ແອຣ໌ ການາດາ ກຽມປົດພະນັກງານ 20.000 ຄົນ ໄລຍະວິກິດໂຄວິດ-19

8

ສາຍການບິນແຫ່ງຊາດຂອງປະເທດການາດາ ປະກາດແຜນປົດພະນັກງານ 20 ພັນຄົນ ໄລຍະວິກິດການແຜ່ລະບາດຂອງໂຄວິດ-19 ທີ່ກຳລັງສ້າງກະທົບຮ້າຍແຮງຕໍ່ອຸດສາຫະກຳການບິນທົ່ວໂລກ.

ສຳນັກຂ່າວຕ່າງປະເທດລາຍງານຈາກນະຄອນຫຼວງອັອດຕາວາ ປະເທດການາດາ ເມື່ອວັນສຸກ ທີ 15 ພຶດສະພາ ວ່າ ສາຍການບິນການາດາ ຫຼື ແອຣ໌ ການາດາ ເຊິ່ງເປັນສາຍການບິນແຫ່ງຊາດຂອງປະເທດການາດາ ອອກຖະແຫຼງການ ເມື່ອວັນສຸກ ກ່ຽວກັບການກຽມເຊົາຈ້າງພະນັກງານຢ່າງໜ້ອຍ 20.000 ຄົນ ຫຼື 60% ຂອງພະນັກງານທັງໝົດທົ່ວໂລກປະມານ 38.000 ຄົນ ເພື່ອຮັກສາສະຖຽນລະພາບທາງການເງິນໃຫ້ກັບບໍລິສັດ ໃນໄລຍະວິກິດການແຜ່ລະບາດຂອງໂຄວິດ-19 ທີ່ສົ່ງຜົນກະທົບຢ່າງໃຫຍ່ຫຼວງຕໍ່ອຸດສະຫະກຳການບິນທົ່ວໂລກ.

ຂະນະທີ່ ສະຫະພາບແຮງງານ ພະນັກງານບໍລິການສາທາລະນະຂອງການາດາໃຫ້ຂໍ້ມູນ ວ່າ ກຳລັງຫາລືຂັ້ນສຸດທ້າຍກັບຜູ້ບໍລິຫານຂອງສາຍການບິນກ່ຽວກັບຂະບວນການດັ່ງກ່າວ ແລະ ຄາດວ່າ ຈະບັນລຸຂໍ້ສະຫຼຸບອີກບໍ່ດົນນີ້. ສາຍການບິນການາດາ ໄດ້ປະກາດ ເມື່ອທ້າຍເດືອນ ເມສາ ຜ່ານມາ ກ່ຽວກັບການຕັດເງິນເດືອນຜູ້ບໍລິຫານລະດັບສູງ 25% – 50% ແລະ ສະມາຊິກຄະນະກຳມະການຝ່າຍບໍລິຫານໄດ້ເຫັນດີ ຫຼຸດເງິນເດືອນລົງ 25% ແບບບໍ່ມີກຳນົດ ພ້ອມທັງປັບຫຼຸດການບໍລິການໄຕມາດທີ 2 ອີກ 85% – 90%.

ນອກຈາກນີ້, ຍັງມີການພັກວຽກພະນັກງານປະມານ 16.500 ຄົນ ເຊິ່ງສ່ວນໃຫຍ່ເປັນພະນັກງານຕ້ອນຮັບໃນຫ້ອງໂດຍສານ ໂດຍບໍ່ຈ່າຍຄ່າຊົດເຊີຍ ແຕ່ໄດ້ກັບມາຈ່າຍອີກຄັ້ງ ເມື່ອເດືອນເມສາ ຜ່ານມາ ຈາກການທີ່ລັດຖະບານຂອງນາຍົກລັດຖະມົນຕີຈັສຕິນ ທຣູໂດ ໄດ້ອະນຸມັດງົບປະມານສຸກເສີນເພື່ອສະໜັບສະໜູນທຸລະກິດ. ຢ່າງໃດກໍ່ຕາມ, ນະໂຍບາຍດັ່ງກ່າວເປັນພຽງໄລຍະສັ້ນ ເຊິ່ງຈະສິ້ນສຸດໃນວັນທີ 6 ມິຖຸນານີ້ ແລະ ແອຣ໌ ການາດາ ຍັງບໍ່ໄດ້ໃຫ້ຂໍ້ມູນເພິ່ມວ່າ ຈະມີນະໂຍບາຍກັບພະນັກງານກຸ່ມນີ້ແນວໃດ.

ຫາກຢ້ອນກັບໄປໄຕມາດທຳອິດຂອງປີນີ້ ການາດາ ແອຣ໌ ປະສົບກັບບັນຫາຂາດທຶນ 1.050 ລ້ານໂດລາການາດາ (ປະມານ 6.680 ຕື້ກີບ) ທຽບໃສ່ໄລຍະດຽວກັນຂອງປີ ຜ່ານມາ ເຊິ່ງມີກຳໄລ 345 ລ້ານໂດລາການາດາ (ປະມານ 2.190 ຕື້ກີບ).