ລັດນິວເຊົາເວລສ໌ ປະກາດສະຖານະການສຸກເສີນໄຟປ່າ ຄັ້ງທີ 2

10

ທາງການລັດນິວເຊົາເວລສ໌ ເຊິ່ງເປັນລັດທີ່ມີປະຊາກອນອາໄສຫຼາຍທີ່ສຸດຂອງອົສຕຣາລີ ປະກາດສະຖານະການສຸກເສີນເປັນຄັ້ງທີ 2 ພາຍໃນໄລຍະພຽງເດືອນດຽວ ຈາກວິກິດການໄຟປ່າທີ່ຍັງສືບຕໍ່ຮຸນແຮງ ພ້ອມກັບອາກາດຮ້ອນສູງທີ່ເປັນປັດໃຈສຳຄັນ.

ສຳນັກຂ່າວຕ່າງປະເທດລາຍງານຈາກນະຄອນຊິດນີ ປະເທດອົສຕຣາລີ ເມື່ອວັນພະຫັດ ທີ 19 ທັນວາ ວ່າ ສຳນັກງານນາຍົກລົດຖະມົນຕີຂອງລັດນິວເຊົາເວລສ໌ ເຊິ່ງເປັນລັດທີ່ມີພົນລະເມືອງອາໄສຫຼາຍທີ່ສຸດ ແລະ ຕັ້ງຢູ່ແຄມຝັ່ງທາງພາກຕາເວັນອອກຂອງອົສຕຣາລີ ໄດ້ອອກຖະແຫຼງການ ເມື່ອວັນພະຫັດ  ປະກາດສະຖານະການສຸກເສີນເປັນໄລຍະ 7 ວັນ ເນື່ອງມາຈາກໄຟປ່າທີ່ຍັງຮ້າຍແຮງກວ່າ 100 ຈຸດ ທີ່ບັນຈົບກັບສະພາບອາກາດຮ້ອນສູງ ແລະ ແຫ້ງແລ້ງ ຖືເປັນການປະກາດສະຖານະການສຸກເສີນ ຄັ້ງທີ2 ຈາກການປະກາດຄັ້ງທຳອິດ ເມື່ອກາງເດືອນພະຈິກ ຜ່ານມາ ທັງນີ້ “ລະດູການໄຟປ່າ” ໃນລັດນິວເຊົາເວລສ໌ ໄດ້ເກີດຂຶ້ນ ເມື່ອເດືອນກັນຍາ ຜ່ານມາ.

ຂະນະທີ່ສຳນັກງານອຸຕຸນິຍົມແຫ່ງຊາດອົສຕຣາລີ (BOM: Bureau of Meteorology) ພະຍາກອນສະພາບອາກາດຕະຫຼອດອາທິດນີ້ ວ່າ “ຈະຍັງສືບຕໍ່ຮ້າຍແຮງຈາກຄວາມຮ້ອນ” ຫຼັງມີອຸນຫະພູມສະເລ່ຍໃນທົ່ວປະເທດ ເມື່ອວັນອັງຄານຜ່ານມາ 40,9 ອົງສາ ເຊິ່ງທຳລາຍສະຖິຕິ 40,3 ອົງສາ ເມື່ອວັນທີ 7 ມັງກອນ 2013 ແລະ ອຸນຫະພູມຢູ່ເມືອງອຸດນາຄັດຕາ ເຊິ່ງຕັ້ງຢູ່ຫ່າງໄກໃນບໍລິເວນທະເລຊາຍທາງພາກໃຕ້ຕອນລຸ່ມຂອງອົສຕຣາລີ ອຸນຫະພູມສູງເຖິງ 47 ອົງສາ ເມື່ອວັນພຸດ ທີ່ຜ່ານມາ ສ້າງສະຖິຕິເປັນໜຶ່ງໃນເມືອງທີ່ອຸນຫະພູມຮ້ອນທີ່ສຸດຂອງໂລກໃນອາທິດນີ້. ນອກຈາກນັ້ນ, ອຸນຫະພູມທີ່ເມືອງອຸດດານັດຕາ ມີແນວໂນ້ມທີ່ຈະຮ້ອນຄົງທີ່ແບບນີ້ໄປຈົນເຖິງອາທິດໜ້າ “ເປັນຢ່າງໜ້ອຍ” ແລະ ອາດຈະເຮັດສະຖິຕິໃກ້ຄຽງກັບອຸນຫະພູມສູງທີ່ສຸດຂອງເມືອງ 50,7 ອົງສາ ເມື່ອປີ 1960.

ທັງນີ້, ເຈົ້າໜ້າທີ່ດັບເພີງສາມາດຄວບຄຸມໄຟປ່າໄດ້ ກວ່າ 100 ຈຸດທົ່ວປະເທດ ໃນສະພາບອາກາດທີ່ຮ້ອນ ແລະ ແຫ້ງແລ້ງຫຼາຍເຊິ່ງເປັນອຸປະສັກອັນໃຫຍ່ຫຼວງຕໍ່ການຄວບຄຸມສະຖານະການໄຟປ່າທີ່ໄໝ້ທຳລາຍເນື້ອທີ່ກວ່າ 3.000.000 ເຮັກຕາ, ບ້ານເຮືອນ ແລະ ສິ່ງປຸກສ້າງກວ່າ 700 ຫຼັງ ໄດ້ຮັບຄວາມເສຍຫາຍ, ປະຊາຊົນຢ່າງໜ້ອຍ 6 ຄົນ ເສຍຊີວິດ ແລະ ໝີໂຄອາລາ ຕາຍຫຼາຍຮ້ອຍໂຕ. ຂະນະດຽວກັນ, ຜົນກະທົບຈາກການດັບໄຟກໍ່ຄື ໝອກຄວັນທີ່ເປັນພິດ ເຊິ່ງລອຍໄປປົກຄຸມ ທົ່ວໄປທ້ອງຟ້າຂອງປະເທດອົສຕຣາລີ ສ້າງຄວາມລຳບາກໃນການດຳລົງຊີວິດຂອງປະຊາຊົນ.