ນາຍົກກຳປູເຈຍ ມອບເງິນເດືອນ 7 ເດືອນ ຊ່ວຍປະເທດຕໍ່ສູ້ໂຄວິດ-19

43

ທ່ານສົມເດັດຮຸນ ເຊັນ ບໍລິຈາກເງິນເດືອນ 7 ເດືອນ ຈົນຮອດເດືອນກັນຍາ ນີ້ ເພື່ອສະໜັບສະໜູນພາລະກິດຂອງລັດຖະບານກຳປູເຈຍ ໃນການຕໍ່ສູ້ຕ້ານການແຜ່ລລະບາດຂອງເຊື້ອໄວຣັສໂຄໂຣນາສາຍພັນໃໝ່ໃນປະເທດ.

ສຳນັກຂ່າວຕ່າງປະເທດລາຍງານຈາກນະຄອນຫຼວງພະນົມເປັນ ປະເທດກຳປູເຈຍ ເມື່ອວັນພະຫັດ ທີ 2 ເມສາ ວ່າ ທ່ານສົມເດັດຮຸນ ເຊັນ ນາຍົກລັດຖະມົນຕີປະເທດກຳປູເຈຍ ສົ່ງເອກະສານເຖິງກະຊວງສາທາລະນະສຸກ ແລະ ກະຊວງການເງິນ ເມື່ອວັນພະຫັດ ວ່າ ຈະມີການໂອນມອບເງິນເດືອນຂອງນາຍົກ ທັງໝົດ 7 ເດືອນ ລະຫວ່າງເດືອນມີນາ ຈົນເຖິງ ເດືອນກັນຍາ ເຂົ້າໃນບັນຊີຂອງຄະນະກໍາມາທິການແຫ່ງຊາດເພື່ອຕໍ່ສູ້ຕ້ານເຊື້ອໄວຣັສໂຄວິດ-19 ຈາກໄວຣັສໂຄໂຣນາສາຍພັນໃໝ່.

ທັງນີ້ ລັດຖະບານກຳປູເຈຍ ໄດ້ຈັດຕັ້ງຄະນະໜ່ວຍງານພິເສດດັ່ງກ່າວຂຶ້ນ ເມື່ອເດືອນມີນາ ຜ່ານມາ ໂດຍມີທ່ານສົມເດັດຮຸນ ເຊັນ ເປັນປະທານຮ່ວມດ້ວຍເຈົ້າໜ້າທີ່ລະດັບສູງຂອງທຸກກະຊວງ, ກອງທັບ, ສຳນັກງານຕຳຫຼວດແຫ່ງຊາດ, ເຈົ້າແຂວງ ແລະ ຜູ້ຕາງໜ້າອົງການບໍລິຫານທ້ອງຖິ່ນ.

ເຖິງຍັງບໍ່ມີການເປີດເຜີຍຢ່າງເປັນທາງການ ວ່າ ເງິນເດືອນຂອງທ່ານສົມເດັດຮຸນ ເຊັນ ທັງໝົດ 7 ເດືອນ ລວມແລ້ວມີຈຳນວນເທົ່າໃດ ແຕ່ຜູ້ນຳກຳປູເຈຍກ່າວວ່າ ນັບຕັ້ງແຕ່ຄະນະເຮັດວຽກເລິ່ມປະຕິບັດໜ້າທີ່ ມີການມອບເງິນບໍລິຈາກຫຼາຍພາກສ່ວນເຂົ້າມາແລ້ວ ກວ່າ 10 ລ້ານໂດລາ (ປະມານ 89,49 ຕື້ກີບ).

ປັດຈຸບັນ ປະເທດກຳປູເຈຍ ມີຜູ້ປ່ວຍສະສົມຈາກເຊື້ອໄວຣັສໂຄວິດ-19 ຢ່າງໜ້ອຍ 110 ຄົນ, ປິ່ນປົວເຊົາແລ້ວ 34 ຄົນ ແລະ ຍັງບໍ່ມີຜູ້ເສຍຊີວິດ. ສຳລັບຜູ້ປ່ວຍຄົນທຳອິດໄດ້ຮັບການຢືນ ເມື່ອວັນທີ 27 ມັງກອນ ຜ່ານມາ ເປັນນັກທ່ອງທ່ຽວຊາຍຊາວຈີນ ອາຍຸ 60 ປີ ທີ່ເດີນທາງໄປເມືອງສີຫະນຸວິລ.