ນະຄອນນິວຢອກມີຜູ້ເສຍຊີວິດຈາກໂຄວິດ-19 ຫຼາຍກວ່າ 10 ພັນຄົນ

10

ຍອດຜູ້ເສຍຊີວິດຈາກໄວຣັສໂຄວິດ-19 ໃນລັດນິວຢອກຂອງສະຫະລັດ ເພິ່ມຂຶ້ນຫຼາຍກວ່າ 10.000 ຄົນ ຂະນະທີ່ ເຈົ້າຄອງນະຄອນຢືນຢັນບໍ່ຜ່ອນຜັນມາດຕະການປິດເມືອງທັນທີ.

ສຳນັກຂ່າວຕ່າງປະເທດລາຍງານຈາກນະຄອນນິວຢອກ ສະຫະລັດ ອາເມຣິກາ ເມື່ອວັນຈັນ ທີ 13 ເມສາ ວ່າ ທ່ານແອນດຣູ ຄູໂອໂມ ເຈົ້າຄອງນະຄອນນິວຢອກ ຖະແຫຼງການເມື່ອວັນຈັນ ວ່າ ຜູ້ເສຍຊີວິດສະສົມຈາກໂຄວິດ-19 ໃນພື້ນທີ່ເພິ່ມເປັນຢ່າງໜ້ອຍ 10.056 ຄົນ ພາຍຫຼັງໄດ້ມີການຢືນຢັນຜູ້ເສຍຊິວິດ 671 ຄົນ ໃນຮອບ 24 ຊົ່ວໂມງ ຜ່ານມາ ຂະນະທີ່ ຜູ້ປ່ວຍສະສົມເພິ່ມເປັນຢ່າງໜ້ອຍ 195.565 ຄົນ ໂດຍມີການຢືນຢັນຜູ້ຕິດເຊື້ອໃໝ່ເພິ່ມອີກ 6.240 ຄົນ.

ເຖິງວ່າຜູ້ທີ່ເສຍຊີວິດສະສົມຈາກໂຄວິດ-19 ໃນລັດນິວຢອກ ຫຼາຍກວ່າ 10.000 ຄົນ ແຕ່ ທ່ານຄູໂອໂມ ເຫັນວ່າ ສະຖານະການແຜ່ລະບາດໃນພື້ນທີ່ວິກິດທີ່ສຸດນັ້ນ ໄດ້ຜ່ານພົ້ນແລ້ວ ເນື່ອງຈາກວ່າ ຜູ້ປ່ວຍທີ່ມີອາການຮ້າຍແຮງມີທ່າອ່ຽວຊົງຕົວ ເຖິງວ່າ ເຈົ້າຄອງນະຄອນນິວຢອກຍັງມີຄວາມກັງວົນກ່ຽວກັບ ການແຜ່ລະບາດຈະເກີດຂຶ້ນຮອບສອງ ຖ້າມີການຜ່ອນຜັນມາດຕະການຕ່າງໆໄວເກີນໄປ.

ຢ່າງໃດກໍ່ຕາມ, ທ່ານຄູໂອໂມ ກ່າວວ່າ ປັດຈຸບັນ ທ່ານກຳລັງປຶກສາຫາລືກັບເຈົ້າຄອງລັດໃກ້ຄຽງຝັ່ງທິດຕາເວັນອອກ ໄດ້ແກ່ລັດນິວເຈີຊີ, ລັດຄອນເນັດທິຄັດ, ລັດເພນຊິລເວເນຍ ແລະ ລັດໂຣດໄອແລນ. ເພື່ອຈັດຕັ້ງຄະນະເຮັດວຽກສະເພາະກິດຮ່ວມກັນ ໃນການກັບມາເປີດເມືອງພ້ອມກັນແບບມີລະບົບ ເຊັ່ນດຽວກັນ ທ່ານກາວິນ ນິວຊອມ ເຈົ້າຄອງລັດແຄລິຟໍເນຍ ເຊິ່ງໄດ້ກ່າວວ່າ ກຳລັງປຶກສາຫາລືກັບເຈົ້າຄອງຫຼາຍລັດທາງຝັ່ງທິດຕາເວັນຕົກ ລວມທັງລັດໂອຣິກອນ ແລະ ລັດວໍຊິງຕັນ ໃນການກັບມາເປີດເມືອງ ແລະ ວາງມາດຕະການຄວບຄຸມພະຍາດຮ່ວມກັນ.

ດ້ານ ປະທານາທິບໍດີໂດນັລ ທຣຳ ກ່າວວ່າ ຂະບວນການທັງໝົດທີ່ເຈົ້າຄອງລັດທັງຫຼາຍໄດ້ວາງແຜນນັ້ນ ແຕ່ການຕັດສິນໃຈ “ຂັ້ນສຸດທ້າຍ” ແມ່ນຂຶ້ນຢູ່ກັບຕົນ. ນອກຈາກນີ້, ຜູ້ນຳ ສະຫະລັດ ກ່າວວ່າ ບໍ່ໄດ້ມີແຜນທີ່ຈະປົດ ທ່ານດຣ.ແອນໂທນີ ເຟົາຊີ ອອກຈາກ ຕຳແໜ່ງຜູ້ອຳນວຍການສະຖາບັນພະຍາດຕິດຕໍ່ ແລະ ພະຍາດພູມແພ້ແຫ່ງຊາດຂອງສະຫະລັດ (NIH: National Institutes of Health). ເຖິງວ່າ ທ່ານດຣ. ແອນໂທນີ ໄດ້ມີຄວາມຄິດເຫັນທີ່ແຕກຕ່າງໃນຫຼາຍປະເດັນກ່ຽວກັບໂຄວິດ-19.