ອິນເດຍມີຜູ້ປ່ວຍໂຄວິດ-19 ຫຼາຍກວ່າ 100.000 ຄົນ ເສຍຊີວິດ ກວ່າ 3.000 ຄົນ

9

ປະເທດອິນເດຍມີຜູ້ຕິດເຊື້ອໂຄວິດ-19 ສະສົມຫຼາຍກວ່າ 100.000 ຄົນ ໃນນັ້ນເສຍຊີວິດຫຼາຍກວ່າ 3.000 ຄົນ ຂະນະທີ່ລັດຖະບານຂະຫຍາຍເວລາບັງຄັບໃຊ້ມາດຕະການປິດເມືອງຈົນໝົດເດືອນພຶດສະພານີ້.

ສຳນັກຂ່າວຕ່າງປະເທດລາຍງານຈາກນະຄອນຫຼວງນິວເດລີ ປະເທດອິນເດຍ ເມື່ອວັນອັງຄານ ທີ 19 ພຶດສະພາ ວ່າ ກະຊວງສາທາລະນະສຸກອິນເດຍ ອອກຖະແຫຼງການ ເມື່ອວັນອັງຄານ ລາຍງານສະຖານະການໂຄວິດ-19 ໃນປະເທດ ວ່າ ມີຜູ້ເສຍຊີວິດສະສົມ ຢ່າງໜ້ອຍ 3.163 ຄົນ ຫຼັງຈາກໄດ້ຢືນຢັນຜູ້ເສຍຊີວິດເພິ່ມອີກ 7 ຄົນ ໃນຮອບ 24 ຊົ່ວໂມງ ຜ່ານມາ.

ຂະນະທີ່ ຜູ້ຕິດເຊື້ອສະສົມມີຢ່າງໜ້ອຍ 101.139 ຄົນ ເພິ່ມຂຶ້ນ 811 ຄົນ ແລະ ປິ່ນປົວເຊົາແລ້ວ 39.223 ຄົນ. ອິນເດຍກາຍເປັນໜຶ່ງໃນ 11 ປະເທດ ທີ່ມີຜູ້ປ່ວຍສະສົມຈາກໂຄວິດ-19 ຫຼາຍກວ່າ 100.000 ຄົນ ໂດຍສະຖິຕິຜູ້ຕິດເຊື້ອປະຈຳວັນ ສະເລ່ຍປະມານ 4.000 ຄົນ.

ທັງນີ້, ນາຍົກລັດຖະມົນຕີນະເຣນທຣາ ໂມດີ ຜູ້ນຳອິນເດຍ ຫາກໍ່ປະກາດ ເມື່ອວັນອາທິດ ຜ່ານມາ ຂະຫຍາຍໄລຍະບັງຄັບໃຊ້ມາດຕະການປິດເມືອງທົ່ວປະເທດ ເພື່ອໃຫ້ມີຜົນບັງຄັບໃຊ້ຈົນເຖິງວັນທີ 31 ພຶດສະພາ ຫຼັງຈາກບັງຄັບໃຊ້ມາດຕະການດັ່ງກ່າວ ຕັ້ງແຕ່ວັນທີ 25 ມີນາ ຜ່ານມາ. ຢ່າງໃດກໍ່ຕາມ ລັດຖະບານຄ່ອຍໆຜ່ອນຄາຍມາດຕະການໃຫ້ແກ່ປະຊາຊົນຕາມລຳດັບ ພາຍໃຕ້ເງື່ອນໄຂຈາກເຂດທີ່ມີຄວາມສ່ຽງໜ້ອຍຈະໄດ້ຮັບການຜ່ອນຜັນຫຼາຍກວ່າ.