ສາຍການບິນເອມິເຣດສ໌ ຍັງບໍ່ມີຂໍ້ສະຫຼຸບ ປັບປ່ຽນໂຄງສ້າງຮັບມືວິກິດໂຄວິດ-19

20

ສາຍການບິນເອມິເຣດສ໌ ຍັງບໍ່ໄດ້ຂໍ້ສະຫຼຸບເປັນທາງການກ່ຽວກັບມາດຕະການໃໝ່ທີ່ຈະນຳບໍລິສັດໄປສູ່ ການປ່ຽນແປງຄັ້ງສໍາຄັນ ຫຼັງຈາກມີລາຍງານວ່າ ອາດຈະປົດພະນັກງານອອກ 30.000 ຕຳແໜ່ງ.

ສຳນັກຂ່າວຕ່າງປະເທດລາຍງານຈາກນະຄອນດູໄບ ສະຫະລັດ ອາຣັບເອມີເຣດສ໌ (UAE) ເມື່ອວັນຈັນ ທີ 18 ພຶດສະພາ ໂດຍອ້າງອີງຈາກລາຍງານຂອງສຳນັກຂ່າວຣອຍເຕີ ເຊິ່ງໃຫ້ສຳພາດໂດຍໂຄສົກຂອງເອມິເຣດສ໌ສາຍການບິນຂະໜາດໃຫຍ່ທີ່ສຸດ ໃນຕາເວັນອອກກາງ ເມື່ອວັນອາທິດ ຜ່ານມາ ຫຼັງຈາກສຳນັກຂ່າວບຼູມເບີກ ໄດ້ລາຍງານວ່າ ເອມິເຣດສ໌ກຽມປົດພະນັກງານ 30.000 ຄົນ ຫຼື ປະມານ 30% ຂອງພະນັກງານທີ່ມີຢູ່ທົວໂລກ.

ທັງນີ້, ໂຄສົກກ່າວຕໍ່ວ່າ ເອມິເຣດສ໌ “ຍັງບໍ່ມີມະຕິຢ່າງເປັນທາງການ” ກ່ຽວກັບມາດຕະການ” ປັດຫຼຸດຈຸດທີ່ຊ້ຳຊ້ອນຫຼາຍເກີນໄປ ແລະ ສິ່ງທີ່ຟຸ້ມເຟືອຍໃນອົງກອນ” ແຕ່ໄດ້ເປີດເຜີຍໃນເບື້ອງຕົ້ນວ່າ ບໍລິສັດກຳລັງພິຈາລະນາເລື່ອງ “ການບໍລິຫານຄຸ້ມຄອງຄ່າໃຊ້ຈ່າຍ ແລະ ການນຳໃຊ້ຊັບພະຍາກອນເພື່ອຂັບເຄື່ອນທຸລະກິດ“ ໃຫ້ເໝາະສົມກັບສະພາບການໃນປະຈຸບັນ ແລະ ແຜນຍຸດທະສາດໃນອະນາຄົດ.

ອີກປະການໜຶ່ງ ເອມິເຣດສ໌ ໄດ້ໂຈະຖ້ຽວບິນເກືອບທັງໝົດເມື່ອເດືອນມີນາ ຜ່ານມາ ເນື່ອງຈາກວິກິດການແຜ່ລະບາດຂອງໂຄວິດ-19 ແຕ່ເມື່ອອາທິດກ່ອນ ໄດ້ປະກາດກຽມຈະກັບມາເປີດໃຫ້ບໍລິການ 9 ເສັ້ນທາງຂອງ 8 ປະເທດ ຕັ້ງແຕ່ວັນທີ 21 ພຶດສະພານີ້ ໄດ້ແກ່ ນະຄອນຫຼວງລອນດອນ, ເມື່ອງແຟຣັງເຟີດ, ເມືອງມິລານ, ນະຄອນຫຼວງມາດຣິດ, ເມືອງໂທຣອນໂຕ, ເມືອງຊິຄາໂກ, ນະຄອນຊິດນີ ແລະ ເມືອງເມລເບິນ. ລວມທັງມີຖ້ຽວບິນໃນນະຄອນດູໄບ ເປັນຈຸດເຊື່ອມຕໍ່ລະຫວ່າງຜູ້ທີ່ຕ້ອງການເດີນທາງລະຫວ່າງສະຫະຣາຊະອານາຈັກ ກັບ ອົສຕຣາລີ ດ້ວຍ.

ຂະນະທີ່ ເຖິງວ່າປີງົບປະມານກ່ອນໜ້າ ໄດ້ສິ້ນສຸດລົງ ເມື່ອວັນທີ 31 ມີນາ ເອມິເຣດສ໌ ຢືນຢັນມີຜົນກຳໄລເພິ່ມຂຶ້ນ 21%. ຢ່າງໃດກໍ່ຕາມ ທາງສະໜາມບິນກໍ່ຍອມຮັບວ່າ ວິກິດການແຜ່ລະບາດໂຄວິດ-19 ຈະສົ່ງຜົນກະທົບຕໍ່ການດຳເນີນວຽກງານໃນໄຕມາດທີ່ສີ່.