ອິນເດຍ ຢຸດນຳເຂົ້ານ້ຳມັນປາມຂອງມາເລເຊຍ

16

ກຸ່ມທຸລະກິດນຳເຂົ້ານໍ້າມັນປາມໃນປະເທດອິນເດຍ ຢຸດການສັ່ງຊື້ທັງໝົດຈາກມາເລເຊຍໂດຍອັດຕະໂນມັດ ຫຼັງເປັນຜົນມາຈາກຄວາມຂັດແຍ່ງທາງການທູດລະຫວ່າງສອງປະເທດ.

ສຳນັກຂ່າວຣອຍເຕີ ລາຍງານຈາກເມືອງມຸມໄບ ປະເທດອິນເດຍ ເມື່ອວັນຈັນ ທີ 13 ມັງກອນ ວ່າ ການແຈ້ງເຕືອນຈາກລັດຖະບານອິນເດຍ ເມື່ອອາທິດທີ່ຜ່ານມາ ເກີດຂື້ນຂະນະທີ່ລັດຖະບານພະຍາຍາມຈຳກັດການນຳເຂົ້ານ້ຳມັນປາມບໍລິສຸດ ແລະ ນໍ້າມັນປາມໂອລິອິນ ຫຼັງຈາກນາຍົກລັດຖະມົນຕີ ດຣ.ມະຫາເທ ໂມຮຳໝັດ ຂອງມາເລເຊຍ ໄດ້ກ່າວຕຳໜິການປະຕິບັດງານຂອງອິນເດຍໃນແຄວ້ນແຄສເມຍ ລວມທັງການອອກກົດໝາຍສັນຊາດສະບັບໃໝ່ ທີ່ຖືກກ່າວຫາວ່າ ມີການກີດກັນຊາວມຸດສະລິມ.

ແຫຼ່ງຂ່າວນັກທຸລະກິດນ້ຳມັນປາມໃນອິນເດຍ ຢ່າງໜ້ອຍ 5 ແຫ່ງ ໄດ້ເປີດເຜີຍກັບສຳນັກຂ່າວຣອຍເຕີ ວ່າ ຫຼ້າສຸດຜູ້ນຳເຂົ້າຂອງອິນເດຍບໍ່ສັ່ງຊື້ນ້ຳມັນປາມດິບ ຫຼື ນໍ້າມັນປາມບໍລິສຸດ ຈາກຜູ້ຂາຍລາຍໃຫຍ່ໃນປະເທດມາເລເຊຍອີກແລ້ວ ແລະ ປ່ຽນໄປຊື້ນຳອິນໂດເນເຊຍແທນ ເຖິງວ່າຈະຕ້ອງໄດ້ຈ່າຍແພງກວ່າ 10 ໂດລາ (ປະມານ 88.000 ກີບ) ຕໍ່ໂຕນກໍ່ຕາມ ສ່ວນຜູ້ນຳເຂົ້າຈາກອິນເດຍລາຍໜຶ່ງ ໄດ້ເປີດເຜີຍວ່າ  ລັດຖະບານບໍ່ໄດ້ສັ່ງຫ້າມໃຫ້ນຳເຂົ້ານ້ຳມັນປາມຈາກມາເລເຊຍຢ່າງເປັນທາງການ ພຽງແຕ່ຂໍຄວາມຮ່ວມມື.

ອິນເດຍເປັນປະເທດຜູ້ຊື້ນໍ້າມັນປາມລາຍໃຫຍ່ທີ່ສຸດໃນໂລກ ກວ່າ 9 ລ້ານໂຕນໃນແຕ່ລະປີ ນໍ້າມັນປາມຄອບຄອງສ່ວນແບ່ງການນຳເຂົ້າເກືອບ 2 ໃນ 3 ຂອງນໍ້າມັນສຳລັບປຸງແຕ່ງອາຫານທັງໝົດຂອງອິນເດຍ ແລະ ເປັນການເຄື່ອນໄຫວທີ່ເປັນການສະກັດກັ້ນການນຳເຂົ້າຈາກມາເລເຊຍໂດຍອັດຕະໂນມັດ ເຊິ່ງສ້າງແຮງກົດດັນຕໍ່ລາຄານໍ້າມັນປາມໃນປະເທດມາເລເຊຍ ແລະ ເຮັດໃຫ້ປະລິມານນ້ຳມັນປາມຄົງເຫຼືອໃນຄັງຂອງມາເລເຊຍເພີ່ມຂຶ້ນ.

ມາເລເຊຍ ເປັນຜູ້ກຳນົດລາຄາກາງຂອງນໍ້າມັນປາມໃນຕະຫຼາດໂລກ ລາຄານໍ້າມັນປາມດິບ ລາຄາສົ່ງໃນເດືອນກຸມພາຂອງມາເລເຊຍ ໂຕ້ນລະ 800 ໂດລາສະຫະລັດ (7.089.000 ກີບ) ສ່ວນອິນໂດເນເຊຍແມ່ນ 810 ໂດລາ (7.178.000 ກີບ) ຕໍ່ໂຕ້ນ  ຄວາມເຄື່ອນໄຫວຂອງອິນເດຍອາດຈະສົ່ງຜົນດີໃຫ້ແກ່ປະເທດອິນໂດເນເຊຍ ເຊິ່ງເປັນຜູ້ສົ່ງອອກນ້ຳມັນປາມດິບລາຍທີ່ໃຫຍ່ທີ່ສຸດໃນໂລກ.