ສປປ ລາວ ບໍ່ພົບຜູ້ຕິດເຊື້ອໂຄວິດ-19 9 ວັນຕິດຕໍ່ກັນ

7

ສາທາລະນະສຸກລາຍງານ ສປປ ລາວ ຍັງບໍ່ພົບຜູ້ຕິດເຊື້ອໃໝ່ ເປັນວັນທີ 9 ຕິດຕໍ່ກັນ ຂະນະທີ່ ກຸ່ມສົງໄສ ກ່ອນວັນທີ 21 ເມສາ ຍັງເຫຼືອພຽງ 13 ຄົນ ຍັງຕ້ອງຕິດຕາມ ຈົນກວ່າຈະຄົບ 14 ວັນ.

ສູນປະຕິບັດງານ ແລະ ຄະນະສະເພາະກິດ ຄວບຄຸມໂຄວິດ-19 ຖະແຫຼງການ ເມື່ອວັນອັງຄານ ທີ 21 ເມສາ 2020 ທີ່ກະຊວງສາທາລະນະສຸກ ວ່າ ສະພາບການປະຈຳວັນກ່ຽວກັບໂຄວິດ-19 ສປປ ລາວ ຍັງບໍ່ພົບຜູ້ຕິດເຊື້ອໃໝ່ ຈາກການເກັບຕົວຢ່າງເພື່ອກວດຫາເຊື້ອ 29 ຄົນ.

ທ່ານ ຮສ.ດຣ ພູທອນ ເມືອງປາກ ກ່າວວ່າ: ເມື່ອວັນທີ 20 ເມສາ ຜ່ານມາ ໄດ້ເກັບຕົວຢ່າງມາກວດທັງໝົດ 29 ຄົນ ແບ່ງເປັນນະຄອນຫຼວງວຽງຈັນ 14 ຄົນ ແລະ ຕ່າງແຂວງ 15 ຄົນ. ໃນກຸ່ມນີ້ 14 ຄົນ ມີປະຫວັດໃກ້ຊິດກັນຜູ້ຕິດເຊື້ອ ແລະ ອີກ 15 ຄົນ ເປັນກໍລະນີສົງໄສ ໂດຍຜົນກວດຂອງທັງໝົດແມ່ນບໍ່ພົບເຊື້ອ.

ນັບວ່າເປັນຂ່າວດີ ທີ່ ສປປ ລາວ ບໍ່ພົບຜູ້ຕິດເຊື້ອເປັນວັນທີ 9 ຕິດຕໍ່ກັນ ຜູ້ປ່ວຍສະສົມຈຶ່ງຍັງຄົງທີ່ 19 ຄົນ, ຍັງປິ່ນປົວຢູ່ໂຮງໝໍ 17 ຄົນ ໂດຍທັງໝົດບໍ່ມີອາການຮ້າຍແຮງ ໂດຍຜູ້ປ່ວຍບາງສ່ວນໄດ້ກວດເຊື້ອໃນຮ່າງກາຍແລ້ວ ແຕ່ບໍ່ພົບເຊື້ອ ເຊິ່ງຕ້ອງລໍຖ້າຜົນກວດຄືນອີກຄັ້ງ ເພື່ອຢືນຢັນ ສ່ວນຜູ້ປິ່ນປົວແລ້ວ ມີ 2 ຄົນ ແລະ ໄດ້ກັບເມືອພັກຟື້ນຢູ່ເຮືອນກ່ອນໜ້ານີ້ແລ້ວ.

ຕັ້ງແຕ່ເດືອນມັງກອນ ຫາ 20 ເມສາ ສາທາລະນະສຸກໄດ້ເກັບຕົວຢ່າງມາກວດທັງໝົດ 1.378 ຄົນ ພົບເຊື້ອພຽງ 19 ຄົນ ແລະ ປັດຈຸບັນ ຍັງເຫຼືອ 13 ຄົນ ທີ່ຕ້ອງຕິດຕາມຢ່າງໃກ້ຊິດຕໍ່ໄປຈົນກວ່າຈະຄົບ 14 ວັນ.