ສາຍການບິນ ແອຣ໌ ຝຣັ່ງ ກຽມເຊົາຈ້າງພະນັກງານ 7.500 ຄົນທົ່ວໂລກ

5

ສາຍການບິນ ແອຣ໌ ຝຣັ່ງ ປະກາດກຽມປົດພະນັກງານ 7.500 ຄົນທົ່ວໂລກ ໃນນັ້ນ 1.000 ຄົນ ຢູ່ໃນເຄືອສາຍການບິນລາຄາຖືກ ເຊິ່ງໄດ້ຮັບຜົນກະທົບຈາກວິກິດການໂຄວິດ-19.

ສຳນັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນເສົາ ທີ 4 ກໍລະກົດ ວ່າ ສາຍການບິນແອຣ໌ ຝຣັ່ງ ເຊິ່ງເປັນສາຍການບິນແຫ່ງຊາດຂອງຝຣັ່ງ ໄດ້ອອກຖະແຫຼງການ ເມື່ອວັນສຸກ ວ່າ: ໃນໄລຍະ 3 ເດືອນຜ່ານມາ ກິດຈະກຳ ແລະ ຜົນປະກອບການໝູນວຽນຂອງບໍລິສັດ ຫຼຸດລົງຫຼາຍເຖິງ 95% ເຊິ່ງໄດ້ຮັບຜົນກະທົບຢ່າງໜັກ ຈາກວິກິດການແຜ່ລະບາດຂອງໂຄວິດ-19 ຍິ່ງໄປກວ່ານັ້ນ “ໃນໄລຍະວິກິດໜັກທີ່ສຸດ” ສາຍການບິນມີລາຍຮັບພຽງ 15 ລ້ານເອີໂຣຕໍ່ມື້ (ປະມານ 152 ຕື້ກີບ) ຖືວ່າໜ້ອຍຫຼາຍ ແລະ ສະຖານະການທີ່ບໍ່ແນ່ນອນເຊັ່ນນີ້ ທາງສາຍການບິນ ແອຣ໌ ຝຣັ່ງ ຄາດການເຖິງການຟື້ນຕົວຂອງອຸດສາຫະກຳການບິນ “ຈະເປັນໄປຢ່າງຫຼ້າຊ້າ”.

ທັງນີ້, ຕະຫຼອດປີ 2022 ສາຍການບິນແອຣ໌ ຝຣັ່ງ ຈະປະຕິບັດແຜນການ “ປະຕິຮູບອົງກອນ” ຄັ້ງໃຫຍ່ ເພື່ອເຮັດໃຫ້ການເຮັດວຽກສອດຄ່ອງກັບສະຖານະການທັງພາຍໃນ ແລະ ພາຍນອກ ໂດຍໃນໄລຍະດັ່ງກ່າວ ພະນັກງານຂອງສາຍການບິນຈະຖືກປົດອອກ ປະມານ 6.500 ຄົນ ຈາກປະມານ 41.000 ຄົນທົ່ວໂລກ ກວມເອົາ 16% ແລະ ອີກປະມານ 1.000 ຄົນ ຈາກຈຳນວນທັງໝົດ 2.400 ຄິດເປັນ 40% ຂອງສາຍການບິນຮັອບ ເຊິ່ງເປັນສາຍການບິນລາຄາຖືກ ໃນເຄືອບໍລິສັດ.

ຢ່າງໃດກໍ່ຕາມ, ການປະກາດດັ່ງກ່າວຂອງສາຍການບິນແອຣ໌ ຝຣັ່ງ ທີ່ເຖິງວ່າຈະມີການຫາລືກັນພາຍໃນລະຫວ່າງຜູ້ບໍລິຫານກັບຜູ້ແທນຂອງສະຫະພາບແຮງງານຫຼາຍແຫ່ງ ແຕ່ກໍ່ຍັງມີການປະທ້ວງຢ່າງຕໍ່ເນື່ອງຈາກພະນັກງານຂອງສາຍການບິນ ເຊິ່ງບໍ່ພໍໃຈທີ່ທາງສາຍການບິນໄດ້ຮັບເງິນຊ່ວຍເຫຼືອ 7.000 ລ້ານເອີໂຣ (ປະມານ 71.190 ຕື້ກີບ ) ຈາກລັດຖະບານຝຣັ່ງ ເມື່ອເດືອນພຶດສະພາ ຜ່ານມາ ແຕ່ເງື່ອນໄຂຕ່າງໆບໍ່ໄດ້ມີການລະບຸວ່າ ຝ່າຍບໍລິຫານຂອງສາຍການບິນຕ້ອງ “ປົກປ້ອງຕຳແໜ່ງວຽກ” ໃຫ້ແກ່ພະນັກງານ.