ກຳປູເຈຍ ໂຈະບໍລິການໄປສະນີລະຫວ່າງປະເທດຊົ່ວຄາວ ໄລຍະວິກິດໂຄວິດ-19

10

ໄປສະນີກຳປູເຈຍ ປະກາດຢຸດບໍລິການຂົນສົ່ງລະຫວ່າງປະເທດຊົ່ວຄາວ ເນື່ອງຈາກວິກິດການແຜ່ລະບາດຂອງເຊື້ອໄວຣັສ ໂຄໂຣນາສາຍພັນໃໝ່.

ສຳນັກຂ່າວຕ່າງປະເທດລາຍງານຈາກນະຄອນຫຼວງພະນົມເປັນ ປະເທດກຳປູເຈຍ ເມື່ອວັນອັງຄານ ທີ 21 ເມສາ ວ່າ ຫ້ອງການໄປສະນີກຳປູເຈຍ ອອກຖະແຫຼງການ ເລື່ອງການໂຈະບໍລິການໄປສະນີລະຫວ່າງປະເທດຊົ່ວຄາວ ເນື່ອງຈາກວິກິດການແຜ່ລະບາດໂຄວິດ-19 ເຊິ່ງສົ່ງຜົນກະທົບຕໍ່ການຂົນສົ່ງສິນຄ້າທາງອາກາດ.

ທັງນີ້, ສາຍການບິນໄທ ແອຮ໌ເວ, ດຣາກອນ ແອຣ໌, ມາເລເຊຍ ແອຣ໌ໄລນ໌ ແລະ ສາຍການບິນເອເອັນເອ ຢຸດໃຫ້ບໍລິການຊົ່ວຄາວ ໂດຍກຳນົດການສ່ວນໃຫຍ່ຢ່າງໜ້ອຍແມ່ນປິດເຖິງວັນທີ 30 ເມສາ ນີ້ ຈຶ່ງຍັງບໍ່ຈະແຈ້ງ ວ່າ ແຕ່ລະສາຍການບິນຈະກັບມາເປີດໃຫ້ບໍລິການເປັນປົກກະຕິເມື່ອໃດ. ຢ່າງໃດກໍ່ຕາມ, ບໍລິການໄປສະນີ ແລະ ບໍລິການທຸລະກຳພາຍໃນປະເທດ ຍັງເປີດໃຫ້ບໍລິການປົກກະຕິ.

ປັດຈຸບັນ, ປະເທດກຳປູເຈຍ ມີຜູ້ປ່ວຍສະສົມຈາກເຊື້ອໄວຣັສໂຄວິດ-19 ຢ່າງໜ້ອຍ 122 ຄົນ ປິ່ນປົວເຊົາແລ້ວ 110 ຄົນ ໂດຍຍັງບໍ່ມີຜູ້ເສຍຊີວິດ. ນັບຕັ້ງແຕ່ມີການຢືນຢັນ ກວດພົບຜູ້ປ່ວຍຄົນທຳອິດ ເມື່ອວັນທີ 27 ມີນາ ຜ່ານມາ ເຈົ້າ ໜ້າທີ່ສາທາລະນະສຸກກຳປູເຈຍໄດ້ກວດຕົວຢ່າງຫາເຊື້ອໄປແລ້ວ ຢ່າງໜ້ອຍ 9.792 ຄົນ.