ, ຖັດມາແມ່ນທະວີບເອີຣົບ ປະມານ 3 ລ້ານຄົນ, ພາກຕາເວັນອອກຂອງທະເລເມດິເຕີເຣນຽນ 1,34 ລ້ານຄົນ, ອາຊີຕາເວັນອອກສ່ຽງໃຕ້ 1,3 ລ້ານຄົນ, ທະວີບອາຟຣິກາ 543.122 ຄົນ ແລະ ພາກພື້ນປາຊີຟິກຕາເວັນຕົກ 253.495 ຄົນ.

ຂະນະທີ່ ປະເທດເຊິ່ງຜູ້ປ່ວຍ ແລະ ເສຍຊີວິດຫຼາຍທີ່ສຸດຄື ສະຫະລັດ ອາເມຣິກາ ໂດຍອ້າງອີງຈາກສະຖິຕິຂອງມະຫາວິທະຍາໄລຈອນ ຮັອບກິນສ໌ ທີ່ເມືອງບັລຕິມໍ ລັດແມຣີແລນ ຢືນຢັນຜູ້ຕິດເຊື້ອພາຍໃນ 24 ຊົ່ວໂມງຈົນເຖິງ 20:30 ໂມງ ຕາມເວລາທ້ອງຖິ່ນຂອງວັນສຸກ (07:30 ໂມງ ວັນເສົາຂອງປະເທດລາວ) 77.638 ຄົນ ເປັນສະຖິຕິປະຈຳວັນສູງທີ່ສຸດຄັ້ງໃໝ່ ແລະ ເພິ່ມສະຖິຕິຜູ້ປ່ວຍສະສົມໃນອາເມຣິກາ ຢ່າງໜ້ອຍ 3.641.539 ຄົນ ສ່ວນຜູ້ເສຍຊີວິດ ເພິ່ມອີກ 972 ຄົນ ເພິ່ມສະຖິຕິຜູ້ເສຍຊີວິດສະສົມ ຢ່າງໜ້ອຍ 139.128 ຄົນ.

ເຖິງວ່າມະຫາວິທະຍາໄລຈອນ ຮັອບກິນສ໌ ລາຍງານສະຖິຕິຜູ້ເສຍຊີວິດສະສົມທົ່ວໂລກຈາກໂຄວິດ-19 ຫຼາຍກວ່າອົງການອະນາໄມໂລກ ຄືຢ່າງໜ້ອຍ 601.820 ຄົນ ແລະ ຜູ້ປ່ວຍສະສົມ ຢ່າງໜ້ອຍ 14.060.402 ຄົນ. ຢ່າງໃດກໍ່ຕາມ, ອົງການອະນາໄມໂລກ ແລະ ວິທະຍາໄລຈອນຮັອບກິນສ໌ ສະແດງຄວາມກັງວົນໄປໃນທິດທາງດຽວກັນວ່າ ການຕິດເຊື້ອຍັງເປັນອັດຕາວ່ອງໄວ ແລະ ການແຜ່ລະບາດຮອບ 2 ໃນຫຼາຍປະເທດ “ອາດຈະເປັນສິ່ງທີ່ຫຼີກລ່ຽງບໍ່ໄດ້”.