ປະກາດສ້າງຕັ້ງເຂດອະນຸຮັກປ່າໂຄກໂອງ – ມັ່ງແຫ່ງຊາດ

10

ລັດຖະບານ ສປປ ລາວ ຍົກລະດັບເຂດອະນຸຮັກປ່າໂຄກໂອງ – ມັ່ງຈາກຂັ້ນແຂວງ ຂຶ້ນເປັນລະດັບຊາດເປັນທີ່ຮຽບຮ້ອຍ ເພື່ອຍົກລະດັບການຄຸ້ມຄອງ ເຊິ່ງພິທີປະກາດໄດ້ຈັດຂຶ້ນຢ່າງເປັນທາງການໃນວັນທີ 13 ກໍລະກົດ 2020 ທີ່ສູນອະນຸຮັກດັ່ງກ່າວ ເມືອງຊົນນະບູລີ ແຂວງສະຫວັນນະເຂດ ໂດຍການເຂົ້າຮ່ວມຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ທອງເພັດ ວົງມະນີ ຮອງລັດຖະມົນຕີ ກະຊວງກະສິກຳ – ປ່າໄມ້, ທ່ານ ນາງ ຣິຄາດາ ຣິເກີ ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ.

ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້, ກະຊວງກະສິກຳ – ປ່າໄມ້ ໄດ້ລາຍງານປະຫວັດຄວາມເປັນມາ, ການສ້າງຕັ້ງເຂດອະນຸຮັກປ່າໂຄກໂອງ – ມັ່ງແຫ່ງຊາດ ໂດຍສັງເຂບວ່າ: ໃນປີ 2004 ອົງການປົກຄອງແຂວງສະຫວັນນະເຂດ ໄດ້ປະກາດສ້າງຕັ້ງເປັນເຂດອະນຸຮັກໂອງ – ມັ່ງຂອງແຂວງ ເຊິ່ງມີເນື້ອທີ່ທັງໝົດ 93 ພັນເຮັກຕາ ກວມເອົາ 24 ບ້ານ; ຕໍ່ມາໃນປີ 2008 ກອງທຶນອະນຸຮັກສັດປ່າໂລກ ( WWF ) ໄດ້ສະໜັບສະໜູນ. ຮອດປີ 2016 ເຂດດັ່ງກ່າວນີ້ ຈຶ່ງໄດ້ຮັບການສະໜັບສະໜູນທາງດ້ານງົບປະມານຈາກກອງທຶນສິ່ງແວດລ້ອມໂລກ ໂດຍຜ່ານອົງການສະຫະປະຊາຊາດ ເພື່ອການພັດທະນາ ( UNDP ) ສົມທົບກັບທຶນຂອງ UNDP ລວມມູນຄ່າທັງໝົດ 12 ລ້ານກວ່າໂດລາ ແລະ ການປະກອບສ່ວນຂອງລັດຖະບານລາວຈຳນວນໜຶ່ງ ເພື່ອຈັດຕັ້ງປະຕິບັດໂຄງການອະນຸຮັກລະບົບນິເວດປ່າໂຄກໂອງ – ມັ່ງ ໃນໄລຍະເວລາ 6 ປີ ( 2016 – 2022 ) ໄປຄຽງຄູ່ກັບການປັບປຸງຊີວິດການເປັນຢູ່ຂອງປະຊາຊົນບັນດາເຜົ່າຢູ່ບັນດາບ້ານ ( 55 ບ້ານເປົ້າໝາຍ ) ໃນ 5 ເມືອງ ຄື: ຊົນນະບູລີ, ທ່າປາງທອງ, ພີນ, ພະລານໄຊ ແລະ ສອງຄອນຂອງແຂວງສະຫວັນນະເຂດ.

ປັດຈຸບັນຈຳນວນປະຊາກອນໂອງ – ມັ່ງ ທັງໝົດມີປະມານເກືອບ 200 ໂຕ ເຊິ່ງເພີ່ມຂຶ້ນຈາກເມື່ອກ່ອນຫຼາຍເທົ່າໂຕ, ມີພືດຊະນິດຕ່າງໆຫຼາຍກວ່າ 126 ຊະນິດ, ມີນົກທັງໝົດ 278 ຊະນິດ, ສັດລ້ຽງລູກດ້ວຍນົມທັງໝົດ 67 ຊະນິດ, ສັດເລືອຄານ 47 ຊະນິດ, ສັດເຄິ່ງບົກເຄິ່ງນ້ຳ 38 ຊະນິດ ແລະ ປາຫຼາຍກວ່າ 90 ຊະນິດ.

