ສປປ ລາວ ບໍ່ພົບຜູ້ຕິດເຊື້ອໂຄວິດ-19 ໃໝ່ 39 ວັນຕິດຕໍ່ກັນ

19

ສປປ ລາວ ບໍ່ພົບຜູ້ຕິດເຊື້ອໃໝ່ 39 ວັນຕິດຕໍ່ກັນແລ້ວ ຂະນະທີ່ ໄດ້ເກັບຕົວຢ່າງ 2 ໃນ 5 ຜູ້ປ່ວຍທີ່ປິ່ນປົວຢູ່ໂຮງໝໍມາກວດຄືນ ແຕ່ຜົນຍັງເປັນບວກ ຕ້ອງນອນພັກຟື້ນຕິດຕາມອາການຕໍ່ໄປ.

ກະຊວງສາທາລະນະສຸກ ຖະແຫຼງການເມື່ອ ວັນພະຫັດ ທີ 21 ພຶດສະພາ 2020 ໂດຍທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ແລະ ຜູ້ປະຈຳການຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ລາຍງານກ່ຽວກັບສະພາບການລະບາດຂອງພະຍາດໂຄວິດ-19 ໃນ ສປປ ລາວ ວ່າ ເມື່ອວັນທີ 20 ພຶດສະພາ ຜ່ານມາ ໄດ້ເກັບຕົວຢ່າງມາກວດທັງໝົດ 69 ຄົນ, ໃນນັ້ນ ແຮງງານລາວທີ່ກັບມາແຕ່ໄທ 60 ຄົນ, ກໍລະນີສົງໄສ 7 ຄົນ ແລະ ຜູ້ຕິດເຊື້ອນອນປິ່ນປົວຢູ່ໂຮງໝໍມິດຕະພາບ 2 ຄົນ.

ທັງນີ້, ຜົນກວດກໍລະນີສົງໄສ ແລະ ແຮງງານລາວມື້ວານນີ້ ບໍ່ພົບເຊື້ອ ແຕ່ເດືອນມັງກອນ ເຖິງ ວັນທີ 20 ພຶດສະພາ ຜ່ານມາ ໄດ້ເກັບຕົວຢ່າງມາກວດທັງໝົດ 4.812 ຕົວຢ່າງ, ກວດພົບຜູ້ຕິດເຊື້ອສະສົມ 19 ຄົນ.

ສ່ວນການກວດວິເຄາະຫາເຊື້ອຄືນຜູ້ຕິດເຊື້ອໂຄວິດ-19 ທີ່ນອນປິ່ນປົວຢູ່ໂຮງໝໍມິດຕະພາບ 2 ຄົນ ຜົນກວດຍັງເປັນບວກ ແລະ ຈະສືບຕໍ່ຕິດຕາມອາກາດຕໍ່ໄປ. ປັດຈຸບັນນີ້ ໃນ ສປປ ລາວ ມີຜູ້ຕິດເຊື້ອໂຄວິດ-19 ສະສົມ 19 ຄົນ ປິ່ນປົວຫາຍດີແລ້ວ 14 ຄົນ ແລະ ຍັງປິ່ນປົວຢູ່ໂຮງໝໍມິດຕະພາບ 5 ຄົນທັງໝົດມີອາການປົກກະຕິ.