ລາວ ບໍ່ພົບຜູ້ຕິດເຊື້ອໂຄວິດ-19 ເປັນວັນທີ 17 ຕິດຕໍ່ກັນ ແລະ ປິ່ວປົວເຊົາເພິ່ມອີກ 1 ຄົນ

10

ເປັນຂ່າວດີ 17 ວັນຕິດຕໍ່ກັນແລ້ວ ທີ່ ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພິ່ມ ຫຼ້າສຸດ ຜູ້ປ່ວຍຢູ່ແຂວງຫຼວງພະບາງປິ່ນປົວເຊົາ ແລະ ກັບເມືອພັກຟື້ນເບິ່ງອາການຢູ່ເຮືອນ ອີກ 14 ວັນແລ້ວ.

ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຖະແຫຼງການທີ່ກະຊວງສາທາລະນະສຸກ ເມື່ອວັນພຸດ ທີ 29 ເມສາ ເປັນການລາຍງານສະຖະນະການລະບາດຂອງພະຍາດໂຄວິດ-19 ໃນ ສປປ ລາວ ໂດຍທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ກ່າວວ່າ: ເມື່ອວັນທີ 28 ເມສາ ຜ່ານມາ ໄດ້ເກັບຕົວຢ່າງມາກວດທັງໝົດ 33 ຄົນ, ຈຳນວນດັ່ງກ່າວ ຜູ້ມີອາການສົງໄສມາກວດຢູ່ໂຮງໝໍ 11 ຄົນ, ເກັບຕົວຢ່າງຜູ້ຕິດເຊື້ອມາກວດຄືນ 3 ຄົນ ແລະ ແຮງງານລາວທີ່ກັບມາຈາກປະເທດໄທ 19 ຄົນ (ແຮງງານທັງໝົດແມ່ນບໍ່ມີອາການ), ເຊິ່ງຜົນການກວດທັງໝົດ 33 ຄົນ ແມ່ນບໍ່ພົບຜູ້ຕິດເຊື້ອ ນັບເປັນມື້ທີ 17 ແລ້ວ ທີ່ປະເທດລາວບໍ່ພົບມີຜູ້ຕິດເຊື້ອໂຄວິດ-19

ຢ່າງໃດກໍ່ຕາມ ນັບແຕ່ເດືອນມັງກອນ ເຖິງວັນທີ 27 ເມສາ ຜ່ານມາ ສາທາລະນະສຸກໄດ້ເກັບຕົວຢ່າງມາກວດທັງໝົດ 1.917 ຕົວຢ່າງ, ພົບເຊື້ອສະສົມ 19 ຄົນ ສ່ວນຜູ້ສຳຜັດໃກ້ຊິດກັບຜູ້ຕິດເຊື້ອທັງໝົດ 313 ຄົນ ໂດຍທັງໝົດຄົບກຳນົດຕິດຕາມແລ້ວ.

ຫຼວງພະບາງມີຜູ້ປ່ວຍສະສົມ 3 ຄົນ ເຊິ່ງຫຼ້າສຸດຜູ້ປ່ວຍຄົນສຸດທ້າຍປິ່ນປົວເຊົາດີ ແລະ ກັບເມື່ອພັກຟື້ນຢູ່ເຮືອນ ເບິ່ງອາການອີກ 14 ວັນ ເຊັ່ນດຽວກັບ 2 ຄົນທີ່ອອກຈາກໂຮງໝໍກ່ອນໜ້ານີ້.

ປັດຈຸບັນ ສປປ ລາວ ຜູ້ຕິດເຊື້ອໂຄວິດ-19 ເຊິ່ງປິ່ນປົວເຊົາດີ ແລະ ອອກໂຮງໝໍແລ້ວທັງໝົດ 8 ຄົນ ຄື ຢູ່ແຂວງຫຼວງພະບາງ 3 ຄົນ ແລະ ນະຄອນຫຼວງວຽງຈັນ 5 ຄົນ ຂະນະທີ່ 11 ຄົນ ຍັງປິ່ນປົວຢູ່ໂຮງໝໍມິດຕະພາບ ນະຄອນຫຼວງວຽງຈັນ ໂດຍທັງໝົດມີອາການຍັງຢູ່ຂັ້ນເບົາບາງ ແລະ ຍັງຕ້ອງເຝົ້າລະວັງຢ່າງໃກ້ຊິດ.