ແຮດ ອາຍຸຍືນທີ່ສຸດໃນໂລກ ໄດ້ເສຍຊີວິດລົງຢ່າງສະຫງົບ ໃນປະເທດແທັນຊາເນຍ

32

ແຮດດໍາເພດແມ່ ເຊິ່ງເປັນ “ແຮດທີ່ອາຍຸສູງທີ່ສຸດໃນໂລກ” ໄດ້ເສຍຊີວິດລົງຢ່າງສະຫງົບ ດ້ວຍອາຍຸ 57 ປີ ພາຍໃຕ້ການເບິ່ງແຍງຂອງອຸທິຍານແຫ່ງຊາດ ແລະ ເຂດສະຫງວນສັດປ່າ ໃນປະເທດແທັນຊາເນຍ.

ສຳນັກຂ່າວຕ່າງປະເທດລາຍງານຈາກນະຄອນຫຼວງໂດໂດມາ ປະເທດແທັນຊາເນຍ ເມື່ອວັນທີ 29 ທັນວາ ວ່າ ອຸທິຍານແຫ່ງຊາດ ແລະ ເຂດສະຫງວນສັດປ່າເອັນໂກຣອງໂກໂຣ ເຊິ່ງອົງກອນການສຶກສາ ວິທະຍາສາດ ແລະ ວັດທະນະທຳ ຂອງສະຫະປະຊາຊາດ (UNESCO) ໄດ້ຈົດທະບຽນເປັນມໍລະດົກໂລກທາງທຳມະຊາດ ເມື່ອໃນປີ 1979 ຕັ້ງຢູ່ທາງພາກເໜືອຂອງປະເທດແທັນຊາເນຍ ໄດ້ອອກຖະແຫຼງການ ເມື່ອວັນເສົາ ວ່າ ແຮດດຳແພດແມ່ ຊື່ “ເຟົາສະຕາ (Fausta)” ໄດ້ເສຍຊີວິດລົງຢ່າງສະຫງົບຕາມອາຍຸໄຂທາງທຳມະຊາດໃນເຂດອຸທິຍານແຫ່ງຊາດ ເມື່ອວັນສຸກ ທີ 27 ທັນວາ ຜ່ານມາ.

ເນື້ອໃນຂອງຖະແຫຼງການລະບຸວ່າ ນັກວິທະຍາສາດຊາວແທັນຊາເນຍ ໄດ້ຄົ້ນພົບ ເຟົາສະຕາ ໃນອານາເຂດຂອງອຸທິຍານ ເມື່ອປີ 1965 ຂະນະທີ່ມີອາຍຸປະມານ 3 – 4 ປີ ຢ່າງໃດກໍ່ຕາມ, ສຸຂະພາບຂອງແຮັດດຳເພດແມ່ ເລີ່ມຊຸດລົງຕາມໄວ ຕັ້ງແຕ່ປີ 2016 ບວກກັບ ເຟົາສະຕາ ຜະເຊີນກັບການຄຸກຄາມຫຼາຍຂຶ້ນຈາກສັດລ່າເນື້ອ ໂດຍສະເພາະໝາປ່າໄຮຍີນາ ເຈົ້າໜ້າທີ່ຈຶ່ງຈັດສິນໃຈນຳແຮັດດຳດັ່ງກ່າວມາລ້ຽງໃນລະບົບປິດ ຈົນມັນໄດ້ຈາກໂລກໄປຢ່າງສະຫງົບ ລວມອາຍຸໄດ້ປະມານ 57 ປີ ເຊິ່ງອາດຈະເປັນແຮັດທີ່ມີອາຍຸຍືນທີ່ສຸດຂອງແຮດທີ່ຍັງເຫຼືອຢູ່ທຸກໂຕເທິງໂລກ. ນອກຈາກນີ້, ຖືວ່າເປັນແຮດທີ່ມີອາຍຸຍືນກວ່າແຮດທີ່ຢູ່ໃນທຳມະຊາດ ສະເລ່ຍລະຫວ່າງ 37 – 43 ປີ ແລະ ປະມານ 50 ປີ ສຳລັບແຮດທີ່ອາໄສຢູ່ໃນລະບົບປິດ.

ຢ່າງໃດກໍ່ຕາມ, ກ່ອນໜ້າທີ່ເຟົາສະຕາ ມີແຮດຂາວເພດແມ່ຊື່ “ຊານາ” ເຊິ່ງອາໄສຢູ່ສວນສັດແຫ່ງໜຶ່ງໃນປະເທດຝຣັ່ງ ຄອງສະຖິຕິຂອງແຮດທີ່ມີອາຍຸຍືນທີ່ສຸດໃນໂລກ ແລະ ໄດ້ເສຍຊີວິດ ເມື່ອປີ 2014 ຂະນະມີອາຍຸໄດ້ 55 ປີ.