ຟີລິບປິນມີຜູ້ເສຍຊີວິດຈາກ ໂຄວິດ-19 ເກີນ 1.000 ຄົນ

2

ຈຳນວນຜູ້ເສຍຊີວິດສະສົມຈາກໂຄວິດ-19 ໃນປະເທດຟີລິບປິນ ເພິ່ມຂຶ້ນເປັນຫຼາຍກວ່າ 1.000 ຄົນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງມະນີລາ ປະເທດຟີລິບປິນ ເມື່ອວັນຈັນ ທີ 8 ມິຖຸນາ ວ່າ ກະຊວງສາທາລະນະສຸກຟີລິບປິນ ຖະແຫຼງການ ເມື່ອວັນອາທິດ ເປັນລາຍງານສະພາບການປະຈຳວັນກ່ຽວກັບພະຍາດໂຄວິດ-19 ພາຍໃນປະເທດ ວ່າ ຈຳນວນຜູ້ປ່ວຍສະສົມເພິ່ມຂຶ້ນຢ່າງໜ້ອຍ 21.895 ຄົນ ຫຼັງຈາກໄດ້ຮັບການຢືນຢັນວ່າມີຜູ້ປ່ວຍໃໝ່ອີກ 555 ຄົນ ໂດຍຍັງເຫຼືອຜູ້ປ່ວຍໃນລະບົບ 16.362 ຄົນ ໃນນີ້ 82 ຄົນ ອາການຮ້າຍແຮງ.

ຂະນະທີ່ ຈຳນວນຜູ້ເສຍຊີວິດສະສົມ ເພິ່ມຂຶ້ນເປັນ 1.003 ຄົນ ຫຼັງຈາກຢືນຢັນຜູ້ເສຍຊີວິດອີກ 9 ຄົນ. ທັງນີ້, ຟີລິບປິນ ເປັນ 1 ໃນ 3 ປະເທດໃນອາຊຽນ ທີ່ມີຜູ້ປ່ວຍສະສົມຈາກໂຄວິດ-19 ຫຼາຍກວ່າ 10.000 ຄົນ ຮອງຈາກສິງກະໂປ ແລະ ອິນໂດເນເຊຍ ແລະ ເປັນ 1 ໃນ 2 ປະເທດທີ່ມີຜູ້ເສຍຊີວິດຈາກພະຍາດດັ່ງກ່າວຫຼາຍກວ່າ 1.000 ຄົນ ເຊິ່ງ ອິນໂດເນເຊຍເປັນປະເທດທີ່ມີຜູ້ເສຍຊີວິດຈາກພະຍາດດັ່ງກ່າວຫຼາຍທີ່ສຸດໃນພາກພື້ນອາຊຽນ ຄື 1.851 ຄົນ.

ປະທານາທິບໍດີໂຣດຣິໂກ ດູເຕເຕ ຜູ້ນຳຟີລິບປິນ ບັງຄັບໃຊ້ມາດຕະການປິດເມືອງຕັ້ງແຕ່ວັນທີ 15 ມີນາ ຜ່ານມາ ໂດຍເລິ່ມຕົ້ນຈາກນະຄອນຫຼວງມະນີລາກ່ອນ ແລະ ຂະຫຍາຍຂອບເຂດເປັນທົ່ວປະເທດ ຫຼັງຈາກນັ້ນ ໄດ້ເລິ່ມຜ່ອນຄາຍມາດຕະການບາງຂໍ້ ຕັ້ງແຕ່ວັນທີ 1 ມິຖຸນາ ທີ່ຜ່ານມາ.