“ລາຕຳ” ສາຍການບິນໃຫຍ່ທີ່ສຸດໃນລາຕິນອາເມຣິກາ ປະກາດຫຼຸດພະນັກງານລົງ

8

ວິກິດການແຜ່ລະບາດຂອງໂຄວິດ-19 ສ້າງຜົນກະທົບໃຫ້ “ກຸ່ມສາຍການບິນລາຕຳ” ເຊິ່ງເປັນສາຍການບິນໃຫຍ່ທີ່ສຸດໃນລາຕິນອາເມຣິກາ ກຽມເຊົາຈ້າງພະນັກງານ 1.400 ຄົນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງຊານດິອາໂກ ປະເທດຊິລີ ເມື່ອວັນເສົາ ທີ 15 ພຶດສະພາ ວ່າ ກຸ່ມສາຍການບິນລາຕຳ ເຊິ່ງເປັນຄູ່ຮ່ວມມືກຸ່ມທຶນສາຍການບິນຂະໜາດໃຫຍ່ທີ່ສຸດໃນລາຕິນອາເມຣິກາ ມີສຳນັກງານໃຫຍ່ຢູ່ນະຄອນຫຼວງຊານດິອາໂກ ປະເທດຊິລີ ຖະແຫຼງການ ເມື່ອວັນສຸກ ໂດຍກຽມປົດພະນັກງານ 1.400 ຄົນ ຄິດເປັນ 3% ຂອງພະນັກງານທັງໝົດ ປະມານ 43.000 ຄົນ.

ທັງນີ້ ທ່ານໂຣແບໂຕ ອັລໂວ (CEO) ຂອງສາຍການບິນລາຕຳ ກ່າວວ່າ ບໍລິສັດ “ບໍ່ມີທາງເລືອກ” ໃນການຮັກສາສະຖຽນລະພາບຂອງທຸລະກິດໃຫ້ດຳເນີນຕໍ່ໄປໄດ້ ໃນໄລຍະວິກິດການແຜ່ລະບາດຂອງໂຄວິດ-19 ເຊິ່ງສ້າງຜົນກະທົບຮ້າຍແຮງໃຫ້ອຸດສາຫະກຳການບິນທົ່ວໂລກ.

ບໍລິສັດລາຕຳ ສ້າງຕັ້ງຂຶ້ນຈາກການຮ່ວມມືກັນລະຫວ່າງສາຍການບິນ “ແລນ” ຂອງປະເທດຊິລີ ແລະ “ຕຳ” ຂອງປະເທດບຣາຊິລ ເມື່ອປີ 2012.

ຂະນະທີ່ ພະນັກງານທີ່ຕ້ອງອອກຈາກວຽກກ່ອນກຳນົດແມ່ນຢູ່ສຳນັກງານໃນປະເທດຊິລີ, ໂຄລົມເບຍ, ເອກວາດໍ ແລະ ເປຣູ. ສ່ວນທີ່ເຫຼືອ ໃນປະເທດອາເຈນຕິນາ, ບຣາຊິລ ແລະ ປາຣາກວາຍ ຍັງບໍ່ໄດ້ຮັບຜົນກະທົບ. ຢ່າງໃດກໍ່ຕາມ ກ່ອນການປະກາດເຊົາຈ້າງພະນັກງານຄັ້ງນີ້ ລາຕຳ ໄດ້ປັບຫຼຸດເງິນເດືອນພະນັກງານໃນທຸກປະເທດກ່ອນແລ້ວ.

ການຕັດສິນໃຈດັ່ງກ່າວຂອງລາຕຳ ມີທ່າອ່ຽງທີ່ຈະສ້າງຄວາມຕື່ນຕົວທາງເສດຖະກິດໃນພາກພື້ນໄດ້ຫຼາຍສົມຄວນ ເນື່ອງຈາກເປັນກຸ່ມສາຍການບິນໂດຍສານແຫ່ງທຳອິດໃນລາຕິນອາເມຣິກາ ປະກາດເຊົາຈ້າງພະນັກງານບາງສ່ວນ “ຢ່າງເປັນທາງການ” ໂດຍສາຍການບິນອື່ນໃນພາກພື້ນຍັງປະຕິບັດນະໂຍບາຍຫຼຸດເງິນເດືອນ ຫຼື ໂຈະການຈ່າຍເງິນ “ແບບບໍ່ມີກຳນົດ” ເປັນຕົ້ນແມ່ນ ອາຊູລສາຍການບິນໃຫຍ່ ອັນດັບ 3 ຂອງປະເທດບຣາຊິລ ທີ່ໃຊ້ນະໂຍບາຍໂຈະການຈ່າຍເງິນເດືອນພະນັກງານ 78% ໃນບໍລິສັດ.