ຜູ້ນຳອົສຕຣາລີ ວາງແຜນຊ່ວຍເຫຼືອອາສາສະໝັກມອດໄຟປ່າ

4

ນາຍົກລັດຖະມົນຕີອົສຕຣາລີ ເປີດເຜີຍມາດຕະການເພື່ອສະໜັບສະໜູນອາສາສະໝັກພົນລະເມືອງທີ່ໃຊ້ເວລາຫຼາຍວັນລົງພື້ນທີ່ມອດໄຟປ່າ ວ່າ ໃນກໍລະນີທີ່ເປັນພະນັກງານຂອງລັດຖະບານໄດ້ຖືກພິຈາລະນາໃຫ້ເປັນ “ວັນພັກພິເສດ” ສູງສຸດເຖິງ 20 ວັນ ເຊິ່ງຈະໄດ້ຮັບເງິນເດືອນເຕັມຄືເກົ່າ ແລະ ຫວັງຫຼຸດຜ່ອນຄວາມເຄັ່ງຕຶງລະຫວ່າງລັດຖະບານ ກັບ ປະຊາຊົນ ໃນໄລຍະເກີດວິກິດການໄຟປ່າ.

ສຳນັກຂ່າວຕ່າງປະເທດລາຍງານຈາກນະຄອນຊິດນີ ປະເທດອົສຕຣາລີ ເມື່ອວັນພຸດ ທີ 25 ທັນວາ ວ່າ ນາຍົກລັດຖະມົນຕີສະກັອດ ມໍຣິສັນ ປະກາດເມື່ອວັນອັງຄານ ເລື່ອງມາດຕະການສະໜັບສະໜູນໃຫ້ແກ່ອາສາສະໝັກພົນລະເມືອງເຊິ່ງລົງພື້ນທີ່ຊ່ວຍເຫຼືອພາລະກິດມອດໄຟປ່າຂອງເຈົ້າໜ້າທີ່ດັບເພີງ ວ່າ ຖ້າບຸກຄົນນັ້ນເປັນເຈົ້າໜ້າທີ່ຂອງລັດຖະບານ ໜ່ວຍງານຕົ້ນສັງກັດຈະນັບໃຫ້ເປັນໄລຍະທີ່ລົງພື້ນທີ່ໄຟປ່າເປັນວັນລາພັກຜ່ອນກໍລະນີພິເສດ ເຊິ່ງຈະບໍ່ຖືກຫັກອອກຈາກວັນລາພັກຈາກເຈັບປ່ວຍ ແລະ ສິດໃນການລາພັກຮ້ອນ ໂດຍບຸກຄົນນັ້ນ ຈະຍັງໄດ້ຮັບເງິນເດືອນຕາມປົກກະຕິ ພາຍໃນໄລຍະເວລາສູງສຸດ 20 ວັນ. ຂະນະທີ່ ອາສາສະໝັກທີ່ເປັນພະນັກງານບໍລິສັດເອກະຊົນ ແມ່ນໃຫ້ເປັນໄປຕາມການຕັດສິນໃຈຂອງນາຍຈ້າງ. ແຕ່ຜູ້ນຳອົສຕຣາລີຫວັງວ່າ ພະນັກງານເອກະຊົນທີ່ສະໝັກໃຈລົງພື້ນທີ່ມອດໄຟປ່າຈະໄດ້ຮັບການປະຕິບັດຈາກນາຍຈ້າງດ້ວຍມາດຕະການ “ໃນລະດັບດຽວກັນ” ກັບຂອງລັດຖະບານ.

ນາຍົກລັດຖະມົນຕີຂອງປະເທດອົສຕຣາລີ ທ່ານສະກັອດ ມໍຣິສັນ ( Scott Morrison )

ການເຄື່ອນໄຫວຂອງລັດຖະບານແຄນເບີຣາ ແມ່ນເປັນຄວາມຫວັງທີ່ຈະຫຼຸດຜ່ອນຄວາມເຄັ່ງຕຶງລະຫວ່າງ ຜູ້ນຳອົສຕຣາລີ ແລະ ປະຊາຊົນ ໃນໄລຍະເກີດວິກິດໄຟປ່າ ເຊິ່ງໄດ້ລຸກລາມກະຈາຍຫຼາຍກວ່າ 100 ຈຸດທົ່ວປະເທດ ຕັ້ງແຕ່ເດືອນກັນຍາ ຜ່ານມາ ຄວາມຮ້າຍແຮງຂອງໄຟປ່າໄດ້ສ້າງຄວາມເສຍຫາຍໃຫ້ແກ່ເນື້ອທີ່ ຫຼາຍກວ່າ 2 ລ້ານເຮັກຕາ. ອາຄານ, ບ້ານເຮືອນ ແລະ ສິ່ງປຸກສ້າງເກືອບ 1.000 ແຫ່ງ ໄດ້ຮັບຄວາມເສຍຫາຍ ແລະ ມີຜູ້ເສຍຊີວິດຈາກໄພທຳມະຊາດຄັ້ງນີ້ ຢ່າງໜ້ອຍ 9 ຄົນ ໂດຍພື້ນທີ່ວິກິດທີ່ສຸດຄືລັດນິວສ໌ ເຊົາ ເວລສ໌ ເຊິ່ງເປັນລັດທີ່ມີພົນລະເມືອງອາໄສຫຼາຍທີ່ສຸດ ຕັ້ງຢູ່ທາງພາກຕາເວັນອອກຂອງປະເທດ.

ເຖິງວ່າສຳນັກງານອຸຕຸນິຍົມແຫ່ງຊາດລາຍງານວ່າ ອຸນຫະພູມສະເລ່ຍໃນລັດນິວເຊົາເວລສ໌ ແມ່ນເຢັນລົງເລັກນ້ອຍໃນອາທິດນີ້. ແຕ່ຈະກັບມາຮ້ອນອີກຄັ້ງໃນທ້າຍອາທິດ ຂະນະທີ່ ເຈົ້າໜ້າທີ່ດັບເພີງ ອາໄສໄລຍະອາກາດເຢັນນີ້ “ໃຫ້ເປັນໄລຍະສຳຄັນ” ເລັ່ງຄວບຄຸມສະຖານະການໃຫ້ໄດ້ຫຼາຍທີ່ສຸດ.