ໄຟປ່າໃນປະເທດອົສຕຣາລີ ໄດ້ໄໝ້ທຳລາຍທີ່ຢູ່ອາໄສຂອງໝີໂຄອາລາ ແລ້ວ 30%

12

ລັດຖະບານອົສຕຣາລີ ປະເມີນຄວາມຮ້າຍແຮງຂອງໄຟປ່າທີ່ໄໝ້ມາດົນກວ່າ 3 ເດືອນ ເຊິ່ງເຜົາທຳລາຍທີ່ຢູ່ອາໄສຂອງໝີໂຄອາລາແລ້ວ 1 ໃນ 3 ຂອງພື້ນທີ່ໃນລັດນິວເຊົາເວລສ໌.

ສຳນັກຂ່າວຕ່າງປະເທດລາຍງານຈາກນະຄອນຊິດນີ ປະເທດອົສຕຣາລີ ເມື່ອວັນອາທິດ ທີ 29 ທັນວາ ວ່າ ທ່ານນາງຊູຊານ ລີ ລັດຖະມົນຕີວ່າການກະຊວງສິ່ງແວດລ້ອມຂອງອົສຕຣາລີ ໄດ້ກ່າວເມື່ອວັນເສົາ ວ່າ ຈາກຄວາມເສຍຫາຍຂອງເນື້ອທີ່ຫຼາຍກວ່າ 4,86 ລ້ານເຮັກຕາໃນປະເທດ ທີ່ໄດ້ຮັບຜົນກະທົບຈາກໄຟປ່າທີ່ລຸກໄໝ້ກວ່າ 100 ຈຸດ ເມື່ອເດືອນກັນຍາ ຜ່ານມານັ້ນ ປະມານ 30% ເປັນເຂດທີ່ຢູ່ອາໄສຂອງໝີໂຄອາລາ ຕາມແລວແຄມຝັ່ງທາງພາກເໜືອ ແລະ ພາກກາງຂອງລັດນິວ ເຊົາ ເວລສ໌ ເຊິ່ງເປັນເຂດອະນຸລັກ ແລະ ປະຊາກອນໝີໂຄອາລາປະມານ 28.000 ໂຕ ແຕ່ວ່າການປະເມີນເບື້ອງຕົ້ນພົບວ່າ ໝີໂຄອາລາ ໃນຂົງເຂດນັ້ນ “ມີຈຳນວນຫຼຸດລົງຢ່າງຫຼວງຫຼາຍ”.

ຢ່າງໃດກໍ່ຕາມ, ທ່ານນາງລີ ຢືນຢັນວ່າ ລັດຖະບານ ແລະ ເຈົ້າໜ້າທີ່ດັບເພີງທຸກຄົນ ຕະຫຼອດຈົນປະຊາຊົນໃນພື້ນທີ່ທີ່ພະຍາຍາມຮ່ວມມືກັນຢ່າງສຸດຄວາມສາມາດໃນການຄວບຄຸມໄຟປ່າ ແລະ ຊ່ວຍເຫຼືອສິ່ງມີຊີວິດທັງໝົດທີ່ໄດ້ຮັບຜົນກະທົບຈາກວິກິດໄຟປ່າຄັ້ງນີ້ ທີ່ຍັງບໍ່ມີແນວໂນ້ມວ່າຈະຫຼຸດຄວາມຮ້າຍແຮງລົງ ດ້ານສຳນັກງານອຸຕຸນິຍົມວິທະຍາແຫ່ງຊາດອົສຕຣາລີ ລາຍງານວ່າ ອຸນຫະພູມໃນເຂດຊານເມືອງຂອງນະຄອນຊິດນີ ສູງເຖິງ 41 ອົງສາ ແລະ ພະຍາກອນອາກາດໃນບໍລິເວນຕົວເມືອງ 31 ອົງສາ ໃນວັນອາທິດ ແລະ ເພີ່ມຈະຂຶ້ນເປັນ 35 ອົງສາ ໃນວັນອັງຄານ ທີ 31 ທັນວາ ນີ້ ສ່ວນອຸນຫະພູມຢູ່ນະຄອນຫຼວງແຄນເບີຣາ 38 ອົງສາ ເມື່ອວັນເສົາ. ຫຼັງຈາກນັ້ນ, ມີແນວໂນ້ມເພີ່ມຂຶ້ນເຊັ່ນກັນ ເຊິ່ງສະພາບອາກາດຮ້ອນ ແລະ ແຫ້ງແລ້ງຈັດ ຄືໜຶ່ງໃນອຸປະສັກສຳຄັນຂອງການຄວບຄຸມໄຟປ່າ ເຊິ່ງມີຜູ້ເສຍຊີວິດແລ້ວ 11 ຄົນ.

ຂະນະທີ່ ສຳນັກງານນາຍົກລັດຖະມົນຕີອົສຕຣາລີອອກຖະແຫຼງການ ວ່າ ອາສາສະໝັກດັບເພີງ ໃນລັດນິວເຊົາເວລສ໌ ເຊິ່ງໄດ້ລົງພື້ນທີ່ຕໍ່ເນື່ອງບໍ່ຕ່ຳກວ່າ 10 ວັນ ທັງພະນັກງານລັດຖະບານ ຫຼື ພະນັກງານເອກະຊົນ ຈະໄດ້ຮັບຄ່າຊົດເຊີຍເປັນພິເສດເຖິງ 6.000 ໂດລາອົສຕຣາລີ (ປະມານ 37 ລ້ານກີບ) ຫຼັງຈາກ ເມື່ອອາທິດ ຜ່ານມາ ລັດຖະບານໄດ້ປະກາດມາດຕະການສະໜັບສະໜູນ ຄັ້ງທຳອິດ ວ່າ ໃນກໍລະນີຂອງອາສາສະໝັກດັບເພີງ ທີ່ເປັນເຈົ້າໜ້າທີ່ລັດຖະບານ ໜ່ວຍງານຕົ້ນສັງກັດຈະນັບໄລຍະທີ່ບຸກຄົນລົງພື້ນທີ່ໄຟປ່າ ເປັນວັນລາພັກພິເສດ ໂດຍບໍ່ຫັກວັນພັກປະຈຳປີ ຫຼື ລາພັກປ່ວຍ ເຊິ່ງບຸກຄົນນັ້ນຈະຍັງໄດ້ຮັບເງິນເດືອນປົກກະຕິ ໃນໄລຍະເວລາສູງສຸດ 20 ວັນ ເຖິງວ່າ ອາສາສະໝັກທີ່ເປັນພະນັກງານເອກະຊົນ ແຕ່ລັດຖະບານຫວັງເປັນຢ່າງຍິ່ງວ່າ ເຈົ້າຂອງຫົວໜ່ວຍທຸກລະກິດຈະໃຊ້ມາດຕະການສະໜັບສະໜຸນໃນ “ລະດັບດຽວກັນ” ກັບຂອງລັດຖະບານ.