ອິນເດຍ-ບັງກລາເທດ ເສຍຊີວິດ 14 ຄົນ ຈາກອິດທິພົນຂອງພາຍຸໄຊໂຄຼນອຳພັນ

6

ປະເທດອິນເດຍ ແລະ ບັງກລາເທດລາຍງານ ມີຜູ້ເສຍຊີວິດລວມກັນຢ່າງໜ້ອຍ 14 ຄົນ ຈາກອິດທິພົນຮ້າຍແຮງຂອງຊຸບເປີໄຊໂຄຼນ “ອຳພັນ” ຫົວທຳອິດ ໃນຮອບ 21 ປີ ເຊິ່ງກໍ່ໂຕຂຶ້ນໃນມະຫາສະໝຸດ ອິນເດຍ.

ສຳນັກຂ່າວຕ່າງປະເທດລາຍງານຈາກນະຄອນຫຼວງນິວເດລີ ເມື່ອວັນພະຫັດ ທີ 21 ພຶດສະພາ ວ່າ ສຳນັກງານອຸຕຸນິຍົມວິທະຍາແຫ່ງຊາດອິນເດຍ ລາຍງານວ່າ ພາຍຸໄຊໂຄຼນອຳພັນ ເຊິ່ງມີຄວາມໄວລົມສູງສຸດໃກ້ສູນກາງ 190 ກິໂລແມັດຕໍ່ຊົ່ວໂມງ ທຽບເທົ່າກັບຄວາມຮຸນແຮງຂອງພາຍຸເຮີຣິເຄນ ລະດັບ 3 ຕາມມາດຕາວັດແທກພາຍຸ ຊັຟເຟີ-ຊິມສັນ (Saffir–Simpson hurricane wind scale (SSHWS)) ເຄື່ອນທີ່ຈາກອ່າວເບງກອລ ໃນມະຫາສະໝຸດອິນເດຍ ເຂົ້າສູ່ແຜ່ນດິນໃຫຍ່ລັດເບງກອລຕາເວັນຕົກ ເມື່ອແລງວັນພຸດ ຜ່ານມາຕາມເວລາທ້ອງຖິ່ນ.

ອິດທິພົນຂອງພາຍຸສົ່ງຜົນໃຫ້ເກີດລົມແຮງຝົນຟ້າຄະນອງເປັນວົງກວ້າງ ມີລາຍງານນໍ້າຖ້ວມກະທັນຫັນ ແລະ ດິນເຈື່ອນຫຼາຍພື້ນທີ່ ຂະນະທີ່ ຄາດການປະລິມານນຳຝົນສະສົມ ໃນຮອບ 24 ຊົ່ວໂມງ ອາດສູງເຖິງ 300 ມິນລີແມັດ ແລະ ມີຄຳເຕືອນຂອງຄື້ນພາຍຸພັດຂຶ້ນຝັ່ງ ເຊິ່ງອາດຈະເຮັດໃຫ້ນ້ຳທະເລໄຫຼເຂົ້າຖ້ວມພື້ນທີ່ຫ່າງຈາກຊາຍຝັ່ງ 25 ກິໂລແມັດ.

ທ່ານນາງມາມາດາ ບາເນີຈີ ເຈົ້າຄອງລັດເບງກອລຕາເວັນຕົກ ກ່າວວ່າ ໄດ້ຮັບລາຍງານວ່າມີຜູ້ເສຍຊີວິດໃນລັດແລ້ວ 10 ຄົນ ເຖິງວ່າໄດ້ອົບພະຍົບປະຊາຊົນແລ້ວ 500.000 ຄົນ ແຕ່ການປະເມີນຄວາມເສຍຫາຍຍັງບໍ່ສາມາດດຳເນີນການໄດ້ ເນື້ອງຈາກພື້ນທີ່ປະສົບໄພຫຼາຍແຫ່ງມີນ້ຳຖ້ວມເລິກບໍ່ສາມາດເຂົ້າເຖິງໄດ້. ນອກຈາກນີ້, ທຸກຝ່າຍຍັງມີຄວາມກັງວົນວ່າ ຂອບເຂດຄວາມເສຍຫາຍຫຼວງຫຼາຍກວ່າການປະເມີນດ້ວຍສາຍຕາ ເພາະວ່າຂະນະດຽວກັນຍັງຕ້ອງຕໍ່ສູ້ກັບວິກິດການແຜ່ລະບາດໂຄວິດ-19 ດ້ວຍ.

ຂະນະທີ່ ປະເທດບັງກລາເທດ ລາຍງານ ຜູ້ເສຍຊີວິດຢ່າງໜ້ອຍ 4 ຄົນ, ອົບພະຍົບປະຊາຊົນແລ້ວ ປະມານ 2,4 ລ້ານຄົນ, ກຽມທີ່ພັກອາໄສຊົ່ວຄາວຫຼາຍກວ່າ 15.000 ແຫ່ງ ພ້ອມທັງການເລັ່ງອົບພະຍົບຜູ້ລີ້ໄພຊາວໂຣຮິນຈາຈຳນວນໜຶ່ງອອກຈາກຄ້າຍ ໃນເມືອງຄັອກ ບາຊາ ເຊິ່ງເປັນພື້ນທີ່ຮາບລຸ່ມ ຂຶ້ນໄປຢູ່ບ່ອນສູງກ່ອນ ທ່າມກາງຄວາມກັງວົນກ່ຽວກັບການແຜ່ລະບາດໂຄວິດ-19 ເຊັ່ນກັນ ໂດຍມີການຢືນຢັນຜູ້ປ່ວຍໃນກຸ່ມຜູ້ລີ້ໄພຊາວໂຣຮິນຈາແລ້ວ 10 ຄົນ ແຕ່ທຸກຝ່າຍເຊື່ອວ່າ “ຍັງມີອີກຫຼາຍ”.

ສຳລັບພາຍຸໄຊໂຄຼນ ອຳພັນ ຖືວ່າເປັນພາຍຸຫົວທຳອິດໃນປີນີ້ ທີ່ກໍ່ໂຕຂຶ້ນໃນມະຫາສະໝຸດອິນເດຍ ແລະ ເປັນຊຸບເປີໄຊໂຄຼນ ຫົວທຳອິດໃນຮອບ 21 ປີ ຕໍ່ຈາກຊຸບເປີໄຊໂຄຼນ “ໂອຣິສາ” ເມື່ອທ້າຍເດືອນຕຸລາ ປີ 1999 ເຊິ່ງສ້າງຄວາມເສຍຫາຍໃຫ້ແກ່ອິນເດຍ, ບັງກລາເທດ, ມຽນມາ ແລະ ໄທ ເຮັດໃຫ້ມີຜູ້ເສຍຊີວິດລວມກັນ ເກືອບ 10.000 ຄົນ.