ໂຄວິດ-19 ສົ່ງຜົນກະທົບຕໍ່ພາລະກິດແຈກຈ່າຍຢາຕ້ານເຊື້ອພະຍາດໝາກແດງ

11

ເດັກນ້ອຍຫຼາຍກວ່າ 117 ລ້ານຄົນ ໄດ້ຮັບການສັກຢາປ້ອງກັນພະຍາດໝາກແດງຊ້າກວ່າປົກກະຕິ ເຊິ່ງເປັນຜົນກະທົບມາຈາກໄວຣັສໂຄວິດ-19 ທີ່ແຜ່ລະບາດຢ່າງວ່ອງໄວທົ່ວໂລກ

ສຳນັກຂ່າວຕ່າງປະເທດລາຍງານຈາກເມືອງເຈນີວາ ປະເທດສະວິດເຊີແລນ ເມື່ອວັນອັງຄານ ທີ 14 ເມສາ ວ່າ ອົງການອະນາໄມໂລກ (WHO: World Health Organization) ແລະ ກອງທຶນຊ່ວຍເຫຼືອເດັກແຫ່ງສະຫະປະຊາຊາດ (UNICEF) ອອກຖະແຫຼງການຮ່ວມເມື່ອວັນຈັນ ຜ່ານມາ ວ່າ ສະຖານະການແຜ່ລະບາດຂອງໄວຣັສໂຄວິດ-19 ສົງຜົນກະທົບໃຫ້ໂຄງການແຈກຈ່າຍຢາປ້ອງກັນໂປລີໂອ ຢ່າງໜ້ອຍ 24 ຈາກທັງໝົດ 37 ປະເທດ ເດັກນ້ອຍຫຼາຍກວ່າ 117 ລ້ານຄົນ ໄດ້ຮັບຢາຊ້າກວ່າກຳນົດ. ໂຄວິດ-19 ເປັນວິກິດການໃໝ່ທີ່່ຮ້າຍແຮງໄດ້ແຜ່ລະບາດໄປຢ່າງວ່ອງໄວ ເພີ່ມຄວາມກົດດັນໃຫ້ທຸກໆຝ່າຍ ທີ່ສາມັກຄີຮ່ວມໃຈກັນໃຊ້ຊັບພະຍາກອນສາທາລະນະສຸກເກືອບທັງໝົດໃນໂລກ ເພື່ອຄວບຄຸມການແຜ່ລະບາດຂອງເຊື້ອໄວຣັສດັ່ງກ່າວ.

ເນື້ອໃນຂອງຖະແຫຼງການລະບຸວ່າ ຂະນະທີ່ ການຍົກລະດັບໃຫ້ກັບກົນລະຍຸດໃນທຸກດ້ານເພື່ອຢຸດຢັ້ງເຊື້ອໄວຣັສໂຄວິດ-19 ເປັນສິ່ງທີ່ທຸກພາກສ່ວນເອົາໃຈໃສ່ໃຫ້ຄວາມສຳຄັນເປັນອັນດັບຕົ້ນໆ ແຕ່ໃນເວລາດຽວກັນ ການສົ່ງມອບຢາຕ້ານເຊື້ອໃຫ້ແກ່ເດັກນ້ອຍກໍ່ເປັນພາລະກິດໜຶ່ງທີ່ທຸກຝ່າຍໄດ້ໃຫ້ຄວາມສຳຄັນເຊັ່ນກັນ ເນື່ອງຈາກວ່າຢາຕ້ານເຊື້ອພະຍາດໝາກແດງຊ່ວຍປົກປ້ອງ “ອີກຫຼາຍລ້ານຊີວິດ”. ຢ່າງໃດກໍ່ຕາມ, ຍ້ອນວ່າຫຼາຍປະເທດຍົກສູງລະດັບມາດຕະການຄວບຄຸມຊາຍແດນ ແລະ ຈຳກັດບໍລິການດ້ານສາທາລະນະສຸກ ຈຶ່ງເປັນເງື່ອນໄຂທີ່ເຮັດໃຫ້ຄວາມຫຼ້າຊ້າໃຫ້ແກ່ພາລະກິດແຈກຈ່າຍຢາຕ້ານເຊື້ອ.

ທັງນີ້ ລາຍງານຂອງອົງການອະນາໄມໂລກ ທີ່ໄດ້ເຜີຍແຜ່ ເມື່ອເດືອນທັນວາ ປີຜ່ານມາ ອີງຕາມຕົວເລກຂອງຜູ້ຕິດເຊື້ອໝາກແດງໃນທົ່ວໂລກ ເກືອບ 10 ລ້ານຄົນ ໃນປີ 2018, ໃນນັ້ນ ເສຍຊີວິດປະມານ 140.000 ຄົນ. ສ່ວນໃຫຍ່ເປັນເດັກນ້ອຍ ອົງການ WAO: World Allergy Organization ແລະ ອົງການອື່ນໆ ຢືນຢັນກົງກັນ ວ່າ ພະຍາດໝາກແດງຍັງສາມາດລະບາດຕໍ່ກັນໄດ້ຢ່າງວ່ອງໄວ ແຕ່ສາມາດປ້ອງກັນໄດ້ໂດຍການສັກຢາກັນພະຍາດໃຫ້ແກ່ຄົນກຸ່ມໃຫຍ່ ເຊິ່ງ ໝາຍເຖິງເດັກເກີດໃໝ່ ແລະ ເດັກນ້ອຍ ທີ່ໄດ້ຮັບການສັກຢາປ້ອງກັນຂັ້ນພື້ນຖານ ລວມທັງພະຍາດໂປລີໂອດ້ວຍ.