ໄພພິບັດທາງທຳມະຊາດ ສົ່ງຜົນກະທົບກັບປະເທດປາກິສຖານ-ອັຟການິສຖານ ປະຊາຊົນລົ້ມຕາຍຫຼາຍຄົນ

31

ຫິມະເຈື່ອນ, ນໍ້າຖ້ວມ ແລະ ອາກາດໜາວເຢັນ ເຮັດໃຫ້ມີຜູ້ເສຍຊີວິດແລ້ວ ກວ່າ 130 ຄົນ ໃນສອງປະເທດຄື ປາກິສຖານ ແລະ ອັຟການິສຖານ” ໃນໄລຍະຫຼາຍວັນຜ່ານມາ ຂະນະທີ່ ເຈົ້າໜ້າທີ່ໄດ້ພະຍາຍາມຊ່ວຍເຫຼືອປະຊາຊົນທີ່ຕົກຄ້າງໃນບໍລິເວນຫິມະຕົກໜັກ.

ສຳນັກຂ່າວເອເອັຟພີລາຍງານ ເມື່ອວັນພຸດ ທີ 14 ມັງກອນ ວ່າ ເຈົ້າໜ້າທີ່ຂອງປະເທດປາກິສຖານ ແລະ ອັຟການິສຖານ ເປີດເຜີຍວ່າ ພົບຜູ້ເສຍຊີວິດແລ້ວ 93 ຄົນ ແລະ ບາດເຈັບອີກ 76 ຄົນ ທົ່ວປະເທດປະກິສຖານ ຍັງມີຜູ້ສູນຫາຍອີກຫຼາຍຄົນຈາກໄພພິບັດທາງທຳມະຊາດທັງເຫດການຫິມະເຈື່ອນ, ນ້ຳຖ້ວມ  ແລະ ສະພາບອາກາດທີ່ໜາວເຢັນ ເນື່ອງຈາກຫິມະຕົກລົງມາຢ່າງໜັກ ສວນໃນປະເທດອັຟການິສຖານ ພົບຜູ້ເສຍຊີວິດ 39 ຄົນ ອົງການອຸຕຸນິຍົມວິທະຍາໄດ້ພະຍາກອນອາກາດວ່າຈະມີຄື້ນຄວາມໜາວພັດເຂົ້າປົກຄຸມອີກຄັ້ງ.

ອົງການບໍລິຫານຈັດການໄພພິບັດປາກີສຖານ ຖະແຫຼງການວ່າ ລັດແຄສເມຍ ຂອງປາກິສຖານ ເປັນເຂດທີ່ໄດ້ຮັບຜົນກະທົບໜັກທີ່ສຸດ ມີຜູ້ເສຍຊີວິດ 62 ຄົນ ແລະ 10 ຄົນສູນຫາຍ ເຊິ່ງເຫດການຫິມະເຈື່ອນ ແລະ ດິນເຈື່ອນເກີດຂື້ນເລື້ອຍໆໃນລະດູໜາວ ພ້ອມມີຫິມະຕົກໜັກປົກຄຸມເສັ້ນທາງສັນຈອນ ແລະ ເຮັດໃຫ້ເຂດທີ່ຢູ່ອາໄສຖືກຕັດຂາດ.

ຂະນະທີ່ ໂຄສົກຂອງອົງການບໍລິຫານຈັດການໄພພິບັດອັຟການິສຖານ ຖະແຫຼງການວ່າ ຄື້ນອາກາດໜາວ, ຫິມະຕົກ ແລະ ຝົນທີ່ເລີ່ມມາເມື່ອສອງອາທິດກ່ອນ ສ້າງຄວາມເສຍຫາຍສ່ວນຫຼາຍແມ່ນຫຼັງຄາເຮືອນເປ້ເພຈາກຫິມະເຈື່ອນ ທີ່ຢູ່ອາໄສຫຼາຍກວ່າ 300 ຫຼັງຄາເຮືອນໄດ້ຮັບຄວາມເສຍຫາຍ ເຊິ່ງສະພາບອາກາດທີ່ໜາວເຢັນເຮັດໃຫ້ເກີດການສູນເສຍຢ່າງໃຫຍ່ຫຼວງໃນປະເທດອັຟການິສຖານທີ່ຕັ້ງຢູ່ບໍລິເວນພູສູງສູງ ເຊິ່ງຍັງເປັນປະເທດທີ່ທຸກຍາກເຖິງວ່າຈະໄດ້ຮັບການຊ່ວຍເຫຼືອຈາກສາກົນຫຼາຍຕື້ໂດລາກໍ່ຕາມ.