ຍ້ອນເຫັນໄດ້ຄວາມສຳຄັນທາງດ້ານລະບົບນິເວດ ແລະ ຊີວະນາໆພັນຄືແນວນັ້ນ, ລັດຖະບານຈຶ່ງໄດ້ຍົກລະດັບການຄຸ້ມຄອງຈາກເຂດອະນຸຮັກລະດັບແຂວງ ໃຫ້ຂຶ້ນເປັນເຂດອະນຸຮັກປ່າໂຄກໂອງ – ມັ່ງລະດັບຊາດ ຕາມດຳລັດຂອງນາຍົກລັດຖະມົນຕີ ສະບັບເລກທີ 209/ນຍ ລົງວັນທີ 25/3/2020 ເຊິ່ງມີເນື້ອທີ່ທັງໝົດ 130.745 ເຮັກຕາ.

ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ໄດ້ຕາງໜ້າອຳນາດການປົກຄອງແຂວງ ກ່າວສະແດງຄວາມຮູ້ບຸນຄຸນ ແລະ ຂອບໃຈບັນດາການນຳກະຊວງກະສິກຳ – ປ່າໄມ້, ອຳນາດການປົກຄອງເມືອງ, ບ້ານເປົ້າໝາຍ, ນັກທຸລະກິດ, ຜູ້ປະກອບການ ພິເສດແມ່ນບັນດາອົງການຈັດຕັ້ງສາກົນ ໂດຍສະເພາະແມ່ນອົງການ UNDP ທີ່ໄດ້ມີສ່ວນຮ່ວມຢ່າງຕັ້ງໜ້າເຂົ້າໃນຂະບວນການອະນຸຮັກ, ປົກປັກຮັກສາທຳມະຊາດ, ຊັບພະຍາກອນປ່າໄມ້ ແລະ ສັດນ້ຳ – ສັດປ່າ ໂດຍສະເພາະແມ່ນເຂດອະນຸຮັກປ່າໂຄກໂອງ – ມັ່ງແຫ່ງນີ້ ໃຫ້ຍັງຄົງໄວ້ແຫ່ງຄວາມອຸດົມສົມບູນ, ຄວາມຫຼາກຫຼາຍທາງດ້ານຊີວະນາໆພັນ ແລະ ຈົນຮອດເວລານີ້ ຈຶ່ງສາມາດປະກາດເປັນເຂດອະນຸຮັກລະດັບຊາດໄດ້ຢ່າງເປັນທາງການ.

ຈາກນັ້ນ, ໃນພິທີຄະນະ ການນຳຂັ້ນຕ່າງໆກໍໄດ້ຮ່ວມກັນເປີດປ້າຍເຂດອະນຸຮັກປ່າໂຄກໂອງ – ມັ່ງແຫ່ງຊາດ ແລະ ລັ່ນຄ້ອງ 9 ບາດ ເພື່ອເປັນສີລິມຸງຄຸນ ແລະ ເປັນສັນຍະລັກແຫ່ງການປະກາດສ້າງຕັ້ງເຂດອະນຸຮັກແຫ່ງຊາດ. ຫຼັງຈາກນັ້ນ, ຄະນະປະທານ ພ້ອມດ້ວຍແຂກ ກໍໄດ້ຮ່ວມກັນປ່ອຍປາ ແລະ ເຕົ່າ ເນື່ອງໃນວັນປ່ອຍປາ ແລະ ອະນຸຮັກສັດນ້ຳ – ສັດປ່າແຫ່ງຊາດ ທີ່ໜອງສະຂອງເຂດອະນຸຮັກປ່າໂຄກໂອງ – ມັ່ງນຳອີກ.

[ໜັງສືພິມເສດຖະກິດ-ການຄ້າ]