ຈີນຈະຈັດພິທີລະນຶກເຖິງຜູ້ເສຍຊີວິດໃນການຕໍ່ສູ້ກັບໄວຣັສ

15

ຈີນຈະຈັດພິທີລະນຶກທົ່ວປະເທດໃຫ້ແກ່ຜູ້ທີ່ເສຍຊີວິດໃນການຕໍ່ສູ້ກັບການແຜ່ລະບາດຂອງໄວຣັສ ໂຄວິດ-19 ລວມທັງບຸກຄະລາກອນແພດ 14 ຄົນ ໃນວັນເສົາ ທີ 4 ເມສາ ນີ້.

ສຳນັກຂ່າວເອເອັຟພີ ລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນສຸກ ທີ 3 ເມສາ ວ່າ ຖະແຫຼງການຈາກສະພາແຫ່ງລັດຂອງຈີນລະບຸວ່າ ລັດຖະບານຈີນຈະຈັດພິທີລະນຶກທົ່ວປະເທດ ໃຫ້ແກ່ຜູ້ທີ່ເສຍຊີວິດຈາກການຕໍ່ສູ້ກັບການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ ຫຼື ໂຄວິດ-19 ໃນວັນເສົາ ທີ 4 ເມສາ ນີ້ ເລິ່ມຕັ້ງແຕ່ 10:00 ໂມງ ເປັນຕົ້ນໄປ ປະຊາຊົນທົ່ວປະເທດຈະຢືນສະຫງົບ 3 ນາທີ, ລົດ, ລົດໄຟ ແລະ ເຮືອທຸກລຳຈະເປີດຫວູດ ເຊັ່ນດຽວກັບສຽງແກ ແລະ ສຽງເຕືອນໄພ ດັງກ້ອງໄປທົ່ວ ຈະມີການດຶງທຸງຊາດລົງມາເຄິ່ງເສົາທົ່ວປະເທດຕາມສະຖານທີ່ລັດຖະການ ແລະ ເອກະຊົນ ລວມທັງສະຖານທູດ ແລະ ສະຖານທູດຈີນປະຈຳຕ່າງປະເທດ. ນອກຈາກນີ້, ກໍ່ຈະງົດກິດຈະກຳບັນເທີງທັງໝົດ ເພື່ອເປັນການລະນຶກເຖິງຜູ້ທີ່ເສຍຊີວິດ.

ສຳນັກຂ່າວຊິນຫົວ ລາຍງານດ້ວຍວ່າ ເມື່ອວັນພະຫັດ ຜ່ານມາ ທາງການຈີນ ໄດ້ເປີດເຜີຍລາຍຊື່ ຄົນຈີນ ທັງ 14 ຄົນ ວ່າ ເປັນການເສຍສະຫຼະເພື່ອປະເທດຊາດ ບຸກຄົນເຫຼົ່ານີ້ເປັນແບບຢ່າງທີ່ດີໃນຖານະບຸກຄະລາກອນດ້ານການແພດທີ່ເປັນແນວໜ້າ ປະຕິບັດໜ້າທີ່ປ້ອງກັນການແຜ່ລະບາດຂອງໄວຣັສ. ໂດຍໃນຈຳນວນນີ້ ປະກອບມີທ່ານດຣ.ຫຼີ່ ເຫວີນຫຼຽງ ເຊິ່ງເຄີຍຖືກຕຳຫຼວດກັກຕົວ ຫຼັງຈາກໂພສຂໍ້ມູນລົງໃນໂຊຊຽວມີເດຍເລື່ອງການເຕືອນໄພໃຫ້ປະຊາຊົນລະມັດລະວັງການແຜ່ລະບາດໄວຣັສທີ່ຮ້າຍແຮງຄ້າຍກັບໄວຣັສຊາສ໌ທີ່ກຳລັງລະບາດຢູ່ເມືອງທີ່ຕົນອາໄສ ຈົນເສຍຊີວິດລົງເມື່ອເດືອນກຸມພາ ຜ່ານມາ ເຮັດໃຫ້ປະຊາຊົນທົ່ວປະເທດເສຍໃຈ ແລະ ຄຽດແຄ້ນຕໍ່ມາດຕະການຂອງລັດຖະບານໃນການແກ້ໄຂວິກິດການລະບາດຮ້າຍແຮງຄັ້ງນີ້ ໂດຍສະເພາະປະເດັນສຳຄັນເລື່ອງເສລີພາບໃນການສະແດງອອກ.

ຈີນກວດພົບການຕິດເຊື້ອໄວຣັສໂຄວິດ-19 ຄັ້ງທຳອິດເມື່ອເດືອນທັນວາ ປີ 2019 ຜ່ານມາ ໃນມົນທົນຫູເປີ່ຍ ເຂດພາກກາງຂອງປະເທດ ຈົນແຜ່ລະບາດຢ່າງໄວວາ ພາກຊີວິດປະຊາຊົນຈີນ ກວ່າ 3.200 ຄົນ.