ລາຍງານຫຼ້າສຸດ ນໍ້າຖ້ວມໃຫຍ່ໃນຈາກາຕ້າ ມີຜູ້ເສຍຊີວິດຫຼາຍກວ່າ 20 ຄົນ

35

ຈຳນວນຜູ້ເສຍຊີວິດຈາກນໍ້າຖ້ວມກະທັນຫັນທີ່ນະຄອນຫຼວງຈາກາຕ້າ ປະເທດອິນໂດເນເຊຍ ແລະ ເຂດອ້ອມຂ້າງ ເຊິ່ງເກີດຂຶ້ນຕັ້ງແຕ່ມື້ສົ່ງທ້າຍປີເກົ່າຕ້ອນຮັບປີໃໝ່ ເພີ່ມຂື້ນຫຼາຍກວ່າ 20 ຄົນແລ້ວ.

ສຳນັກຂ່າວຕ່າງປະເທດລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນພະຫັດ ທີ 2 ມັງກອນ ວ່າ ທ່ານໂຈໂຄ ຮາຣິຍັນໂຕ ໂຄສົກກະຊວງກິດຈະການສັງຄົມອິນໂດເນເຊຍ ຖະແຫຼງເມື່ອວັນພະຫັດ ວ່າ ຈຳນວນຜູ້ເສຍຊີວິດຈາກໄພນໍ້າຖ້ວມກະທັນຫັນໃນນະຄອນຫຼວງຈາກາຕ້າ ແລະ ບໍລິເວນໃກ້ຄຽງ ຕັ້ງແຕ່ວັນທີ 31 ທັນວາ​ຜ່ານມາ ຢ່າງໜ້ອຍ 21 ຄົນ ແຕ່ຍັງມີຜູ້ສູນຫາຍ ແລະ ປະຊາຊົນຫຼາຍກວ່າ 30.000 ຄົນ ຕ້ອງອົບພະຍົບອອກຈາກບ້ານເຮືອນ.

ຂະນະທີ່ສະຖານະການໃນນະຄອນຫຼວງຈາກາຕ້າມີຄວາມວຸ້ນວາຍຫຼາຍ ເນື່ອງຈາກລະດັບນໍ້າ ໃນຫຼາຍພື້ນທີ່ຍັງບໍ່ຫຼຸດລົງ ແລະ ເລິກ ສົ່ງຜົນໃຫ້ການຈະລາຈອນທີ່ແອອັດຢູ່ແລ້ວ ຍິ່ງໜັກຂຶ້ນກວ່າເກົ່າ ຈົນບໍ່ສາມາດສັນຈອນໄປມາໄດ້ໃນຫຼາຍເສັ້ນທາງ ແລະ ປະຊາຊົນໃນຫຼາຍເມືອງບໍ່ມີໄຟຟ້າໃຊ້. ຢ່າງໃດກໍ່ຕາມສຳນັກງານອຸຕຸນິຍົມແຫ່ງຊາດພະຍາກອນວ່າ ຈະມີລົມພາຍຸຝົນຟ້າສົມທົບກັບຄວາມແຮງຂອງກະແສລົມ ແລະ ຄວາມສ່ຽງການເກີດຟ້າຜ່າໃນທ້າຍອາທິດນີ້.

ທັງນີ້ ເຫດການນ້ຳຖ້ວມຄັ້ງໃຫຍ່ໃນນະຄອນຫຼວງຈາກາຕ້າ ແລະ ພື້ນທີ່ໃກ້ຄຽງ ເມື່ອປີ 2007 ສົ່ງຜົນໃຫ້ມີຜູ້ເສຍຊີວິດຫຼາຍກວ່າ 50 ຄົນ ດ້ານປະທານາທິບໍດີໂຈໂຄວິໂດໂດ ປະກາດແຜນຍຸດທະສາດ ເມື່ອເດືອນສິງຫາ ປີຜ່ານມາ ໃນການຍ້າຍເມືອງຫຼວງຈາກຈາກາຕ້າ ເຊິ່ງມີປະຊາກອນອາໄສຫຼາຍກ່ວາ 30 ລ້ານຄົນ ຕັ້ງຢູ່ເກາະຊະວາ ໄປຢຸ່ພາກພື້ນກາລິມັນຕັນ ເທິງເກາະບໍນຽວ ໃນເຂດທີ່ເປັນອະທິປະໄຕຂອງອິນໂດເນເຊຍ ແລະ ຕັ້ງຢູ່ທາງທິດຕາເວັນອອກຂອງປະເທດ ເຊິ່ງລັດຖະບານຈາກາຕ້າມີເນື້ອທີ່ພ້ອມສ້າງເມືອງໃໝ່ ປະມານ 3.000 ເຮັກຕ້າ ໂດຍຖ້າໄດ້ຮັບອະນຸມັດຈາກສະພາ ອິນໂດເນເຊຍຈະເປັນປະເທດທີ 3 ໃນອາຊີຕາເວັນອອກສຽງໃຕ້ ທີ່ຍ້າຍເມືອງຫຼວງ ຫຼື “ການຕັ້ງນະຄອນຫຼວງທາງດ້ານລາຊະການ” ຕໍ່ຈາກເມືອງປຸຕຣາຈາຍາ ຂອງມາເລເຊຍ ແລະ ນະຄອນຫຼວງເນປິດໍ ຂອງມຽນມາ.