ອິນໂດເນເຊຍ ກຽມໃຫ້ແຮງງານອາຍຸບໍ່ເກີນ 45 ປີ ກັບມາເຮັດວຽກອີກຄັ້ງ

8

ຜູ້ເສຍຊີວິດຈາກໂຄວິດ-19 ໃນປະເທດອິນໂດເນເຊຍ ເພິ່ມຂຶ້ນຫຼາຍກວ່າ 1.000 ຄົນ ຂະນະທີ່ລັດຖະບານກຽມອະນຸຍາດໃຫ້ປະຊາຊົນ ອາຍຸບໍ່ເກີນ 45 ປີ ກັບຄືນໄປເຮັດວຽກໃນສະຖານທີ່ປະກອບການ ແລະ ຖ້າມີຜູ້ລະເມີດມາດຕະການທາງສັງຄົມໃນນະຄອນຫຼວງຈາກາຕ້າ ອາດຈະຖືກລົງໂທດໃຫ້ລ້າງຫ້ອງນ້ຳສາທາລະນະ.

ສຳນັກຂ່າວຕ່າງປະເທດລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນພຸດ ທີ 13 ພຶດສະພາ ວ່າ ກະຊວງສາທາລະນະສຸກອິນໂດເນເຊຍ ຖະແຫຼງການ ເມື່ອວັນອັງຄານ ກ່ຽວກັບສະຖານະການຂອງໂຄວິດ-19 ໃນປະເທດ ວ່າ ຢືນຢັນພົບຜູ້ປ່ວຍໃໝ່ 484 ຄົນ ເພິ່ມສະຖິຕິຜູ້ປ່ວຍສະສົມ 14.749 ຄົນ ຂະນະດຽວກັນ ໄດ້ຢືນຢັນຜູ້ເສຍຊີວິດອີກ 16 ຄົນ ເພິ່ມສະຖະຕິສະສົມຢ່າງໜ້ອຍ 1.007 ຄົນ ຖືເປັນປະເທດທີ່ມີຜູ້ເສຍຊີວິດຈາກໂຄວິດ-19 ຫຼາຍທີ່ສຸດໃນອາຊຽນ.

ຂະນະທີ່ ທ່ານໂດນີ ໂມນາໂດ ປະທານຄະນະເຮັດວຽກສະເພາະກິດຂອງລັດຖະບານອິນໂດເນເຊຍ ເພື່ອຮັບມືກັບວິກິດການແຜ່ລະບາດໂຄວິດ-19 ກ່າວວ່າ ເຖິງວ່າມາດຕະການທາງສັງຄົມຍັງມີຜົນບັງຄັບໃຊ້ຢ່າງເຂັ້ມງວດຈົນເຖິງວັນທີ 31 ພຶດສະພາ ນີ້ ແຕ່ໃນກອງປະຊຸມໄດ້ເຫັນດີໃຫ້ຜ່ອນຄາຍຄວາມເຂັ້ມງວດບາງມາດຕະການ ເພື່ອໃຫ້ປະຊາຊົນໄດ້ກັບມາດຳເນີນຊີວິດ “ພາຍໃຕ້ວິຖີໃໝ່” ແລະ ເສດຖະກິດຕ້ອງຂັບເຄື່ອນຕໍ່ໄປ.

ທັງນີ້, ທ່ານໂມນາໂດ ຢືນຢັນວ່າ ລັດຖະບານບໍ່ຕ້ອງການໃຫ້ປະຊາຊົນຜູ້ອອກແຮງງານທົ່ວປະເທດກັບຄືນໄປເຮັດວຽກພ້ອມກັນທັນທີ ແຕ່ຈະມີການຜ່ອນຄາຍໃຫ້ຂະແໜງການຜະລິດ ແລະ ອຸດສາຫະກຳ ບາງສ່ວນກັບມາເດີນໜ້າໄດ້ກ່ອນ ແລະ ຜູ້ທີ່ກັບເຂົ້າມາເຮັດວຽກໃນສະຖານທີ່ປະກອບການ ຕ້ອງອາຍຸກໍ່ເກີນ 45 ປີ ບໍ່ວ່າຈະເປັນພະນັກງານໃນຕຳແໜ່ງໃດກໍ່ຕາມ ໂດຍຄະນະເຮັດວຽກໄດ້ແບ່ງອາຊີບອອກເປັນ 11 ປະເພດ ຕັ້ງແຕ່ອາຊີບຮັກສາຄວາມປອດໄພໄປຈົນເຖິງການບໍລິການອາຫານ, ສາທາລະນະສຸກ ແລະ ການຂົນສົ່ງສິນຄ້າ.

ການກຳນົດໄລຍະອາຍຸດັ່ງກ່າວແມ່ນອີງຕາມສະຖິຕິຈາກກະຊວງສາທາລະນະສຸກອິນໂດເນເຊຍ ທີ່ໄດ້ເກັບກຳຂໍ້ມູນວ່າ ຜູ້ເສຍຊີວິດຈາກໂຄວິດ-19 ໃນປະເທດ ເປັນຜູ້ທີ່ມີອາຍຸຕັ້ງແຕ່ 60 ປີ ຫຼາຍເຖິງ 45%, ຮອງລົງມາແມ່ນອາຍຸລະຫວ່າງ 46-59 ປີ ຄິດເປັນສັດສ່ວນ 40%. ອີກປະການໜຶ່ງ ອິນໂນເນເຊຍມີປະຊາກອນ 273 ລ້ານຄົນ ແຕ່ສ່ວນໃຫຍ່ຍັງເປັນໄວໜຸ່ມສາວ ໂດຍອາຍຸສະເລ່ຍຂອງປະຊາກອນປະມານ 30,2 ປີ ເທົ່ານັ້ນ.

ດ້ານເທສະບານຂອງນະຄອນຫຼວງຈາກາຕ້າໄດ້ເພິ່ມບົດລົງໂທດປະຊາຊົນທີ່ລະເມີດມາດຕະການຮັກສາໄລຍະຫ່າງທາງສັງຄົມໃນໄລຍະປິດເມືອງ ໂດຍບຸກຄົນໃດກໍ່ຕາມທີ່ບໍ່ສວມໃສ່ໜ້າກາກອະນາໄມ ຫຼື ຜ້າອັດປາກ ເມື່ອຢູ່ສະຖານທີ່ສາທາລະນະ ອາດຈະຖືກປັບໄໝສູງສຸດ 250.000 ຣູເປຍ (ປະມານ 150.000 ກີບ) ສ່ວນຜູ້ທີ່ຢູ່ຮວມໂຕກັບເປັນກຸ່ມໃນສະຖານທີ່ສາທາລະນະ ຕ້ອງຮັບບົດລົງໂທດລວມທັງໃຫ້ໄປອະນາໄມຫ້ອງນໍ້າສາທາລະນະ ພ້ອມໃສ່ເສື້ອກັກທີ່ຂຽນວ່າ “ພວກຝ່າຝືນ”.