ຝຣັ່ງເສຍຊີວິດຈາກໂຄວິດ-19 ກວ່າ 20 ພັນຄົນແລ້ວ

4

ຝຣັ່ງເປັນປະເທດທີ 4 ຂອງໂລກ ທີ່ມີປະຊາຊົນຫຼາຍກວ່າ 20 ພັນຄົນ ເສຍຊີວິດຈາກການຕິດເຊື້ອໂຄວິດ-19 ຂະນະທີ່ ລັດຖະບານກຳລັງຈະຜ່ອນຜັນບາງມາດຕະການປິດເມືອງ ຕັ້ງແຕ່ວັນທີ 11 ພຶດສະພາ ນີ້.

ສຳນັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນອັງຄານ ທີ 21 ເມສາ ວ່າ ກະຊວງສາທາລະນະສຸກຝຣັ່ງ ຖະແຫຼງການເມື່ອວັນຈັນ ຜ່ານມາ ໂດຍເປັນລາຍງານສະພາບການຂອງໂຄວິດ-19 ໃນຮອບ 24 ຊົ່ວໂມງ ຜ່ານມາ ວ່າ ຢືນຢັນຜູ້ເສຍຊີວິດອີກ 547 ຄົນ ເພິ່ມສະຕິຖິສະສົມຢ່າງໜ້ອຍ 20.265 ຄົນ ນັບວ່າເປັນປະເທດທີ 4 ແລະ ອັນດັບ 4 ຂອງໂລກ ທີ່ມີຜູ້ເສຍຊີວິດສະສົມຈາກເຊື້ອໄວຣັສໂຄໂຣນາສາຍພັນໃໝ່ ຫຼາຍກວ່າ 20.000 ຄົນ ຮອງຈາກອາເມຣິກາ, ສະເປນ ແລະ ອິດຕາລີ.

ຈຳນວນຜູ້ເສຍຊີວິດທັງໝົດ ຖືກແບ່ງເປັນການເສຍຊີວິດໃນໂຮງໝໍ 12.513 ຄົນ ແລະ ເສຍຊີວິດຢູ່ສູນພັກພິງ ແລະ ດູແລຜູ້ສູງອາຍຸອີກ 7.752 ຄົນ ຂະນະທີ່ ໃນວັນດຽວກັນກວດພົບຜູ້ປ່ວຍໃໝ່ 2.489 ຄົນ ເພິ່ມສະຖິຕິຜູ້ປ່ວຍສະສົມຢ່າງໜ້ອຍ 155.383 ຄົນ ແລະ ປິ່ນປົວເຊົາແລ້ວ 37.409 ຄົນ. ຢ່າງໃດກໍ່ຕາມ, ຈຳນວນຜູ້ປ່ວຍສະສົມຢູ່ໃນຫ້ອງໄອຊີຢູ ຫຼຸດລົງຕໍ່ເນື່ອງ 6 ວັນຕິດຕໍ່ກັນ ຍັງຄົງເຫຼືອຢູ່ຢ່າງໜ້ອຍ 5.863 ຄົນ.

ປະເທດຝຣັ່ງ ກຳລັງຢູ່ພາຍໃຕ້ມາດຕະການປິດເມືອງເພື່ອຄວບຄຸມການແຜ່ລະບາດຂອງໂຄວິດ-19 ຕັ້ງແຕ່ວັນທີ 17 ມີນາ ຜ່ານມາ. ຢ່າງໃດກໍ່ຕາມ, ປະທານາທິບໍດີເອັມມານູເອລ ມາຄຣົງ ໄດ້ປະກາດເມື່ອອາທິດ ຜ່ານມາ ວ່າ ລັດຖະບານຈະເລິ່ມຜ່ອນຜັນບາງມາດຕະການ ຕັ້ງແຕ່ວັນທີ 11 ພຶດສະພາ ແຕ່ການດຳລົງຊີວິດຂອງປະຊາຊົນ “ຍັງບໍ່ກັບມາເປັນປົກກະຕິເທື່ອ” ໂດຍໂຮງຮຽນຈະກັບມາເປີດການຮຽນການສອນໃນສະຖາບັນອີກຄັ້ງ ແຕ່ສະຖານທີ່ປະກອບການອື່ນໆ ຈະພິຈາລະນາເປັນແຕ່ລະກໍລະນີ ແຕ່ມີຄວາມເປັນໄປໄດ້ສູງທີ່ໂຮງຮູບເງົາ ແລະ ໂຮງລະຄອນເວທີຍັງສືບຕໍ່ປິດໄປກ່ອນ ສ່ວນຮ້ານອາຫານແມ່ນບໍລິການແບບຊື້ກັບເມືອກິນຢູ່ເຮືອນເທົ່ານັ້ນ.