2 ອາທິດ! ໂຄວິດ-19 ສ້າງຜົນກະທົບໃຫ້ຄົນອາເມຣິກາ 10 ລ້ານຄົນ ບໍ່ມີວຽກເຮັດ

27

ພຽງ 2 ອາທິດ ເທົ່ານັ້ນ ຄົນອາເມຣິກາ 10 ລ້ານຄົນ ບໍ່ມີວຽກເຮັດງານທຳ ຈາກວິກິດການຂອງການແຜ່ລະບາດຂອງໄວຣັສໂຄໂຣນາສາຍພັນໃໝ່.

ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ສະຫະລັດ ອາເມຣິກາ ເມື່ອວັນສຸກ ທີ 3 ເມສາ ວ່າ ກະຊວງແຮງງານສະຫະລັດໄດ້ເປີດເຜີຍບົດລາຍງານ ເມື່ອວັນພະຫັດ ຜ່ານມາ ວ່າ ປະຊາຊົນ ອາເມຣິກາ ໄດ້ລົງທະບຽນເປັນຄົນຫວ່າງວຽກ ໃນຮອບອາທິດຜ່ານມາ ຈົນເຖິງວັນທີ 28 ມີນາ ຜ່ານມາ ຫຼາຍກວ່າ 6,6 ລ້ານຄົນ ເພິ່ມຂຶ້ນສອງເທົ່າຈາກສະຖິຕິອາທິດກ່ອນໜ້າ ທີ່ມີຜູ້ຈົດທະບຽນຫວ່າງວຽກເກືອບ 3,3 ລ້ານຄົນ ເຊິ່ງເປັນຜົນມາຈາກຜູ້ຫວ່າງວຽກສະສົມສະຫະລັດ ອາເມຣິກາ ໃນໄລຍະພຽງ 14 ວັນ ສູງເຖິງ 9,9 ລ້ານຄົນ.

ເຖິງວ່າລັດຖະບານກາງຂອງປະທານາທິບໍດີໂດນັລ ທຣຳ ຍັງບໍ່ໄດ້ປະກາດຄຳສັ່ງປິດເມືອງໃນລະດັບປະເທດ ແຕ່ເຈົ້າຄອງລັດໃຫຍ່ຫຼາຍແຫ່ງປະກາດມາດຕະການຄວບຄຸມການເຄື່ອນທີ່ຂອງປະຊາຊົນບໍ່ໃຫ້ອອກນອກບ້ານເຮືອນຢ່າງເຂັ້ມງວດແຕ່ລະເຂດຕາມຄວາມເໝາະສົມທີ່ແຕກຕ່າງກັນ ສົ່ງຜົນກະທົບຕໍ່ການດຳລົງຊີວິດຂອງຊາວອາເມລິກັນຫຼາຍກວ່າ 80% ທີ່ຕ້ອງຢູ່ພາຍໃນທີ່ພັກອາໄສ ແລະ ເຮັດວຽກຢູ່ເຮືອນ ສະຖານທີ່ປະກອບການເກືອບທັງໝົດໂຈະການບໍລິການແບບບໍ່ມີກຳນົດ.

ທັງນີ້ ທະນາຄານອາເມຣິກາ ປະເມີນວ່າ ຖ້າສະຖານະການຍືດເຍື້ອດົນ ທ່າອ່ຽງການຫວ່າງວຽກຂອງຊາວອາເມລິກັນອາດຈະສູງເຖິງ 15% ຫຼາຍທີ່ສຸດນັບຕັ້ງແຕ່ຍຸກເສດຖະກິດຕົກຕໍ່າ ຫຼັງຈາກສົງຄາມໂລກຄັ້ງທີ 1. ດ້ານທ່ານສະຕິຟ ມະນູຊິນ ລັດຖະມົນຕີກະຊວງການເງິນອາເມຣິກາ ຢືນຢັນວ່າ ທຸລະກິດຂະ ໜາດນ້ອຍ ແລະ ກາງ ທີ່ມີພະນັກງານບໍ່ເກີນ 500 ຄົນ ຈະສາມາດເຂົ້າເຖິງເງິນຊ່ວຍເຫຼືອ 350 ຕື້ໂດລາ (ປະມານ 3,1 ລ້ານຕື້ກີບ) ຢ່າງແນ່ນອນ ທັງໃນຮູບແບບການຊ່ວຍເຫຼືອລ້າ ແລະ ເງິນກູ້ດອກເບ້ຍຕໍ່າ ໂດຍທະນາຄານຈະເລິ່ມຮັບຄຳຮ້ອງຈາກເຈົ້າຂອງທຸລະກິດ ຕັ້ງແຕ່ວັນສຸກ ທີ 3 ເມສາ ນີ້.

ນອກຈາກນີ້, ທ່ານມະນູຊິນ ຍັງຢືນຢັນເງິນຊ່ວຍເຫຼືອການຈ່າຍເງິນຊ່ວຍເຫຼືອຄັ້ງດຽວໃຫ້ແກ່ທຸກໆຄົວເຮືອນ ພາຍໃນ 2 ອາທິດ ໃນຮູບແບບແຊັກເງິນສົດ ແລະ ໂອນເງິນຜ່ານບັນຊີທະນາຄານ ໂດຍ ຄອບຄົວ “ຂະໜາດມາດຕະຖານ” ປະກອບດ້ວຍພໍ່, ແມ່ ແລະ ລູກສອງຄົນ ຈະໄດ້ຮັບເງິນຊ່ວຍເຫຼືອແບບເໝົາຈ່າຍ 3.000 ໂດລາ (ປະມານ 27 ລ້ານກີບ) ສ່ວນລາຍບຸກຄົນຈະໄດ້ຮັບເງິນຊ່ວຍເຫຼືອສູງສຸດ 1.200 ໂດລາ (10 ລ້ານກີບ). ແຕ່ກໍລະນີ ຜູ້ທີ່ມີລາຍໄດ້ຕໍ່ປີຫຼາຍກ່ວາ 90.000 ໂດລາ (ປະມານ 813 ລ້ານກີບ) ແລະ ຫຼາຍກວ່າ 198.000 ໂດລາ (ປະມານ 1,78 ຕື້ກີບ) ໃນຖານະຜົວເມຍ ແມ່ນບໍ່ໄດ້ຢູ່ໃນເງື່ອນໄຂການຊ່ວຍເຫຼືອ.