ຈີນຢືນສະຫງົບທົ່ວປະເທດ ເພື່ອໄວ້ອາໄລໃຫ້ແກ່ຜູ້ທີ່ເສຍຊີວິດຈາກໂຄວິດ-19

11

ປະຊາຊົນຈີນຮ່ວມກັນຢືນສະຫງົບ 3 ນາທີ ເພື່ອລະນຶກເຖິງຜູ້ເສຍຊີວິດ ກວ່າ 3.000 ຄົນ ຈາກວິກິດການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່.

ສຳນັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນເສົາ ທີ 4 ເມສາ ວ່າ ປະທານປະເທດສີຈິ້ນຜິງ ແລະ ສະມາຊິກຄະນະກົມການເມືອງຖາວອນຂອງພັກຄອມມູນິດ ນຳພາປະຊາຊົນຈີນທົ່ວປະເທດມາຮ່ວມກັນຢືນສະຫງົບ 3 ນາທີ ແລະ ຫຼຸດທຸງຊາດລົງມາເຄິ່ງເສົາ ເພື່ອໄວ້ອາໄລໃຫ້ແກ່ຜູ້ທີ່ເສຍຊີວິດຈາກວິກິດການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ ຫຼື ໂຄວິດ-19 ເມື່ອເວລາ 10:00 ໂມງເຊົ້າ ຕາມເວລາທ້ອງຖິ່ນ (9:00 ໂມງຕາມເວລາໃນປະເທດລາວ).

ທັງນີ້ ສູນກາງການແຜ່ລະບາດຂອງໂຄວິດ-19 ໃນປະເທດຈີນ ແມ່ນຢູ່ໃນເມືອງອູ໋ຮັ່ນ ເມືອງໃຫຍ່ຂອງມົນທົນຫູເປີ່ຍ ເຊິ່ງເປັນເມືອງທຳອິດຂອງປະເທດຈີນທີ່ມີການຢືນຢັນຜູ້ປ່ວຍ ເມື່ອເດືອນທັນວາ ປີຜ່ານມາ ຂະນະທີ່ ສະຖິຕິມາຮອດວັນທີ 4 ເມສາ 2020 ມີຜູ້ເສຍຊີວິດສະສົມ ຢ່າງໜ້ອຍ 3.326 ຄົນ ຈາກຈຳນວນຜູ້ປ່ວຍສະສົມ ຢ່າງໜ້ອຍ 81.639 ຄົນ ແລະ ປິ່ນປົວເຊົາແລ້ວ 76.755 ຄົນ ຄາດວ່າຍັງມີຜູ້ປ່ວຍໃນລະບົບອີກຢ່າງໜ້ອຍ 1.558 ຄົນ ເທົ່ານັ້ນ.

ຢ່າງໃດກໍ່ຕາມ, ຈາກຈຳນວນຜູ້ປ່ວຍ ແລະ ຜູ້ເສຍຊີວິດ ທີ່ໄດ້ຮັບການຢືນຢັນນັ້ນ ເປັນບຸກຄະລາກອນການແພດຫຼາຍກວ່າ 3.000 ຄົນ ແລະ ເສຍຊີວິດຢ່າງໜ້ອຍ 14 ຄົນ ສ່ວນຫຼາຍຢູ່ໃນເມືອງອູ໋ຮັ່ນ ໂດຍໜຶ່ງໃນນັ້ນແມ່ນທ່ານດຣ.ຫຼີ່ ເຫວີນຫຼຽງ ອາຍຸ 34 ປີ ຊ່ຽວຊານດ້ານສາຍຕາ ເປັນຄົນເມືອງອູ໋ຮັ່ນ ເຊິ່ງເສຍຊີວິດຈາກໂຄວິດ-19 ເມື່ອຕົ້ນເດືອນກຸມພາ ຜ່ານມາ ໂດຍ ທ່ານດຣ.ຫຼີ່ ເປັນໜຶ່ງໃນບັນດາແພດກຸ່ມທຳອິດທີ່ພະຍາຍາມເຕືອນທຸກພາກສ່ວນກ່ຽວກັບ “ເຊື້ອໄວຣັສລະບາດເກີດຂື້ນໃໝ່ ທີ່ຄ້າຍກັບໄວຣັສຊາສ໌” ຕັ້ງແຕ່ທ້າຍປີ ຜ່ານມາ ແຕ່ຖືກດຳເນີນຄະດີໂທດຖານ “ປ່ອຍຂ່າວປອມ” ຫຼັງຈາກນັ້ນ ລັດຖະບານກາງໃນນະຄອນຫຼວງປັກກິ່ງໄດ້ເດີນທາງລົງມາສືບສວນດ້ວຍຕົວເອງ ແລະ ມີການປົດ ຕຳແໜ່ງເລຂາທິການໃຫຍ່ພັກກອມມູນິດປະຈຳມົນທົນຫູເປີ່ຍ ພ້ອມກັບເຈົ້າໜ້າທີ່ຂັ້ນສູງຂອງມົນທົນອີກຫຼາຍທ່ານ.