ຄະນະລັດຖະບານເຢຍລະມັນ ອະນຸມັດງົບກວ່າ 88 ພັນຕື້ກີບ ຊ່ວຍເຫຼືອສາຍການບິນລຸຟຮັນຊາ

13

ໃນກອງປະຊຸມຄະນະລັດຖະບານເຢຍລະມັນມີມະຕິອະນຸມັດ “ມາດຕະການຊ່ວຍເຫຼືອຊົ່ວຄາວ” ມູນຄ່າ 9.000 ລ້ານເອີໂຣ ໃຫ້ແກ່ ສາຍການບິນລຸຟຮັນຊາ ເຊິ່ງຈະໃຫ້ພາກລັດຖະບານມີສ່ວນຮ່ວມບໍລິຫານທຸລະກິດສາຍການບິນແຫ່ງຊາດ ເປັນຄັ້ງທຳອິດ ໃນຮອບ 20 ປີ.

ສຳນັກຂ່າວຕ່າງປະເທດລາຍງານຈາກນະຄອນຫຼວງເບີລິນ ປະເທດເຢຍລະມັນ ເມື່ອວັນອັງຄານ ທີ 26 ພຶດສະພາ ວ່າ ທ່ານເພເທີ ອັລໄມເອີ (Peter Altmaier) ລັດຖະມົນຕີກະຊວງເສດຖະກິດເຢຍລະມັນ ຖະແຫຼງເມື່ອວັນຈັນ ຜ່ານມາ ວ່າ ໃນກອງປະຊຸມຄະນະລັດຖະບານມີມະຕິຮັບຮອງ “ມາດຕະການຊ່ວຍເຫຼືອຊົ່ວຄາວ” ໃຫ້ແກ່ບໍລິສັດລຸຟຮັນຊາ ເຊິ່ງເປັນສາຍການບິນແຫ່ງຊາດ ໃນງົບປະມານສູງສຸດ 9.000 ລ້ານເອີໂຣ (ປະມານ 88.260 ຕື້ກີບ) ເປັນຄັ້ງທຳອິດໃນຮອບ 20 ປີ ທີ່ລັດຖະບານເຂົ້າໄປມີສ່ວນຮ່ວມບໍລິຫານທຸລະກິດຂອງ ລຸຟຮັນຊາ ເຊິ່ງຢຸດຕິບົດບາດຖານະລັດວິສາຫະກິດ ເມື່ອປີ 1997.

ທ່ານເພເທີ ອັລໄມເອີ  ລັດຖະມົນຕີກະຊວງເສດຖະກິດເຢຍລະມັນ (German Economy Minister Peter Altmaier)

ເນື້ອໃນສຳຄັນຂອງຂໍ້ຕົກລົງບໍ່ແຕກຕ່າງຈາກສື່ມວນຊົນທ້ອງຖິ່ນຫຼາຍແຫ່ງລາຍງານກ່ອນໜ້ານີ້ ແລະ ເປັນໄປຕາມຂໍ້ມູນເບື້ອງຕົ້ນໃນຖະແຫຼງການທີ່ ລຸຟຮັນຊາ ໄດ້ເຜີຍແຜ່ເມື່ອອາທິດ ຜ່ານມາ ຄືລັດຖະບານເຢຍລະມັນຈະຖືຮຸ້ນ 20% ແລະ ລັດຖະບານຈະຂາຍຫຸ້ນທັງໝົດພາຍໃນທ້າຍປີ 2023 ແຕ່ສັດສ່ວນອາດຈະເພິ່ມຂຶ້ນເປັນ 25% ບວກອີກ 1 ຮຸ້ນ ເຊິ່ງຈະເພິ່ມບົດບາດໃຫ້ລັດຖະບານໃນຖານະ “ຜູ້ຖືຫຸ້ນສ່ວນສຽງຂ້າງນ້ອຍ” ຖ້າເກີດກໍລະນີທີ່ລັດຖະບານ ຫຼື ບໍລິສັດຕ່າງປະເທດພະຍາຍາມເຂົ້າມາຄອບຄອງທຸລະກິດຂອງລຸຟຮັນຊາ.

ທັງນີ້, ການຊື້ຮຸ້ນຂອງລັດຖະບານ ມີມູນຄ່າ 2,56 ເອີໂຣຕໍ່ຮຸ້ນ (ປະມານ 25.980 ກີບ) ລວມມູນຄ່າທັງໝົດ 300 ລ້ານເອີໂຣ (ປະມານ 2.940 ຕື້ກີບ). ຂະນະດຽວກັນ, ລັດຖະບານເຢຍລະມັນຈະອະນຸມັດສິນເຊື່ອດອກເບ້ຍຕໍ່າໃຫ້ແກ້ລຸຟຮັນຊາ ອີກ 3.000 ລ້ານເອີໂຣ (ປະມານ 29.400 ຕື້ກີບ) ແຕ່ສິນເຊື່ອດັ່ງກ່າວຈະມີເງື່ອນໄຂໃຫ້ລັດຖະບານຕ້ອງມີໂຄຕ້າ 2 ບ່ອນນັ່ງ ໃນຄະນະບໍລິຫານ ເຊິ່ງທ່ານອັລໄມເອີ ຢືນຢັນວ່າ 2 ບ່ອນນັ່ງຈະບໍ່ແມ່ນບຸກຄົນທີ່ມາຈາກລັດຖະບານ ແລະ ນັກການເມືອງ “ສ່ວນຂໍ້ປະຕິບັດອື່ນໆທີ່ສຳຄັນລວມທັງການຫຼຸດຄ່າຕອບແທນຂອງຝ່າຍບໍລິຫານ ແລະ ຫຼຸດການຈ່າຍເງິນປັນຜົນ.

ທ່ານອັລໄມເອີ ຢືນຢັນການຊ່ວຍເຫຼືອຂອງພາກລັດຕໍ່ລຸຟຮັນຊາ “ບໍ່ແມ່ນການສ້າງອິດທິພົນ” ແຕ່ອີກດ້ານໜຶ່ງລັດຖະບານເຢຍລະມັນເບິ່ງເຫັນວ່າ ລຸຟຮັນຊາ ເປັນໜຶ່ງໃນບັນດາບໍລິສັດເອກະຊົນທີ່ປະສົບຄວາມສຳເລັດ ແລະ ເຊື່ອໝັ້ນວ່າ ຕ້ອງຢູ່ພາຍໃຕ້ການຊີ້ນຳຂອງພາກເອກະຊົນດ້ວຍກັນ.

ຢ່າງໃດກໍ່ຕາມ, ລັດຖະບານເຢຍລະມັນຈະຖືຮຸ້ນ ມູນຄ່າປະມານ 5.700 ລ້ານເອີໂຣ (ປະມານ 55.900 ຕື້ກີບ) ເຊິ່ງລຸຟຮັນຊາຕ້ອງຊຳລະຄືນພ້ອມດອກເບ້ຍ ພາຍໃນວັນທີ 31 ທັນວາ ປີ 2023 ເຖິງວ່າມາດຕະການທັງໝົດຈຳເປັນຕ້ອງຜ່ານຄວາມເຫັນຊອບຈາກຄະນະກໍາມາທິການເອີຣົບ ແຕ່ທຸກຝ່າຍເຊື່ອວ່າການພິຈາລະນາລຸລ່ວງ.