ມຽນມາ ເພິ່ມໄລຍະຫ້າມຖ້ຽວບິນຕ່າງປະເທດລົງຈອດຈົນໝົດເດືອນເມສານີ້

18

ທ່ານນາງອອງ ຊານ ຊູຈີ ຂະຫຍາຍໄລຍະຫ້າມຖ້ຽວບິນລະຫວ່າງປະເທດລົງຈອດໃນມຽນມາ ຈົນເຖິງວັນທີ 30 ເມສາ ແລະ ເພິ່ມໄລຍະການກັກຕົວຜູ້ທີ່ເດີນທາງມາຈາກຕ່າງປະເທດ ເປັນ 21 ວັນ.

ສຳນັກຂ່າວຕ່າງປະເທດລາຍງານຈາກເມືອງຢາງກຸ້ງ ປະເທດມຽນມາ ເມື່ອວັນຈັນ ທີ 13 ເມສາ ວ່າ ກະຊວງສາທາລະນະສຸກມຽນມາ ອອກຖະແຫຼງການ ເມື່ອວັນຈັນ ລາຍງານສະພາບການຂອງໂຄວິດ-19 ວ່າ ຜູ້ປ່ວຍສະສົມເພິ່ມເປັນຢ່າງໜ້ອຍ 41 ຄົນ ນັບແຕ່ ມີການກວດພົນຜູ້ຕິດເຊື້ອ 2 ຄົນທຳອິດ ເມື່ອວັນທີ 23 ມີນາ ຜ່ານມາ ໂດຍຜູ້ທີ່ໄດ້ຮັບການປິ່ນປົວເຊົາແລ້ວ 2 ຄົນ ແຕ່ວ່າມີຜູ້ເສຍຊີວິດເພິ່ມເປັນຢ່າງໜ້ອຍ 4 ຄົນ. ເຊິ່ງຫຼ້າສຸດແມ່ນຜູ້ປ່ວຍຄົນທີ 39 ແມ່ຍິງຄົນມຽນມາ ອາຍຸ 85 ປີ ເສຍຊີວິດຢູ່ໂຮງໝໍກາງ ຂອງເມືອງຢາງກຸ່ງ ເມື່ອວັນອາທິດ ທີ 12 ເມສາ ຜ່ານມາ.

ທ່ານນາງອອງ ຊານ ຊູຈີ ລັດຖະມົນຕີກະຊວງການຕ່າງປະເທດມຽນມາ ມີຄຳສັ່ງໃຫ້ຂະຫຍາຍໄລຍະຫ້າມຖ້ຽວບິນຈາກຕ່າງປະເທດ ລົງຈອດ ໂດຍເລິ່ມບັງຄັບໃຊ້ ຕັ້ງແຕ່ວັນທີ 30 ມີນາ ຜ່ານມາ ໃຫ້ສິ້ນສຸດໃນວັນທີ 30 ເມສາ ນີ້ ເຊິ່ງຂະຫຍາຍຈາກກຳນົດເກົ່າທີ່ຈະສິ້ນສຸດລົງໃນວັນທີ 13 ເມສາ ແລະ ໄດ້ຂະຫຍາຍໄລຍະການກັກຕົວການເຝົ້າລະວັງເຊື້ອຈາກ 14 ວັນ ເປັນ 21 ວັນ.

ທັງນີ້, ສະພາແຫ່ງລັດ ແລະ ກະຊວງສາທາລະນະສຸກມຽນມາ ໄດ້ໃຫ້ເຫດຜົນກ່ຽວກັບການປ່ຽນແປງດັ່ງກ່າວກົງກັນ ວ່າ ເພື່ອສອດຄ່ອງກັບນະໂຍບາຍການຄວບຄຸມເຊື້ອໄວຣັສຂອງລັດຖະບານປະເທດໄທ ເຊິ່ງໄດ້ປະກາດສະຖານະການສຸກເສີນຈົນເຖິງວັນທີ 30 ເມສາ ນີ້. ຂະນະທີ່ ຫຼາຍຈັງຫວັດຂອງປະເທດໄທໄດ້ປະກາດການປິດເມືອງຕົນເອງ ເຊັ່ນ: ຈັງຫວັດພູເກັດເປັນຕົ້ນ. ສະນັ້ນ, ຈຶ່ງມີຄວາມເປັນໄປໄດ້ສູງວ່າ ຈະມີຊາວມຽນມາໃນປະເທດໄທມີຄວາມປະສົງຈະເດີນທາງກັບຖິ່ນຖານ ລໍຖ້າເດີນທາງຫຼັງຈາກນັ້ນ.