ຜູ້ນຳຣັສເຊຍ ມອບເງິນໂບນັສໃຫ້ບຸກຄະລາກອນແພດ

15

ປະທານາທິບໍດີຣັສເຊຍ ມອບເງິນໂບນັສໃຫ້ແກ່ບຸກຄະລາກອນແພດ ເຊິ່ງຖືວ່າເປັນເຈົ້ົ້າໜ້າທີ່ແນວໜ້າ ໃນການຕໍ່ສູ້ກັບການລະບາດຂອງໄວຣັສໂຄວິດ-19.

ສຳນັກຂ່າວເອເອັຟພີລາຍງານຈາກນະຄອນຫຼວງມອສໂກ ປະເທດຣັສເຊຍ ເມື່ອວັນພະຫັດ ທີ 9 ເມສາ ວ່າ ປະທານາທິບໍດີວະລາດິເມຍ ປູຕິນ ຂອງຣັສເຊຍ ຖະແຫຼງການ ກ່ຽວກັບມາດຕະການຫຼາຍຢ່າງເພື່ອຢຸດຢັ້ງການແຜ່ລະບາດຂອງໄວຣັສໂຄໂຣນາສານພັນໃໝ່ ຫຼື ໂຄວິດ-19 ເຊິ່ງກວດພົບຜູ້ຕິດເຊື້ອໃໝ່ເພິ່ມ 1.175 ຄົນແລ້ວ ເຮັດໃຫ້ມີຜູ້ປ່ວຍສະສົມທົ່ວປະເທດ 8.672 ຄົນ ໂດຍສູນກາງການແຜ່ລະບາດຢູ່ນະຄອນຫຼວງມອສໂກ ທີ່ກວດພົບປະຊາຊົນຕິດເຊື້ອ 5.841 ຄົນ ແລະ ເສຍຊີວິດ 63 ຄົນ ປະທານາທິບໍດີວະລາດິເມຍ ປູດິນ ຮຽກຮ້ອງໃຫ້ປະຊາຊົນຢຶດໝັ້ນ ແລະ ອົດທົນກັບມາດຕະການປິດເມືອງ ເພື່ອຊ່ວຍຫຼຸດການແຜ່ລະບາດ.

ນອກຈາກນັ້ນແລ້ວ ປະທານາທິບໍດີວະລາດິເມຍ ປູຕິນ ໄດ້ປະກາດອັດສີດເງິນ 10 ຕື້ຣູເບິລ (ປະມານ 1.200 ຕື້ກີບ) ເປັນໂບນັສປະຈຳເດືອນ ໃຫ້ແກ່ບຸກຄະລາກອນແພດ ເຊິ່ງຖືເປັນເຈົ້າໜ້າທີ່ແນວໜ້າ ໃນການຕໍ່ຕ້ານກັບການແຜ່ລະບາດຂອງເຊື້ອໄວຣັສໃນທົ່ວປະເທດ ໂດຍບັນດາແພດທີ່ປິ່ນປົວຜູ້ຕິດເຊື້ອຈະໄດ້ຮັບເງິນໂບນັສເພິ່ມເດືອນລະ 80.000 ຣູເບິລ ຫຼື ປະມານ 9.600.000 ກີບ . ຂະນະທີ່ໜ່ວຍພະຍາບານກູ້ຊີບ ແລະ ຜູ້ຂັບລົດຂົນສົ່ງຜູ້ປ່ວຍຈະໄດ້ຮັບເງິນເພິ່ມຂຶ້ນເດືອນລະ 25.000-50.000 ຣູເບິລ ຫຼື ປະມານ 3.000.000 – 6.000.000 ກີບ ທ່ານປູຕິນ ໄດ້ກ່າວຢໍ້າອີກວ່າ ບຸກຄະລາກອນແພດເຫຼົ່ານີ້ເປັນຜູ້ຊ່ຽວຊານພິເສດທີ່ຢູ່ແນວໜ້າ ແລະ ຍັງໄດ້ສັ່ງໃຫ້ເພິ່ມປະກັນຊີວິດຂອງລັດໃຫ້ກັບເຈົ້າໜ້າທີ່ເຫຼົ່ານີ້ເທົ່າທຽມກັບເຈົ້າໜ້າທີ່ຂອງກອງທັບ.