3 ປະເທດໃຫຍ່ອາຊີຕາເວັນອອກ ຕັ້ງເປົ້າ ຍົກລະດັບການຄ້າ

21

ຈີນ, ຍີ່ປຸ່ນ ແລະ ເກົາຫຼີໃຕ້ ເຫັນດີເປີດກວ້າງຂອບເຂດການຮ່ວມມືດ້ານເສດຖະກິດ ໂດຍສະເພາະການເດີນໜ້າເຈລະຈາສັນຍາການຄ້າສາມຝ່າຍ. ຢ່າງໃດກໍ່ຕາມ, ທັງສາມປະເທດຕ້ອງຫາທາງເພື່ອແກ້ໄຂຂໍ້ຂັດການປົກຄອງດິນແດນດ້ວຍ.

ສຳນັກຂ່າວຕ່າງປະເທດລາຍງານຈາກເມືອງເສີງຕູ ປະເທດຈີນ ເມື່ອວັນພະຫັດ ທີ 26 ທັນວາ ວ່າ ທ່ານ ຫຼີ່ ເຄີສຽງ ນາຍົກລັດຖະມົນຕີຈີນ ແລະ ນາຍົກລັດຖະມົນຕີຊິນໂຊ ອາເບະ ຜູ້ນຳຍີ່ປຸ່ນ ໄດ້ພົບປະຫາລືລະດັບທະວິພາຄີນອກຮອບການປະຊຸມໄຕພາຕີ (ການປະຊຸມຮ່ວມສາມຝ່າຍ) ກັບເກົາຫຼີໃຕ້ ທີ່ ເມືອງເສີງຕູ ເມືອງສຳຄັນຂອງມົນທົນເສສວນ ຢູ່ພາກກາງຂອງປະເທດຈີນ ເມື່ອວັນພຸດ ໂດຍທ່ານອາເບະ ໄດ້ກ່າວໃນໄລຍະໜຶ່ງວ່າ ລັດຖະບານໂຕກຽວມີຄວາມມຸ່ງໝັ້ນຍົກລະດັບຄວາມສຳພັນກັບລັດຖະບານປັກກິ່ງທີ່ພັດທະນາຂຶ້ນແລ້ວໃນໄລຍະນີ້ ເພື່ອໃຫ້ມີຄວາມກ້າວໜ້າໄປໃນທາງບວກຍິ່ງຂຶ້ນກວ່າເກົ່າ  ເພື່ອປູທາງສູ່ “ການຮ່ວມມືໃນລະດັບສູງຢ່າງຍືນຍົງ” ບໍ່ວ່າຈະເປັນການແລກປ່ຽນ, ການຢ້ຽມຢາມຂອງເຈົ້າໜ້າທີ່ລະດັບສູງ ແລະ ເຈລະຈາຮ່ວມກັນໂດຍສັນຕິວິທີ.

ນາຍົກລັດຖະມົນຕີຈີນ ສະແດງຄວາມເພິ່ງພໍໃຈຕໍ່ລະດັບຄວາມສຳພັນພັນກັບຍີ່ປຸ່ນໃນໄລຍະນີ້ “ທີ່ມີແນວໂນ້ມກັບຄືນສະຖານະການປົກກະຕິ” ແລະ ມີຄວາມເຫັນດີເພີ່ມຄວາມຈິງຈັງໃນການປັບປຸງການຮ່ວມມືສອງຝ່າຍ ໂດຍທ່ານຫຼີ່ ກ່າວວ່າ ຈີນມີແຜນເປີດກວ້າງດ້ານອຸດສາຫະກຳ, ການບໍລິການໃຫ້ແກ່ປະເທດຍີ່ປຸ່ນ ແລະ ການຮ່ວມມືດ້ານເສດຖະກິດອື່ນໆ ເຊິ່ງລວມເຖິງການເດີນໜ້າເຈລະຈາເຮັດສັນຍາການຄ້າໄຕພາຄີ ລະຫວ່າງຈີນ, ຍີ່ປຸ່ນ ແລະ ເກົາຫຼີໃຕ້ ເຊິ່ງຖ້າປະສົບຜົນສຳເລັດ ກໍ່ຈະເປັນໜຶ່ງໃນສັນຍາການຄ້າທີ່ມີມູນຄ່າທາງເສດຖະກິດສູງທີ່ສຸດໃນໂລກ.

ຈີນ, ຍີ່ປຸ່ນ ແລະ ເກົາຫຼີໃຕ້ ເປັນປະເທດທີ່ມີມູນຄ່າຜະລິດຕະພັນລວມກັນໃນປະເທດ (GDP) ເປັນອັນດັບທີ 2, 3 ແລະ 12 ຂອງໂລກ ແລະ ອັນດັບ 1, 2, ແລະ 4 ໃນອາຊີ. ອີງຕາມການຈັດອັນດັບຂອງທະນາຄານໂລກ (WORLD BANK) ແລະ ກອງທຶນການເງິນສາກົນ (IMF: International Monetary Fund) ຂະນະທີ່ມູນຄ່າການຄ້າລະຫວ່າງສາມປະເທດແມ່ນ 720.000 ລ້ານໂດລາ (ປະມານ 6.380.000 ຕື້ກີບ) ໃນປີ 2018.

ເຖິງຢ່າງໃດກໍ່ຕາມ, ຂໍ້ຂັດແຍ່ງກ່ຽວກັບນະໂຍບາຍຄວາມໝັ້ນຄົງຂອງແຕ່ລະປະເທດ ແລະ ຂໍ້ຂັດແຍ່ງເລື່ອງເນື້ອທີ່ ທີ່ຍັງເປັນອຸປະສັກສຳຄັນເຊິ່ງສົ່ງຜົນໃຫ້ແກ່ຄວາມພະຍາຍາມສົ່ງເສີມຄວາມຮ່ວມມືທາງເສດຖະກິດລະດັບໄຕພາຄີທີ່ບໍ່ສາມາດລຸລ່ວງໄດ້. ໂດຍຈີນ ແລະ ຍີ່ປຸ່ນ ຍັງຕ້ອງຮ່ວມກັນຫາທາງເພື່ອແກ້ໄຂບັນຫາການຍາດແຍ່ງເກາະຕຽວຫຍູ ຫລື ເກາະເຊນກາກຸ ໃນທະເລຈີນຕາເວັນອອກ ສ່ວນຍີ່ປຸ່ນ ແລະ ເກົາຫຼີໃຕ້ ທີ່ມີຄວາມຂັດແຍ່ງກັນເລື່ອງເກາະທາເຄຊິມະ ຫຼື ເກາະດັອກໂດ ໃນທະເລຍີ່ປຸ່ນ.  ສະນັ້ນແລ້ວ ທັງສາມປະເທດໄດ້ສະແດງຈຸດຢືນຮ່ວມກັນຢ່າງເຂັ້ມແຂງໃນການປະຊຸມຄັ້ງນີ້ ວ່າ ຕ້ອງການຍົກລະດັບຄວາມຮ່ວມມືໄຕພາຄີ.