ຜູ້ເສຍຊີວິດເພີ່ມຂຶ້ນຕໍ່ເນື່ອງ ຈາກອິດທິພົນຂອງພາຍຸໄຕ້ຝຸ່ນ ພັນຝົນ ໃນຟີລິບປິນ

9

ຈຳນວນຜູ້ເສຍຊີວິດຈາກອິດທິພົນຂອງພາຍຸໄຕ້ຝຸ່ນ “ພັນຝົນ” ທີ່ພັດຜ່ານຂຶ້ນເທິງໝູ່ເກາະໃນເຂດພາກກາງຂອງປະເທດຟີລິບປິນ ເມື່ອວັນຄຣິສມາສ ຜ່ານມາ ເພີ່ມຂຶ້ນຢ່າງໜ້ອຍ 28 ຄົນ ແຕ່ຍັງມີຜູ້ສູນຫາຍຢ່າງໜ້ອຍ 12 ຄົນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງມະນີລາ ປະເທດຟີລິບປິນ ເມື່ອວັນສຸກ ທີ 27 ທັນວາ ກ່ຽວກັບຄວາມຄືບໜ້າຂອງພາລະກິດກູ້ໄພ ແລະ ຊ່ວຍເຫຼືອປະຊາຊົນໃນພາກກາງຂອງຟີລິບປິນ ໂດຍສະເພາະພາກພື້ນວິຊາຍັສຕາເວັນອອກ ຫຼື ເຂດຊີລາງັງຄາບິຊາຢາອັນ ຫຼື ເຂດ 8 ເຊິ່ງເປັນເສັ້ນທາງຂອງພາຍຸໄຕ້ຝຸ່ນທີ່ພາດຜ່ານ ເມື່ອວັນຄຣິສມາສ ດ້ວຍຄວາມໄວລົມສູງສຸດໃກ້ຈຸດສູນກາງ 195 ກິໂລແມັດຕໍ່ຊົ່ວໂມງ ວ່າ ສຳນັກງານບໍລິຫານຈັດການໄພພິບັດແຫ່ງຊາດລາຍງານວ່າ ມີຜູ້ເສຍຊີວິດຢ່າງໜ້ອຍ 28 ຄົນ ແຕ່ຍັງມີຜູ້ສູນຫາຍຢ່າງໜ້ອຍ 12 ຄົນ ຂະນະທີ່ປະຊາຊົນຫຼາຍກວ່າ 16.000 ຄົນ ຕ້ອງອາໄສຢູ່ໃນສູນພັກເຊົາຊົ່ວຄາວ.

ຢ່າງໃດກໍ່ຕາມ, ພາຍຸອ່ອນກຳລັງລົງເມື່ອພັດຜ່ານຂຶ້ນສູ່ພື້ນດິນ ໂດຍຄວາມໄວລົມເມື່ອຕອນເຊົ້າຂອງວັນສຸກ ຕາມເວລາທ້ອງຖິ່ນ ຫຼຸດລົງ 120 ກິໂລແມັດຕໍ່ຊົ່ວໂມງ ແລະ ເຄືອນໂຕຜ່ານຟີລິບປິນ ໄປທະເລຈີນໃຕ້ ດ້ານປະທານາທິບໍດີ ໂຣດຣິໂກ ດູເຕຣ໌ເຕ ຜູ້ນຳຟີລິບປິນ ສັ່ງການໃຫ້ກອງທັບ ແລະ ຕຳຫຼວດ ລົງພື້ນທີ່ຊ່ວຍເຫຼືອປະຊາຊົນຢ່າງສຸດຄວາມສາມາດ ຂະນະດຽວກັນ ທາງການແຂວງເລເຕ, ແຂວງເມເດຍິນ ແລະ ເທສະບານຫຼາຍເມືອງໃນແຂວງເຊບູ ແລະ ແຂວງຄາປູລູອັງດີນາກັດ ເຊິ່ງຕັ້ງຢູ່ໃນພາກພື້ນວິຊາຍັສຕາເວັນອອກ ປະກາດເປັນພື້ນທີ່ໄພພິບັດ.

ທັງນີ້ ຟີລິບປິນເປັນອີກໜຶ່ງປະເທດທີ່ຕ້ອງຮັບມືກັບພາຍຸໄຕ້ຝຸ່ນ ປີລະປະມານ 20 ຫົວ ເຊິ່ງມີອິດທິພົນແຮງຄ່ອຍແຕກຕ່າງກັນ ໂດຍພາຍຸໄຕ້ຝຸ່ນທີ່ພັດຜ່ານຟີລິບປິນດ້ວຍຄວາມໄວລົມສູງທີ່ສຸດ ຄືພາຍຸໄຕ້ຝຸ່ນ “ໄຮຟອງ” ສ້າງຄວາມເສຍຫາຍເປັນພື້ນທີ່ກວ້າງໃຫ້ແກ່ພາກເໜືອຂອງປະເທດ ເມື່ອເດືອນຕຸລາ ປີ 1881 ສົ່ງໃຫ້ມີຜູ້ເສຍຊີວິດປະມານ 20.000 ຄົນ ຖັດມາແມ່ນພາຍຸໄຕ້ຝຸ່ນ “ໄຮຍ້ຽນ” ເມື່ອເດືອນພະຈິກ ປີ 2013 ພາກຊີວິດປະຊາຊົນປະມານ 6.300 ຄົນ.