ສະຖິຕິໂຄວິດ-19 ໃນອິນໂດເນເຊຍ ແລະ ຟີລິບປິນ ເພິ່ມຂຶ້ນຢ່າງວ່ອງໄວ

29

ກໍລະນີຜູ້ປ່ວຍປະຈໍາວັນຈາກການຕິດເຊື້ອໂຄວິດ-19 ໃນປະເທດອິນໂດເນເຊຍເພິ່ມຂຶ້ນຫຼາຍທີ່ສຸດ ເຊັ່ນດຽວກັບສະຖະຕິຜູ້ເສຍຊິວິດປະຈຳວັນໃນຟີລິບປິນ ເພິ່ມຂຶ້ນ 29 ຄົນ ໃນມື້ດຽວ

ສຳນັກຂ່າວຕ່າງປະເທດລາຍງານຈາກນະຄອນຫຼວງຈາກາຕາ ປະເທດອິນໂດເນເຊຍ ເມື່ອວັນເສົາ ທີ 4 ເມສາ ວ່າ ກະຊວງສາທາລະນະສຸກອິນໂດເນເຊຍໄດ້ອອກຖະແຫຼງການ ເມື່ອວັນສຸກ ຜ່ານມາ ວ່າ ຈຳນວນຜູ້ຕິດເຊື້ອໄວຣັສໂຄໂຣນາສາຍພັນໃໝ່ ໃນປະເທດເພິ່ມຂຶ້ນ 196 ຄົນ ພາຍໃນມື້ດຽວ ຖືເປັນສະຖິຕິປະຈຳວັນຫຼາຍທີ່ສຸດ ນັບຕັ້ງແຕ່ມີການຢືນຢັນຜູ້ປ່ວຍຄົນທຳອິດ ເມື່ອວັນທີ 2 ມີນາ ຜ່ານມາ ເຮັດໃຫ້ສະຖິຕິຜູ້ປ່ວຍສະສົມເພິ່ມຂຶ້ນ ຢ່າງໜ້ອຍ 1.986 ຄົນ ແລະ ປິ່ນປົວເຊົາແລ້ວ 134 ຄົນ ຢ່າງໃດກໍ່ຕາມ, ມີຜູ້ເສຍຊີວິດເພິ່ມອີກ 11 ຄົນ ລວມສະຖິຕິຢ່າງໜ້ອຍ 181 ຄົນ.

ຂະນະທີ່ ສຳນັກງານຕຳຫຼວດແຫ່ງຊາດອິນໂດເນເຊຍ ເລິ່ມປະກາດມາດຕະການຄວບຄຸມການເຄື່ອນໄຫວຢູ່ນອກເຮືອນຂອງປະຊາຊົນ ລະຫວ່າງວິກິດການແຜ່ການລະບາດ ເຊິ່ງລວມເຖິງການຫ້າມເດີນທາງອອກນອກຂອບເຂດ ໃນໄລຍະເທສະການອີດິຟິຕຣີ ຕາມປະຕິທິນສາສະໜາຂອງປີນີ້ ຄືໄລຍະກາງເດືອນພຶດສະພາ. ດ້ານຫ້ອງການນະຄອນຫຼວງຈາກາຕາປະກາດຕັດສິນໂທດ ຈຳຄຸກສູງສຸດ 1 ປີ ແລະ / ຫຼື ປັບໄໝສູງສຸດ 100 ລ້ານຣູເປຍ (ປະມານ 59,7 ລ້ານກີບ) ກັບຜູ້ທີ່ລະເມີດຄຳສັ່ງກັກບໍລິເວນ ແລະ ການເຕົ້າໂຮມຢູ່ນອກເຮືອນ.

ໃນວັນດຽວກັນ ກະຊວງສາທາລະນະສຸກຟີລິບປິນລາຍງານວ່າ ມີຜູ້ເສຍຊີວິດຈາກໂຄວິດ-19 ເພິ່ມອີກ 29 ຄົນ ພາຍໃນມື້ດຽວ ຖືເປັນສະຖິຕິປະຈຳວັນສູງທີ່ສຸດ ນັບຕັ້ງແຕ່ໄດ້ຮັບການຢືນຢັນຜູ້ເສຍຊີວິດຄົນທຳອິດເປັນນັກທ່ອງທ່ຽວຊາຍຊາວຈີນ ເມື່ອວັນທີ 2 ກຸມພາ ຜ່ານມາ ເພິ່ມຈຳນວນຜູ້ເສຍຊີວິດ ຢ່າງໜ້ອຍ 136 ຄົນ ສ່ວນຜູ້ປ່ວຍປະຈຳວັນເພິ່ມອີກ 385 ຄົນ ເຮັດໃຫ້ເພິ່ມສະຖິຕິຜູ້ຕິດເຊື້ອຢ່າງໜ້ອຍ 3.018 ຄົນ ແລະ ປິ່ນປົວເຊົາແລ້ວ 52 ຄົນ.

ທັງນີ້, ປະທານາທິບໍດີໂຣດຣິໂກ ດູເຕເຕ ຢືນຢັນການຈັດສັນງົບປະມານ ຢ່າງໜ້ອຍ 200 ຕື້ເປໂຊ (ປະມານ 83 ພັນຕື້ກີບ) ເພື່ອຊ່ວຍເຫຼືອທຸກຂະແໜງການທີ່ໄດ້ຮັບຜົນກະທົບຈາກການແຜ່ລະບາດຂອງໄວຣັສໂຄວິດ-19 ໂດຍຄົວເຮືອນທີ່ມີລາຍໄດ້ຕໍ່າຈະໄດ້ຮັບເງິນ ຊ່ວຍເຫຼືອເປັນໄລຍະ 2 ເດືອນ ໂດຍຄິດໄລ່ຕາມມາດຕະຖານເງິນຄ່າຈ້າງຂັ້ນຕໍ່າ.