ລັດຖະບານເຢຍລະມັນ ກຽມແຜນງົບກວ່າ 80.000 ຕື້ກີບ ຊ່ວຍເຫຼືອສາຍການບິນແຫ່ງຊາດ “ລຸຟຮັນຊາ”

6

ລັດຖະບານເຢຍລະມັນ ແລະ ລຸຟຮັນຊາ ກຳລັງເຈລະຈາຂັ້ນທ້າຍ ກ່ຽວກັບແຜນຊ່ວຍເຫຼືອທຸລະກິດຂອງສາຍການບິນແຫ່ງຊາດ ດ້ວຍງົບປະມານ ກວ່າ 80.000 ຕື້ກີບ

ສຳນັກຂ່າວຕ່າງປະເທດລາຍງານຈາກນະຄອນຫຼວງເບີລິນ ປະເທດເຢຍລະມັນ ເມື່ອວັນພະຫັດ ທີ 21 ພຶດສະພາ ວ່າ ລຸຟຮັນຊາ ຖະແຫຼງການ ເມື່ອວັນພຸດ ວ່າ ກຳລັງຢູ່ລະຫວ່າງ “ການຫາລືຂັ້ນສຸດທ້າຍ” ກັບລັດຖະບານເຢຍລະມັນ ກ່ຽວກັບມາດຕະການ “ສ້າງສະຖຽນລະພາບ” ເຊິ່ງຕ້ອງໃຊ້ງົບປະມານ 9.000 ລ້ານເອີໂຣ (ປະມານ 88.620 ຕື້ກີບ) ຈາກຈຳນວນດັ່ງກ່າວ ຢ່າງໜ້ອຍ 3.000 ລ້ານເອີໂຣ (ປະມານ 29.540 ຕື້ກີບ) ຈະຂໍຄວາມຊ່ວຍເຫຼືອໃນຮູບແບບເງິນກູ້ຈາກທະນາຄານເພື່ອການຟື້ນຟູ (KFW) ເຊິ່ງເປັນສະຖາບັນການເງິນທີ່ເປັນລັດວິສາຫະກິດ.

ຂະນະທີ່ໜັງສືພິມທຸລະກິດ ” Handelsblatt ” ລາຍງານຕື່ມວ່າ ໂຄງການຊ່ວຍເຫຼືອສາຍການບິນແຫ່ງຊາດ “ລຸຟຮັນຊາ” ແບ່ງອອກເປັນ 3 ຂັ້ນ ໂດຍນອກຈາກເງິນຊ່ວຍເຫຼືອແລ້ວ ລັດຖະບານເຢຍລະມັນຈະເປັນຜູ້ຖືຮຸ້ນຂອງສາຍການບິນສັດສ່ວນ 25% ໂດຍ 5% ເປັນຮຸ້ນກູ້ປ່ຽນສະພາບ ແລະ ລັດຖະບານມີໂຄຕາ ຢ່າງໜ້ອຍ 2 ບ່ອນນັ່ງໃນຄະນະບໍລິຫານ “ແຕ່ຈະບໍ່ແມ່ນບຸກຄົນທີ່ມາຈາກລັດຖະບານ ແລະ ນັກການເມືອງ” ໂດຍເມື່ອໃດກໍ່ຕາມທີ່ຄະນະລັດຖະມົນຕີຂອງນາຍົກລັດຖະມົນຕີທ່ານນາງອັງເກລາ ແມເຄິລ ອະນຸມັດແຜນການດັ່ງກ່າວ ສາຍການບິນລຸຟຮັນຊາຕ້ອງຮັບຮອງແຜນການດຽວກັນພາຍໃນ 48 ຊົ່ວໂມງ.

ໃນຫຼາຍປີ ຜ່ານມາ ຂົ້ວການເມືອງຝ່າຍທີ່ເປັນພັນທະມິດກັບນັກລົງທຶນໄດ້ຄັດຄ້ານຢ່າງໜັກ ກັບແນວຄິດທີ່ໃຫ້ລັດຖະບານເຢຍລະມັນເຂົ້າໄປມີສ່ວນຮ່ວມບໍລິຫານໂດຍກົງກັບທຸລະກິດສາຍການບິນລຸຟຮັນຊາອີກຄັ້ງ ເຊິ່ງໄດ້ຢຸດຕິບົດບາດການເປັນລັດວິສາຫະກິດ ເມື່ອປີ 1997 ໂດຍມີຄຳຄິດເຫັນວ່າ ຕ້ອງໃຫ້ພາກເອກະຊົນບໍລິຫານແກ້ໄຂກັນເອງ.

ຢ່າງໃດກໍ່ຕາມ, ພັກສັງຄົມປະຊາທິປະໄຕ (SPD) ເປັນພັກການເມືອງອັນດັບ 2 ແລະ ເປັນຕົວປ່ຽນສຳຄັນຂອງລັດຖະບານປະສົມເຢຍລະມັນ ທີ່ຕ້ອງການໃຫ້ລັດຖະບານເຂົ້າໄປມີສ່ວນຮ່ວມກັບທຸລະກິດຂອງລຸຟຮັນຊາຫຼາຍຂຶ້ນ ເພື່ອວາງຮາກຖານອິດທິພົນຂອງລັດຖະບານເບີລິນສຳລັບການປັບປ່ຽນນະໂຍບາຍໃນອະນາຄົດຂອງສາຍການບິນ ທັງເລື່ອງພະນັກງານ ແລະ ການຮັກສາສິ່ງແວດລ້ອມໃຫ້ສອດຄ່ອງກັບແນວທາງຂອງສະຫະພາບເອີຣົບ (EU) ນອກເໜືອຈາກການຮັກສາທຸລະກິດຂອງສາຍການບິນແຫ່ງຊາດໃຫ້ຜ່ານພົ້ນວິກິດການແຜ່ລະບາດໂຄວິດ-19 ທີ່ສ້າງຜົນກະທົບໃຫ້ອຸດສາຫະກຳການບິນທົ່ວໂລກຢ່າງໜັກ.