ມາເລເຊຍ ມີຜູ້ເສຍຊີວິດຈາກໂຄວິດ-19 ກວ່າ 100 ຄົນ

11

ມາເລເຊຍລາຍງານ ຈຳນວນຜູ້ເສຍຊີວິດສະສົມຈາກໂຄວິດ-19 ຫຼາຍກວ່າ 100 ຄົນ ແລະ ຜູ້ຕິດເຊື້ອໃນປະເທດຫຼາຍກວ່າ 6.000 ຄົນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງກົວລາລຳເປີ ປະເທດມາເລເຊຍ ເມື່ອວັນສຸກ ທີ 1 ພຶດສະພາ ວ່າ ກະຊວງສາທາລະນະສຸກມາເລເຊຍລາຍງານສະພາບການຂອງໂຄວິດ-19 ວ່າ ກວດພົບຜູ້ຕິດເຊື້ອໃໝ່ 57 ຄົນ ໃນຮອບ 24 ຊົ່ວໂມງຫຼ້າສຸດຈົນຮອດຕອນແລງວັນພະຫັດ ຜ່ານມາ ແບ່ງເປັນ 32 ຄົນ ຕິດເຊື້ອພາຍໃນ ແລະ ອີກ 25 ຄົນ ເດີນທາງມາຈາກຕ່າງປະເທດ ເພິ່ມສິຖິຕິຜູ້ປ່ວຍສະສົມໃນປະເທດ ຢ່າງໜ້ອຍ 6.002 ຄົນ.

ຂະນະທີ່ ໃນຮອບວັນດຽວກັນ ມີຜູ້ປ່ວຍໄດ້ຮັບອະນຸຍາດໃຫ້ອອກຈາກໂຮງໝໍອີກ 84 ຄົນ ເພິ່ມສະຖິຕິປິ່ນປົວເຊົາສະສົມ ຢ່າງໜ້ອຍ 4.171 ຄົນ ທຽບເປັນອັດຕາການປິ່ວປົວເຊົາແລ້ວປະມານ 69,5%. ຢ່າງໃດກໍ່ຕາມ, ຍັງມີການຢືນຢັນຜູ້ເສຍຊີວິດອີກ 2 ຄົນ ເພິ່ມສະຖິຕິຜູ້ເສຍຊີວິດໃນມາເລເຊຍຢ່າງໜ້ອຍ 102 ຄົນ.

ທັງນີ້, ປະເທດມາເລເຊຍຍັງຢູ່ພາຍໃຕ້ມາດຕະການປິດເມືອງເຂັ້ມງວດລະດັບດຽວກັນທົ່ວປະເທດ ຕັ້ງແຕ່ວັນທີ 18 ມີນາ ເປັນຕົ້ນມາ ເຊິ່ງທ່ານນາຍົກລັດຖະມົນຕີມູຍິດດິນ ຢາສຊິນ ຍັງສືບຕໍ່ຂະຫຍາຍໄລຍະປິດເມືອງທຸກໆ 14 ວັນ ໂດຍດຳນົດການປັດຈຸບັນແມ່ນສິ້ນສູດໃນວັນທີ 12 ພຶດສະພາ ນີ້ ແຕ່ໃນໄລຍະດັ່ງກ່າວ ລັດຖະບານເລິ່ມຜ່ອນຜັນບາງມາດຕະການ ເພື່ອອຳນວຍຄວາມສະດວກໃນການດຳລົງຊີວິຂອງປະຊາຊົນບໍ່ໃຫ້ເຄັ່ງຕຶງຫຼາຍເກີນໄປ ແລະ ສະໜັບສະໜູນການດຳເນີນທຸລະກິດ ແລະ ອຸດສາຫະກຳ “ທີ່ມີຄວາມຈຳເປັນທີ່ສຸດກ່ອນ”.