ສະຫະຣາຊອານາຈັກ ແບນຫົວເຫວີ່ຍຈາກໂຄງການພັດທະນາ “5G”

9

ພາຍໃຕ້ຄວາມກົດດັນຢ່າງໜັກຈາກອາເມຣິກາ ລັດຖະບານສະຫະຣາຊອານາຈັກ ອອກຄຳສັ່ງໃຫ້ຜູ້ປະກອບການຢຸດຕິການອຸດໜູນຜະລິດຕະພັນຂອງຫົວເຫວີ່ຍ ທີ່ກ່ຽວຂ້ອງກັບເທັກໂນໂລຢີ 5G ແລະ ຕ້ອງຖອດອຸປະກອນທີ່ຊື້ມາແລ້ວອອກທັງໝົດ ພາຍໃນປີ 2027.

ສຳນັກຂ່າວຕ່າງປະເທດລາຍງານຈາກນະຄອນຫຼວງລອນດອນ ສະຫະຣາຊອານາຈັກ ເມື່ອວັນອັງຄານ ທີ 14 ກໍລະກົດ ວ່າ ທ່ານໂອລິເວີ ດາວເດນ ລັດຖະມົນຕີກະຊວງດິຈິຕອລຂອງສະຫະຣາຊອານາຈັກ ໄດ້ຖະແຫຼງຕໍ່ສະພາສາມັນ ເມື່ອວັນອັງຄານ ວ່າ ນັບແຕ່ວັນທີ 1 ມັງກອນ 2021 ເປັນຕົ້ນໄປ ຜູ້ໃຫ້ບໍລິການອິນເຕີເນັດ ແລະ ເຄືອຂ່າຍໂທລະຄົມມະນາຄົມທຸກແຫ່ງໃນສະຫະຣາຊອານາຈັກແມ່ນບໍ່ສາມາດຊື້ຜະລິດຕະພັນ ແລະ ການບໍລິການທີ່ກ່ຽວຂ້ອງຈາກບໍລິສັດຫົວເຫວີ່ຍ ເທັກໂນໂລຢີຂອງຈີນໄດ້ອີກ.

ຂະນະດຽວກັນ, ບໍລິສັດທຸກແຫ່ງທີ່ໄດ້ຊື້ ແລະ ຕິດຕັ້ງອຸປະກອນຕ່າງໆເພື່ອຮອງຮັບການສື່ສານໃນລະບົບໄຮ້ສາຍ ຍຸກທີ 5 ຫຼື 5G ຂອງຫົວເຫວີ່ຍໄປແລ້ວ ຕ້ອງຖອດຖອນການຕິດເຄື່ອງມືທັງໝົດທີ່ເປັນຂອງບໍລິສັດຫົວເຫວີ່ຍ ພາຍໃນປີ 2027. ທັງນີ້, ທ່ານດາວເດນ ກ່າວວ່າ ນາຍົກລັດຖະມົນຕີບໍຣີສ ຈອນສັນ ໄດ້ຕັດສິນໃຈປະເດັນດັ່ງກ່າວ “ດ້ວຍຄວາມຫຍຸ້ງຍາກ” ແຕ່ “ຈຳເປັນຕ້ອງດຳເນີນການ” ເພື່ອປົກປ້ອງເສດຖະກິດ ແລະ ຄວາມໝັ້ນຄົງພາຍໃນຂອງອັງກິດ “ໃນໄລຍະຍາວ”.

ອີກປະການໜຶ່ງ, ການເຄື່ອນໄຫວຄັ້ງນີ້ຂອງສະຫະຣາຊອານາຈັກ ຖືໄດ້ວ່າເປັນການປ່ຽນແປງຈຸດຢືນ “ແບບກະທັນຫັນ” ເນື່ອງຈາກທ່ານບໍຣິສ ຈອນສັນ ມີຄຳສັ່ງເມື່ອເດືອນມັງກອນ ຜ່ານມາ ແມ່ນອະນຸຍາດໃຫ້ຫົວເຫວີ່ຍສາມາດມີສ່ວນຮ່ວມໃນໂຄງການເຊື່ອມໂຍງເຄືອຂ່າຍ 5 ຈີ ພາຍໃນປະເທດໄດ້ ແຕ່ຕ້ອງເປັນໄປຕາມເງື່ອນໄຂແບບຈຳກັດ ໂດຍໃຫ້ໂກຕ້າພຽງ 35% ແລະ ຫ້າມບໍ່ໃຫ້ບໍລິສັດຈາກຈີນກ່ຽວຂອງກັບໂຄງການວາງລະບົບຫຼັກຂອງເຄືອຂ່າຍ 5G ເຊິ່ງໃນໄລຍະນັ້ນ ທັງລັດຖະບານຈີນ ແລະ ບໍລິສັດຫົວເຫວີ່ຍ “ຂ້ອຍຂ້າງພໍໃຈ” ເຊິ່ງສວນທາງກັບທ່າທີຂອງອາເມຣິກາ ທີ່ຍັງເດີນໜ້າກົດດັນລັດຖະບານສະຫະຣາຊອານາຈັກໃຫ້ເລື່ອງນີ້ ວ່າ ຕ້ອງນຳຫົວເຫວີ່ຍອອກຈາກໂຄງການ 5G “ແບບຖາວອນ”.

ທັງນີ້, ລັດຖະບານວໍຊິງຕັນໄດ້ປະກາດມາດຕະການທາງດ້ານເສດຖະກິດ ເມື່ອເດືອນພຶດສະພາ ຜ່ານມາ ວ່າ ຈະຂວໍ້າບາດຝ່າຍດຽວສຳລັບບໍລິສັດໃດກໍ່ຕາມໃນໂລກ ຖ້າບໍ່ໄດ້ຮັບອະນຸຍາດເປັນລາຍລັກອັກສອນຈາກອາເມຣິກາ ເມື່ອຕ້ອງການສົ່ງອອກເຊມິຄອນດັກເຕີ ທີ່ອອກແບບ ແລະ ຜະລິດໂດຍຫົວເຫວີ່ຍ ໄປຫາບໍລິສັດແຫ່ງອື່ນຂອງຈີນທີ່ເປັນຜູ້ຜະລິດສິນຄ້າ ໂດຍນຳໃຊ້ສິນຄ້າ ຫຼື ຊິ້ນສ່ວນທີ່ຄົ້ນຄິດຈາກອາເມຣິກາ. ເຊັ່ນດຽວກັບ ຜູ້ປະກອບການລາຍໃດກໍ່ຕາມຂອງອາເມຣິກາ ທີ່ຕ້ອງການສົ່ງອອກວັດຖຸດິບສຳລັບຜະລິດເຊມິຄອນດັກເຕີ ແລະ ແບ່ງປັນເທັກໂນໂລຢີການຜະລິດເຊມິຄອນດັກເຕີໃຫ້ແກ່ຫົວເຫວີ່ຍ ຕ້ອງໄດ້ຮັບອະນຸຍາດເປັນລາຍລັກອັກສອນຈາກລັດຖະບານອາເມຣິກາກ່ອນ.