ວິກິດໜັກ! ອາເມຣິກາ ຕິດເຊື້ອໂຄວິດ-19 ມື້ດຽວເກືອບ 70.000 ຄົນ

24

ມະຫາວິທະຍາໄລຈອນ ຮັອບກິນສ໌ຂອງອາເມຣິກາ ລາຍງານສະຖິຕິຜູ້ຕິດເຊື້ອໄວຣັສໂຄໂຣນາສາຍພັນໃໝ່ໃນປະເທດ ເພິ່ມຂຶ້ນ ຫຼາຍກວ່າ 67.000 ຄົນ ພາຍໃນວັນດຽວ ເປັນສະຖິຕິສູງທີ່ສຸດ ໂດຍກຸ່ມຜູ້ປ່ວຍເຄິ່ງໜຶ່ງແມ່ນມາຈາກ 3 ລັດໃຫຍ່ຄື: ລັດເທັກຊັສ, ແຄລິຟໍເນຍ ແລະ ຟຼໍຣິດາ.

ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ສະຫະລັດ ອາເມຣິກາ ເມື່ອວັນພຸດ ທີ 15 ກໍລະກົດ ວ່າ ສູນຂໍ້ມູນການຕິດເຊື້ອໄວຣັສໂຄໂຣນາຂອງມະຫາວິທະຍາໄລຈອນ ຮັອບກິນສ໌ ເມືອງບັລຕິມໍ ລັດແມຣິແລນ ລາຍງານສະຖານະການໂຄວິດ-19 ຂອງອາເມຣິກາ ໃນຮອບ 24 ຊົ່ວໂມງ ຈົນເຖິງເວລາ 20:30 ໂມງ ຕາມເວລາທ້ອງຖິ່ນຂອງ ວັນພຸດ (7:30 ໂມງ ຕາມເວລາປະເທດລາວ) ວ່າ ມີຜູ້ຕິດເຊື້ອ 67.632 ຄົນ ກາຍເປັນສະຖິຕິໃໝ່ ແລະ ເພິ່ມຈຳນວນຜູ້ປ່ວຍສະສົມທົ່ວປະເທດຢ່າງໜ້ອຍ 3.491.936 ຄົນ.

ໃນວັນດຽວກັນ, ໄດ້ຢືນຢັນຜູ້ເສຍຊີວິດຈາກໂຄວິດ-19 ໃນອາເມຣິກາອີກ 845 ຄົນ ເພິ່ມຈຳນວນຜູ້ເສຍຂີວິດເປັນຢ່າງໜ້ອຍ 137.277 ຄົນ ເມື່ອຈຳແນກອອກເປັນແຕ່ລະລັດພົບວ່າ ບັນດາລັດໃຫຍ່ໄດ້ຢືນຢັນຜູ້ປ່ວຍ ແລະ ເສຍຊີວິດ ເປັນສະຖິຕິປະຈຳວັນສູງສຸດຄັ້ງໃໝ່ ໂດຍລັດເທັກຊັສລາຍງານຜູ້ຕິດເຊື້ອ ໃນຮອບ 24 ຊົ່ວໂມງ ຜ່ານມາ 10.791 ຄົນ ແລະ ເສຍຊີວິດ 110 ຄົນ, ລັດແຄລິຟໍເນຍ ຢືນຢັນຜູ້ປ່ວຍໃໝ່ 11.125 ຄົນ ແລະ ເສຍຊີວິດ 140 ຄົນ ແລະ ລັດຟຼໍຣິດາ ຢືນຢັນຜູ້ປ່ວຍໃໝ່ 10.181 ຄົນ. ສົ່ງຜົນໃຫ້ຈຳນວນຜູ້ປ່ວຍສະສົມພາຍໃນລັດກາຍຫຼັກ 300.000 ຄົນ, ສ່ວນຜູ້ເສຍຊີວິດໃນຮອບວັນດຽວ ເພິ່ມອີກ 112 ຄົນ ເພິ່ມຈຳນວນຜູ້ເສຍຊີວິດສະສົມຢ່າງໜ້ອຍ 4.521 ຄົນ.

ທັງນີ້, ທ່ານເກຣັກ ແອັບບອດ ເຈົ້າຄອງລັດເທັກຊັສ ເນັ້ນໜັກໃຫ້ໃສ່ໜ້າກາກ ຫຼື ຜ້າປິດປາກ ເມື່ອຢູ່ສະຖານທີ່ສາທາລະນະ ແລະ ເຕືອນວ່າ ຖ້າບໍ່ໃຫ້ການຮ່ວມມື ທ່ານຈະກັບມາບັງຄັບໃຊ້ມາດຕະການປິດເມືອງ ຫຼັງຈາກທ່ານກາວິນ ນິວຊອມ ເຈົ້າຄອງລັດແຄລິຟໍເນຍ ສັ່ງປິດເມືອງຮອບ 2 ເມື່ອວັນຈັນ ຜ່ານມາ ສ່ວນທ່ານແອນດຣູ ຄູໂອໂມ ເຈົ້າຄອງນະຄອນນິວຢອກ ເພິ່ມຈຳນວນລັດທີ່ຢູ່ໃນກຸ່ມຕ້ອງກັກຕົວ 14 ວັນ ເປັນຢ່າງໜ້ອຍ 22 ລັດ ຖ້າຝ່າຝືນອາດຈະຖືກປັບ ໄໝສູງສຸດ 2.000 ໂດລາ (ປະມານ 18.140.000 ກີບ).