ຣັສເຊຍ ພົບຜູ້ປ່ວຍໂຄວິດ-19 ເພິ່ມຂຶ້ນກາຍ 10 ພັນ ຄົນ ເປັນວັນທີ 4 ຕິດຕໍ່ກັນ

11

ຣັສເຊຍຢືນຢັນຜູ້ຕິດເຊື້ອໄວຣັສໂຄວິດ-19 ຫຼາຍກວ່າ 10.000 ຄົນ ເປັນວັນທີ 4 ຕິດຕໍ່ກັນ ສ່ວນຜູ້ເສຍຊີວິດສະສົມຫຼາຍກວ່າ 1.500 ຄົນແລ້ວ.

ສຳນັກຂ່າວຕ່າງປະເທດລາຍງານຈາກນະຄອນຫຼວງມອສໂກ ປະເທດຣັສເຊຍ ເມື່ອວັນພຸດ ທີ 6 ພຶດສະພາ ວ່າ ສູນຕອບສະໜອງວິກິດການແຜ່ລະບາດໂຄວິດ-19 ຂອງຣັສເຊຍ ໄດ້ລາຍງານເມື່ອວັນພຸດ ກ່ຽວກັບສະຖານະການຂອງໂຄວິດ-19 ໃນປະເທດ ວ່າ ມີຜູ້ປ່ວຍໃໝ່ອີກ 10.559 ຄົນ ເພິ່ມຈຳນວນສະສົມຢ່າງໜ້ອຍ 165.929 ຄົນ ແລະ ປິ່ນປົວເຊົາແລ້ວ 21.327 ຄົນ.

ທັງນີ້, ສະຖິຕິດັ່ງກ່າວ ເຮັດໃຫ້ເປັນວັນທີ 4 ຕິດຕໍ່ກັນແລ້ວ ຫຼື ຕັ້ງແຕ່ວັນອາທິດ ທີ 3 ພຶດສະພາ ຜ່ານມາ ທີ່ຣັສເຊຍຢືນຢັນການກວດພົບຜູ້ຕິດເຊື້ອໃໝ່ປະຈຳວັນ ຫຼາຍກວ່າ 10.000 ຄົນ ໂດຍສະຖິຕິສູງສຸດ ແມ່ນວັນອາທິດ ທີ່ໄດ້ຢືນຢັນຜູ້ປ່ວຍໃໝ່ 10.633 ຄົນ ຂະນະທີ່ມີການຢືນຢັນຜູ້ເສຍຊີວິດ 86 ຄົນ ໃນຮອບໜຶ່ງວັນຜ່ານມາ ເພີ່ມສະຖິຕິຜູ້ເສຍຊີວິດສະສົມຢ່າງໜ້ອຍ 1.537 ຄົນ.

ນາຍົກລັດຖະມົນຕີມິຄາອິລ ມິຊຸສຕິນ (Russian Prime Minister Mikhail Mishustin)

ຂະນະທີ່ ທຳນຽບເຄຣມລິນ ອອກຖະແຫຼງການກ່ຽວກັບອາການປ່ວຍຂອງນາຍົກລັດຖະມົນຕີມິຄາອິລ ມິຊຸສຕິນ ເຊິ່ງເປັນເຈົ້າໜ້າທີ່ລະດັບສູງຄົນທຳອິດໃນລັດຖະບານຣັສເຊຍທີ່ຕິດເຊື້ອໂຄວິດ-19 ແລະ ເຂົ້າຮັບການປິ່ນປົວຢູ່ໂຮງໝໍແຫ່ງໜຶ່ງໃນນະຄອນຫຼວງມອສໂກ ຕັ້ງແຕ່ອາທິດກ່ອນ ວ່າ “ອາການດີຫຼາຍ” ໂດຍທ່ານມິຊຸສຕິນ ຮູ້ສຶກປົກກະຕິ ແຕ່ຍັງຕ້ອງຢູ່ພາຍໃຕ້ການດູແລຢ່າງໃກ້ຊິດຈາກຄະນະແພດ. ຢ່າງໃດກໍ່ຕາມ, ທ່ານສາມາດເຮັດວຽກໄດ້ແລ້ວ ໂດຍເນັ້ນການຕິດຕໍ່ຜ່ານທາງໂທລະສັບ ແລະ ວິດີໂອຄອລເປັນຫຼັກ.