ຈີນ ເຫຼືອຜູ້ປ່ວຍໂຄວິດ-19 ປິ່ນປົວໃນໂຮງໝໍ 1.000 ຄົນ

12

ສະຖິຕິຜູ້ປ່ວຍສະສົມຈາກການຕິດເຊື້ອໄວຣັສໂຄວິດ19 ໃນປະເທດຈີນ ປະມານ 82.000 ຄົນ ແຕ່ປັດຈຸບັນ ເຫຼືອຜູ້ປ່ວຍໃນລະບົບອີກ ປະມານ 1.000 ຄົນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນອັງຄານ ທີ 21 ເມສາ ວ່າ ຄະນະກຳມາທິການສາທາລະນະສຸກແຫ່ງຊາດຈີນ ອອກຖະແຫຼງການ ເມື່ອວັນອັງຄານ ເປັນການລາຍງານສະຖານະການກ່ຽວກັບເຊື້ອໄວຣັສໂຄວິດ-19 ໃນປະເທດ ວ່າ ຜູ້ເສຍຊີວິດສະສົມຍັງຄົງທີ່ຢ່າງໜ້ອຍ 4.632 ຄົນ ຂະນະທີ່ ມີການຢືນຢັນຜູ້ປ່ວຍໃໝ່ 11 ຄົນ ແບ່ງເປັນ 4 ຄົນ ເດີນທາງຈາກຕ່າງປະເທດ ແລະ 7 ຄົນ ພາຍໃນ ເພິ່ມຈຳນວນຜູ້ປ່ວຍສະສົມ ຢ່າງໜ້ອຍ 82.758 ຄົນ.

ດ້ານຈຳນວນຜູ້ຕິດເຊື້ອບໍ່ສະແດງອາການເພິ່ມອີກ 37 ຄົນ ໂດຍຜູ້ຕິດເຊື້ອກຸ່ມນີ້ ຢູ່ພາຍໃຕ້ການຕິດຕາມຢ່າງໃກ້ຊິດ ຢ່າງໜ້ອຍ 992 ຄົນ. ນອກຈາກນີ້, ຄະນະແພດອະນຸຍາດໃຫ້ຜູ້ປ່ວຍອີກ 39 ຄົນ ສາມາດກັບເມື່ອພັກຟື້ນຢູ່ເຮືອນໄດ້ ເພິ່ມສະຖິຕິປິ່ນປົວເຊົາຢ່າງໜ້ອຍ 77.123 ຄົນ ເຮັດໃຫ້ຍັງເຫຼືອຜູ້ປ່ວຍພັກປິ່ນປົວຢູ່ໂຮງໝໍ ເຫຼືອ 1.003 ຄົນເທົ່ານັ້ນ ໃນຈຳນວນນີ້ 82 ຄົນອາການຮ້າຍແຮງ.