ເກືອບເດືອນແລ້ວ ປະເທດລາວ ບໍ່ພົບຜູ້ຕິດເຊື້ອໂຄວິດ-19

8

ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມ 25 ວັນຕິດຕໍ່ກັນ ເຮັດໃຫ້ສະຖິຕິຜູ້ຕິດເຊື້ອສະສົມ 19 ຄົນ ແລະ ປິ່ນປົວເຊົາແລ້ວ 9 ຄົນ.

ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຖະແຫຼການ ເມື່ອວັນພະຫັດ ທີ 7 ພຶດສະພາ 2020 ທີ່ກະຊວງສາທາລະນະສຸກ ໂດຍ ທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ໃຫ້ຮູ້ວ່າ: ຜົນການກວດ ແລະ ເກັບຕົວຢ່າງກວດຫາເຊື້ອໂຄວິດ-19 ເມື່ອວັນພຸດ ທີ 6 ພຶດສະພາ ຜ່ານມາ ທັງໝົດ 99 ຄົນ ບໍ່ພົບຜູ້ຕິດເຊື້ອ ແລະ ນັບເປັນ 25 ວັນຕິດຕໍ່ກັນແລ້ວ ທີ່ປະເທດລາວ ບໍ່ມີຜູ້ຕິດເຊື້ອເຊື້ອດັ່ງກ່າວເພິ່ມ.

ປັດຈຸບັນ ປະເທດລາວມີຜູ້ຕິດເຊື້ອໂຄວິດ-19 ສະສົມ 19 ຄົນ, ປິ່ນປົວເຊົາແລ້ວ 9 ຄົນ ໂດຍຍັງເຫຼືອຜູ້ປິ່ນປົວໃນໂຮງໝໍ 10 ຄົນ ທັງໝົດອາການເບົາບາງ.