ອິນເດຍ – ຈີນ ເຫັນດີແກ້ໄຂບັນຫາຂັດແຍ່ງຊາຍແດນໂດຍສັນຕິວິທີ

4

ເຈົ້າໜ້າທີ່ຂັ້ນສູງທາງທະຫານຂອງອິນເດຍ ແລະ ຈີນ ຫາລືກັນໃນເຂດພູຫິມາໄລ ເພື່ອຊອກຫາທາງອອກ ເພື່ອແກ້ໄຂຂໍ້ຂັດແຍ່ງຊາຍແດນ “ໂດຍສັນຕິວິທີ”.

ສຳນັກຂ່າວຕ່າງປະເທດລາຍງານຈາກນະຄອນຫຼວງນິວເດລີ ປະເທດອິນເດຍ ເມື່ອວັນຈັນ ທີ 8 ມິຖຸນາ ວ່າ ກະຊວງການຕ່າງປະເທດອິນເດຍ ໄດ້ຖະແຫຼງການ ເມື່ອວັນຈັນ ວ່າ ເຈົ້າໜ້າທີ່ຂັ້ນສູງທາງທະຫານ ຂອງອິນເດຍ ແລະ ຈີນ ໄດ້ພົບປະຫາລືກັນ ເມື່ອທ້າຍອາທິດ ຜ່ານມາ “ທ່າມກາງບັນຍາກາດທີ່ເປັນມິດ” ທີ່ຖານປະຈຳການຮ່ວມຢູ່ໃຈກາງເຂດລາດັກ ພາກເໜືອສຸດຂອງອິນເດຍ ແລະ ມີຊາຍແດນບາງສ່ວນຕິດກັບຊາຍແດນທາງທິດຕາເວັນຕົກສຽງໃຕ້ຂອງເຂດປົກຄອງຕົນເອງ ຊິນຈຽງອຸຍກູ ຂອງຈີນ.

ລາຍງານຂອງລັດຖະບານອິນເດຍ ກ່າວວ່າ ຜູ້ບັນຊາການທະຫານຂອງທັງສອງປະເທດໄດ້ເຫັນດີວ່າຈະ ດຳເນີນມາດຕະການເພື່ອແກ້ໄຂບັນຫາຂັດແຍ່ງທາງຊາຍແດນໂດຍສັນຕິວິທີ ອິນເດຍ ແລະ ຈີນ ເປັນ ໜຶ່ງໃນປະເທດທີ່ມີຊາຍແດນຕິດກັນຍາວທີ່ສຸດໃນໂລກ ໂດຍວັດແທກມີໄລຍະຍາວ ປະມານ 4000 ກິໂລແມັດ ເຊິ່ງພື້ນທີ່ສ່ວນໃຫຍ່ມີການອ້າງກຳມະສິດທັບຊ້ອນ ແລະ ເປັນທີ່ຮັບຮູ້ກັນທັງສອງຝ່າຍ ວ່າ ຊາຍແດນໃນຂົງເຂດນີ້ ເປັນ “ແລວຄວບຄຸມແທ້ຈິງ (LAC: Line of Actual Control- LAC) ເພື່ອຢຸດຕິສົງຄາມ ເມື່ອປີ 1962 ທີ່ຈີນ ແລະ ອິນເດຍ ໄດ້ຕໍ່ສູ້ກັນເພື່ອຍາດຊີງຂົງເຂດບາງສ່ວນຂອງພູຫິມະໄລ ກ່ອນທີ່ຈະມີການແບ່ງເຂດຢ່າງເປັນທາງການ ເມື່ອປີ 1993.

ທັງນີ້, ຍັງບໍ່ທັນມີການເປີດເຜີຍຢ່າງລະອຽດ ວ່າ ທັງສອງຝ່າຍໄດ້ຫາລືກັນເລື່ອງໃດແດ່ ແລະ ລັດຖະບານປັກກິ່ງກໍ່ປະຕິເສດທີ່ຈະໃຫ້ຄຳເຫັນກ່ຽວກັບການພົບປະກັບອິນເດຍໃນຄັ້ງນີ້. ແຕ່ມີລາຍງານວ່າ ປະເທດອິນເດຍຮຽກຮ້ອງໃຫ້ຈີນຖອນກຳລັງທະຫານທີ່ເສີມເຂົ້າມາໃນບໍລິເວນດັ່ງກ່າວ ເມື່ອເດືອນເມສາ ຜ່ານມາ ແລະ ຮື້ຖອນສິ່ງປຸກສ້າງທີ່ບໍ່ຈຳເປັນ ຂະນະທີ່ ອິນເດຍຈະສືບຕໍ່ການກໍ່ສ້າງພາຍໃນເຂດແດນຂອງຕົນ.