ທະວີບເອີຣົບ ມີຜູ້ຕິດເຊື້ອຫຼາຍກວ່າ 1 ລ້ານຄົນ

12

ໃນທະວີບເອີຣົບ ກວດພົບຜູ້ຕິດເຊື້ອໂຄວິດ-19 ຫຼາຍກ່ວາ 1 ລ້ານແລ້ວ ຫຼື ຈຳນວນເຄິ່ງໜຶ່ງຂອງຜູ້ຕິດເຊື້ອທົ່ວໂລກ.

ສຳນັກຂ່າວເອເອັຟພີ ລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນພຸດ ທີ 15 ເມສາ ວ່າ ຈາກການເກັບກຳຂໍ້ມູນຂອງແຕ່ລະປະເທດ ແລະ ອົງການອະນາໄມໂລກ ຈົນເຖິງ ວັນພຸດ ທີ 15 ເມສາ ພົບວ່າ ຜູ້ຕິດເຊື້ອໄວຣັສໂຄໂຣນາສາຍພັນໃໝ່ ຫຼື ໂຄວິດ-19 ຢ່າງໜ້ອຍ 1.003.284 ຄົນ ແລະ ເສຍຊີວິດ 84.465 ຄົນ ໃນເອີຣົບ ເຊິ່ງຖືວ່າເປັນທະວີບທີ່ໄດ້ຮັບຜົນກະທົບໜັກທີ່ສຸດໃນຂະນະນີ້ ແລະ ກໍ່ສາມາດເວົ້າໄດ້ວ່າ ຜູ້ຕິດເຊື້ອປະມານເຄິ່ງໜຶ່ງຂອງທົ່ວໂລກ ເຊິ່ງມີຈຳນວນປະມານ 1.981.239ຄົນ ແລະ ເສຍຊີວິດ 126.681 ຄົນ.

ປະເທດສະເປນເຊິ່ງມີຜູ້ຕິດເຊື້ອຫຼາຍທີ່ສຸດໃນເອີຣົບ ໂດຍກະຊວງສາທາລະນະສຸກຖະແຫຼງວ່າ ຜູ້ປ່ວຍທີ່ເສຍຊີວິດຈາກໄວຣັສໂຄວິດ-19 ເມື່ອວັນພຸດ ທີ 15 ເມສາ ມີ 523 ຄົນ ເສຍຊີວິດສະສົມຢ່າງໜ້ອຍ 18.579 ຄົນ ແລະ ຕິດເຊື້ອສະສົມ 177.633 ຄົນ.

ຂະນະທີ່ ປະເທດອິຕາລີ ມີຜູ້ເສຍຊີວິດຫຼາຍທີ່ສຸດ ປະມານ 21.067 ຄົນ ແລະ ຕິດເຊື້ອສະສົມ 162.488 ຄົນ