ປະເທດບຣາຊິລ ມີຜູ້ເສຍຊີວິດຈາກໂຄວິດ-19 ເພິ່ມຂຶ້ນເປັນອັນດັບ 3 ຂອງໂລກ

14

ລັດຖະບານບຣາຊິລ ຢືນຢັນສະຖິຕິຜູ້ເສຍຊີວິດຈາກໂຄວິດ-19 ໃນປະເທດເພິ່ມຂຶ້ນຫຼາຍກວ່າ 34.000 ຄົນ ແຊງໜ້າປະເທດອິຕາລີ ຂຶ້ນໄປຢູ່ອັນດັບ 3 ຂອງໂລກ ຂະນະທີ່ ມີຄວາມກັງວົນກ່ຽວກັບການຕິດເຊື້ອເພິ່ມຂຶ້ນໃນກຸ່ມຊົນເຜົ່າພື້ນເມືອງ.

ສຳນັກຂ່າວຕ່າງປະເທດລາຍງານຈາກນະຄອນຫຼວງບຣາຊິເລຍ ປະເທດບຣາຊິລ ເມື່ອວັນພະຫັດ ທີ 4 ມິຖຸນາ ວ່າ ກະຊວງສາທາລະນະສຸກບຣາຊິລ ຖະແຫຼງການ ເມື່ອວັນພະຫັດ ລາຍງານສະຖານະການປະ ຈຳວັນຂອງໂຄວິດ-19 ໃນປະເທດ ວ່າ ຈຳນວນຜູ້ປ່ວຍສະສົມເພິ່ມເປັນຢ່າງໜ້ອຍ 614.941 ຄົນ ຫຼັງຈາກໄດ້ຢືນຢັນກວດພົບຜູ້ປ່ວຍໃໝ່ ໃນຮອບໜຶ່ງວັນ ຜ່ານມາ ອີກ 30.925 ຄົນ ໂດຍຜູ້ປ່ວສະສົມຈາກໂຄວິດ-19 ໃນປະເທດບຣາຊິລ ມີຈຳນວນຫຼາຍທີ່ສຸດເປັນອັນດັບ 2 ຂອງໂລກຮອງຈາກສະຫະລັດ.

ຂະນະທີ່ ໃນວັນດຽວກັນ ໄດ້ຢືນຢັນຜູ້ເສຍຊີວິດຕື່ມອີກ 1.437 ຄົນ ພາຍໃນໄລຍະພຽງ 24 ຊົ່ວໂມງ ເພິ່ມສະຖິຕິຜູ້ເສຍຊີວິດສະສົມຈາກໂຄວິດ-19 ໃນປະເທດບຣາຊິລ ຢ່າງໜ້ອຍ 34.021 ຄົນ ແຊງໜ້າປະເທດອິຕາລີ ຂຶ້ນເປັນອັນດັບ 3 ຂອງໂລກ ຮອງຈາກສະຫະລັດ ອາເມຣິກາ ທີ່ມີຜູ້ເສຍຊີວິດ ປະມານ 110.000 ຄົນ ແລະ ອັງກິດ ມີຜູ້ເສຍຊີວິດສະສົມເກືອບ 40.000 ຄົນ.

ອີງຕາມຂໍ້ມູນຈາກສະມາຄົມນັກຂ່າວກຸ່ມຄົນພື້ນເມືອງຂອງປະເທດບຣາຊິລ (APIB: Articulation of Indigenous Peoples of Brazil) ເຊິ່ງເຮັດໜ້າທີ່ເປັນ “ຜູ້ແທນ” ໃຫ້ກັບກຸ່ມຊົນເຜົ່າໃນບຣາຊິລ ຫຼາຍກວ່າ 305 ຊົນເຜົ່າ ລະບຸວ່າ ອັດຕາການເສຍຊີວິດຈາກໂຄວິດ-19 ເພິ່ມຂຶ້ນຢ່າງຫຼວງຫຼາຍໃນກຸ່ມຊົນເຜົ່າພື້ນເມືອງ ໂດຍສະຖິຕິຈົນເຖິງວັນທີ 1 ມິຖຸນາ ມີຢ່າງນ້ອຍ 128 ຄົນ ເພິ່ມຂຶ້ນຈາກພຽງ 18 ຄົນ ເມື່ອທ້າຍເດືອນເມສາ ຜ່ານມາ ໃນຂະນະດຽວກັນ ອົງການອະນາໄມແພນອາເມຣິກາ (PAHO: Pan American Health Organization) ກໍ່ສະແດງຄວາມເປັນຫ່ວງກ່ຽວກັບເລື່ອງນີ້ເຊັ່ນກັນ ແຕ່ລັດຖະບານຂອງປະທານາທິບໍດີຊາອີ ໂບລໂຊນາໂຣ ຍັງສະຫງວນທ່າທີ.